For di hopi chikito mi tabata graba mi mes papiando na radio y ‘hunga’ television. Mi tabata bay den mi camber y haci manera cu e tabata un studio di radio y eynan mi tabata haci manera mi tabata locutando na radio”, asina Ivo Yanez, un di e celebridadnan mas stima na radio y television ta cuminsa conta Xclusivo Magazine, pa su entrevista di portada. Ela lanta na Sanicolas unda el a bai for di speelschool te cu Mavo na Sanicolas y despues a sigui pa Colegio Arubano na Playa. E tabata bayendo HAVO ainda ora cu el a sera conoci pa prome biaha cu e pasion profesional cu tabata domine for di chikito caba. E tabatin apenas 15 aña. “Mi tata, Igidio- Ido- Yanez (q.e.p.d.) tabata sa cu mi tabata gusta e mundo di radio y television y na entiero di su ruman homber (mi omo), e locutor Eddie Maduro(q.e.p.d.), a bin duna condolencia y eynan mi tata a puntr’e si un dia mi por bay conoce e studio di radio cu e tempo ey tabata radio Antillana 1270 am na Sanicolas. Eddie a duna o.k. y a bisami cu eta wardami e diasabra mainta 7’or na e studio. E anochi prome mi no a drumi”, Ivo ta conta na harimento bayendo bek na e tempo special aki. “Mi a yega e studio 6’or di mainta y mester a warda un ora pa drenta wak paden. Eddie tabata duna noticia mainta te cu 9’or. E dia ey e locutor cu mester a bin traha 9’or a meld ziek (min sa si ta casualidad of destino) pero Eddie a puntrami si mi kier toka so, sin papia. C’un smile na mi cara mi a bise cu si. Mi a toca asina bon cu nan a pidimipa bin e otro diasabra atrobe. Como cu mi tabatin 15 aña e tempo ey, mi no por a papia na radio pero asina mes mi tabata habri mic y papia. E reaccion cu mi ahaya di e oyentenan tabata hopi bon mesora te cu gerencia a dicidi pa dunami mi mesun programa den weekend. Asina mi a cuminsa na radio. Un aña despues cumi 16, mi a cuminsa tambe na television.

MI MESTER A PARTI UN PAPEL CHIKITO NA SCOL PA HENDENAN POR A SCUCHAMI


CREANDO SU PROPIO NOMBER

Si tin un cos cu Ivo ta resalta, aparte di su talento, ta su disciplina den loke e ta haci. Algo cu mirando bek, seguramente a cuminsa forma di añanan atras. “Mi a lanta den hogar hopi streng pero cu hopi amor, mi tabatin un bunita infancia y te awe mi ta gradici mi mayornan pa e educacion cu nan a dunami”. Su mihor recuerdonan? “Hunga futbol riba caya cu mi amigonan, cana bai tuma bus di scol. E comunicacion cu otro tabata mas personal pasobra no tabatin celular e tempo ey, dus e zundranan tabata sosede “bibo y directo”. Su dolor di mas grandi? E morto di su tata.“Nunca dimi bida mi a pensa di sinti un dolor asina fuerte den mi alma. Mi a realisa cu bida ta asina fragil y cu den 1-2-3, bo por perd’e. Mi tata tabata un homber super special kende danki na su manera ehemplar di biba, hopi bendicion a bin p’ami. Su morto tabata e dia di mas doloroso den mi bida. Mi a perde un tata un amigo un consehero di bida, mi a perde masha hopi mes cu su morto. Locual mi a keda cune ta su palabranan sabio
cu semper e tabata bisami. Mi tata tabata hopi streng y tabata gusta e cosnan cana straight. Mi mama tabata malcriami mas. Mi ta hopi gradicidona nan pa tur cos. Mi tata y mi mama a kere den mi e tempo ey, nan tabata mi prome oyentenan ya sostenemi semper, maske mi tata tabata bisa mi scol prome, despues radio. Mi ta gradicido na Eddie Maduro cu a dunami e oportunidad padrenta radio am. Albert Dieventaler cu a kere
den mi y cu a pone mi riba fm pa prome biaha na Radio Carina. “E tempo ey mi mester a parti un papel chikito na scol cu e orario di mi programa, diasabra di 9’or pa 12’or di merdia na 1270 am, pa hendenan por a scuchami”, e ta conta na harimento. “Aparte di radio, su programa na TeleAruba, Hubentud Si Por, tabatin un tremendo audiencia. “E tabata un programa den cual e scolnan secundario tabata competi cu otro cu weganan riba beach”. E momento cu Ivo su nomber a bira mas conoci tabata tempo cu el a cuminsa traha na Radio Carina f.m. “Mi no tabatin mester a parti papel mas pa keda scucha. Mi tabatin un programa di 6’or pa 8’or tur dia cual tabatin un sintonia masha grandi mes na Aruba. E tempo ey e jingle “Ivo tutu” y “Ivo waw” a nace. Eynan mi a cuminsa organisa diferente actividad pa hobennan. E tempo ey Canal90 y Radio Carina tabata competi hopi fuerte cu otro. Mi a keda un aña na radio Carina te ora cu Leoncita Arends di Canal 90 a yamami c’un oferta cu mi no por a nenga. Mi a cuminsa traha cu 17 aña na canal 90, e mesun orario cu mi yui homber tin awo y cu casi mesun edad.

