KEN TA NATASHA?

Mirando bek na su bida, Natasha (28) no por a pidi pa un cuminsamento mas bunita y stabil. El a haya e oportunidad pa studia na Canada y despues a haya un ‘dreamjob’ na Sweden como un Pharmaceutcal Market Research. Tres aña despues di a establece su mes na Sweden, el a bin Aruba pa vacantie den cual periodo el a haya un oferta di trabou den ministerio di transporte y comunicacion y a dicidi pa tuma e reto aki. Aunke Sweden tabata tremendo, Aruba tabata su cas. E mes no por a biba pensa cu manera destino ta; tur cos ta pasa pa un motibo. Natasha a haya sa cu e ta sperando un baby girl na 2012 cu tabata un alegria inmenso; E alegria aki a keda personifica den su nomber; Winter, cu tabata un mucha bunita di wowonan grandi y bunita. Sinembargo 1 dia despues di naci, Natasha a haya un noticia devastador; Winter a keda diagnostica cu e condicion yama CF of Cystic Fibrosis. CF of Cystic Fibrosis ta un condicion genetico, te awe incurabel, cu ta afecta e pulmon, pancreas, higra y tripanan di e persona afecta unda un slijm ta keda crea y pega den esakinan. E ta un condicion fisico hopi delicado y na medida cu e paciente ta crece, e malesa tambe ta evoluciona.

Algun otra sintomanan ta sinusitis, problema di crecemento y infertilidad. “Mi ta corda cu dos siman prome cu Winter a nace e dokternan a haci un ultimo echo y nan a wak cu mi baby su barica tabata hincha, pero nan a kere cu e tabata djis gordo y no por a pensa cu tabata meconium ( e prome af di un baby cu e ta supposed di saca despues di nacimento). Despues di a haya e noticia aki, Natasha mester a stop di traha y dedica su mes 100% na su yiu pasobra e ta rekeri cuido y dedicacion durante henter dia. Di un dia pa otro, de proposito di su bida a keda defini…

MI NO A IMAGINA DEN MI WILDEST DREAM CU MI LO POR BIBA MANERA MI TA BIBANDO AWE, NOS A COMPRONDE CU NOS MESTER A SIÑA BALORA TUR LOKE NOS TIN, PASO SI NOS NO POR MANAGE Y GRADICI LOKE NOS TIN AWO, DIOS NO LO DUNA NOS MAS

UN RETO PA PROLONGA BIDA

“For di dia cu winter a nace mi ta educa mi mes riba CF” e mama hoben ta bisa. E ultimo cu mi a haci tabata logra cumpra un asina yama ‘shaking vest’ . Esaki a costa rond di 20 mil dollar y aunke hopi hende tabata contra, mi a bende mi auto, mi a bende cupcakes y mi a bende tur cos di balor como tambe e placa cu mi a haya for di traha for di cas (Natasha ta ofrece servicio di Relacion Publico na companianan). E ayudo cu nos a haya for di comunidad pa venta di nos cupcakes tabata increibel. Mi por bisa cu awe, e vest ta haci un diferencia den nos bida y ta yuda nos pa e slijm no keda pega na Winter su pulmonnan of su tripanan. Poco dia pasa, Winter a haya un pulmonia, y aunke mi no por comproba cu e vest a cur’e, mi por bisa cu Winter a recupera super liher si. E forma cu mi ta wak esaki ta cu, si tin hende cu por cumpra lo ultimo den technologia manera celular of computer, pakico ami no por inverti den e bida di mi yiu”?

UN LUCHA CONTRA TEMPO

“Actualmente Winter su tratamento ta inclui nebulizers, su enzymes, su vitamina, su cuminda, tur esaki ta hopi importante. Winter mester come mescos c’un hende grandi pa e por crece y su curpa ta absorbe unicamente 1/3 parti di loke e ta come. Pero pa e come e ta duna nos un tiki trabou como cu e prome biaha cu e mester a cuminsa come, el a haya un infeccion fuerte y e antibiotica tabata pone saca. Pues awor e ta asocia comemento cu sacamento”, Natasha ta conta. “Si Winter ta saca, nos ta haci limpi y sigui hunga, si e ta struggle pa hala rosea nos ta nebulize y sigui hunga. Ami no por controla kiko e malesa ta haci, pero mi por controla con nos ta reacciona na e malesa, con felis nos lo ta y nada lo no kibra nos felicidad. Na Aruba e expectativa di bida ta 8 aña solamente mientras cu na Hulanda y Merca, esaki ta 35 aña y na Sweden hasta 50. E diferencia grandi den e cifranan aki ta debi na e calidad di e cuido medico.

Winter a nace cu meconium ileus, cu ta un obstruccion den su tripa y ta e prome sintoma di CF. Dos dia despues cu el a nace el a pasa den un operacion grandi cu nan a kere cu e no lo sobrevivi. Nan a saca su tripa y a dun’e un stoma y e stoma ey ta locual nos mester a flush cada 2 ora.”. CF ta duna hopi problema di tripa, y ta mas tanto slijm, y e tin cu bebe laxante tur dia of su barica ta sera.

Awe cu ni 2 aña ainda, Winter ta biba riba un cantidad enorme di medicamento pa trata su condicion. E motibo mas grandi pakico nos kier bay afor awor ta pa simplemente prolonga su futuro, tanto bal mi keda na Aruba c’un ‘life expectancy’ di unicamente 8 aña. Pa logra esaki mi ta bezig ta spaar pa mi por muda pa Sweden. E cuido medico ta un di e mihornan di mundo pero bo tin cu biba eynan. Mi a haya un trabou caba y tambe tin un scol special pa pacient cu CF unda cu e ta net dilanti di hospital y nan por controla e muchanan den caso cu algo sosede. Nos calidad di bida lo cambia, paso na Aruba actualmente nos no tin un bida. Aki nos no por bay ningun caminda pa evita cu Winter wordo contagia cu algun otro malesa. E no por bay scol, e tin cu come cada 2 ora, nebulizer ta cada 4 ora, etc. Mi sa loke e futuro ta trece, mi ta wak con e malesa ta progresa. Mi ta forma parti di e comunidad online y bo ta wak con un mama cu awe ta papia di su yui y cu tur cos ta bon, di un dia pa otro bo ta wak cu su yiu no a make it…