ENTRETENE-EDUCA & INFORMA

Despues di 29 aña, no tin duda cu Ivo su carera ta uno traha riba un fundeshi solido y cu hopi hende ta considera como uno exitoso, algo cu e tin su mes un definicion di dje. “Exito p’ami ta ora den tur area di bo bida cosnan ta bai manera bo kier. Exito ta ora bo no ta biba cu rabia ni jaloezie pa ningun hende. Exito ta celebra bo bida tur dia”. Y ultimo aki ta un dicho cu ela agrega na su nomber; Ivo for life, celebrando bida tur dia, cual su oyentenan ta sinti nan mes identica cu ne. “Mi ta sinti cu tur dia mi ta haci hopi hende contento cu mi programa. Mi a y ta yuda hopi hende por medio di mi programa. P’ami esey ta e logro dimas importante, cu por medio di mi programa mi por duna bek. No tin un dia cu mi ta bay radio rabia of cu mal beis. Mi ta kere locual mi ta transmiti ta alegria y felicidad cu ta sali di mi curason. E oyentenan ta sinti esey y bunita di locual mi ta haci ta cu esunnan cu acuminsa cumi, ainda t’ey y hasta awendia mi ta haya hopi di nan yiunan ta scuchami. Mi a ripara tambe cu tin hopi mucha ta siguimi, kiermen mi tin un par di aña mas pa bai den radio y tv”, e ta bisa cu su sonrisa grandi di semper. Mi rol ta di entrene educa y informa. Mi tin diferente manera pa haci esaki. Depende e programa y e temporada. Por ehempel Carnaval mi programa di radio ta cambia y ta bira mas un programa cu ta informa pero toch c’un tiki pika den dje. Mi programa ta bira un plataforma pa hopi carnavalista ylidernan di grupo y musiconan trece nan precupacion dilanti. Bou Palo por ehempel ta un programa pa entretene pero toch cu su temanan controversial. Magia di pasco por ehempel ta un programa di musica informacion y paz”.

BIBANDO UN BIDA PRIVA DEN MEDIA

Como un figura publico, mas riba un isla chikito, privacidad ta algo cu casi bo por ta sigur di no tin. Ivo ta consiente y a siña biba cu esaki, esmas, e tin su propio formula pa haci esaki funciona p’e. “Mi oyentenan ta parti di mi bida y cu socialmedia, mi ta comparti cu nan, mi alegria, mi tristesa (ta hopi tiki danki na Dios) y mi exitonan. Mi siguidornan ta mescos mi famia”

E PRO Y CON BIBA DEN WOWO DI TUR HENDE?

E pro ta cu bo ta haci hopi hende contento por medio di mi plataforma cu ta radio y tv, mi ta pone hopi smile riba caranan tur dia. E contra ta cu tur hende tin un opinion over di bo bida sin realmente conocebo”, E ta bisa. Pa loke ta amigonan y e asina hopi comenta envidia den media Ivo mes ta cuminsa na admiti cu e mes ta un hende cu no tin hopi amigo. “Envidia semper tin, vooral si bo ta un persona publico bo por spera cu no ta tur hende ta bay gusta pa bo tin exito. Hopi biaha e problema no ta abo, e problema ta nan. Na cuminsamento di mi carera, e tabata un problema p’ami pero cu tempo mi a bira imune pa hendenan envidioso” e ta bisa c’un smile riba su cara. “Mi ta gusta viaha. Esey ta e momentonan cu mita considera cu mi por recharge y bin bek cu yen di energia pa sigui. Berdad mi trabou ta exigi hopi dimi pero asina mes mi ta saca tempo pa mi famia tambe. Mi dia ta cuminsa 9’or di mainta y ta caba 9’or or di anochi. Mi ta cuminsa prepara mi show parti mainta, bai mi meetingnan cu clientenan, 2’or radio te cu 5’or y despues preparapa noticia te cu 9’or”.

GUIANDO ZAYON

Desde 7 aña pasa, su casa Paola a ‘join’ Ivo den su trabou.“Mi casa tin e rol di mas importante den mi negoshi, practicamente e ta maneha turcos. For di dia cu e ta haci esaki, ta dilanti so nos a bay hunto. Ta e miho decision cu mi por a tuma”, Ivo ta bisa. Y e hecho di tin famia den e tipo di negoshi cu e ta haci ta precisamente loke awor ta tumando lugar cu entrada di su yiu Zayon den media. Algo cu pa Ivo mes no a mira inicialmente. “E tabata un sorpresa p’ami mes. Mi tabata den exterior ora cu mi yiu muher grandi amandami un video caminda Zayon ta imitami. Mi a haye asina bon cu mi a ‘post’ e riba facebook. Ora mi a wak cuanto reaccion su video a haya mia puntr’e si e ta intresa den media. Ainda e ora ey e no a mustra mucho interes, despues di algun tempo e mes a bisami cu si, e kier haci’e”. Ivo ta conciente cu e hecho cu Zayon ta su yiu ta dune un plataforma caba pero e ta bisa cu esey no tabisa tur cos; “Sigur e ta dune un plus punt, pero e tin su mesun estilo, talento y esey a hacie exitoso den asina tiki tempo. Y si un dia Zayon no kier haci esaki mas? “Lo mi sostene den tur desicion cu e tuma relaciona cu radio”. Su conseho pa Zayon y pa otro hobennan cu kier drenta den e media aki? “Sea bo mes semper, nunca bay imita un otro hende. Bo no por complace tur hende nunca den e mundo di media. Siña biba cu critica constructivo, esun nan destructivo no worry cunan. Purba ta consistente y cuida bo imagen”.

ZAYON SU MESUN ESTILO Y TALENTO TA HACIE EXITOSO, NO PASO E TA YIU DI IVO

ZAYON ON THE AIR

“Mi ta haya e mundo di radio cu television algo masha interesante mes y kier siña mas di dje. Tur dia bo ta siña algo nobo. E ta un trabou cu nunca lo bo fada di dje”, Zayon ta cuminsa splicando su trabou nobo awor como locutor na Canal 90. Aunke e ta yiu di Ivo Yanez, un locutor c’un trayectoria largo na Aruba, Zayon ta su mesun persona y cu su mesun estilo. “Mi ta concentra hopi riba musica nobo cu ta “in” awo. No tin ningun modelo internacional cu mi ta basa mi mes riba dje. Mi kier crea mi propio estilo. Pa loke ta audiencia, mi no kier enfoca riba hobennan so. Tur hende ta importante p’ami.” Y si ta un cos el a siña di su tata desde cu el a bay den aire ta disciplina, pues e sa cu prome cu e microfoon ey habri, e mester ta cla. “Mi ta prepara semper un ora prome cu cada show. Mi mes ta prepara mi musicanan y como cu semper mi a gusta musica, e parti ey no ta mucho dificil p’ami. Mentalmente mi tabata prepara un tiki caba. Lantando como yiu di un figura publico, for di chikito caba tur hende tabata conocemi como yiu di Ivo. Semper mi tata a bisami locual bo haci lo refleha riba mi bek esey a keda den mi mente te awe. Awor cu mi tin mi mesun programa, e la bira mas. Berdad cu como yiu di Ivo, mi tata ta un push enorme p’ami den radio, pero hunto cune tambe, e expectativanan ta mas halto tambe”.

FUTURO

Mi kier haci esaki mi carera pero pa awor, mi ta combina mi scol cu radio. E no ta facil pa combina tur dos, pero mi ta keda purba tur dos pa awo. E conseho mas valioso cu bo tata a dunabo te awor? “Pa mi ta mi mes y no bai imit’e. Pa mi crea mi propio estilo y keda humilde semper.

MENSAHE PA HUBENTUD DI ARUBA?

“Semper den bida lo bo topa cu hendenan cu lo purba descurashabo di bo soñonan, pero tene fe den Dios y kere den bo mes. Asina lo bo logra tur bo metanan. Nada ta imposibel den e bida aki si bo traha duro p’e.

IVO
Nomber completo: Ivo Octaf Bartholomeo Yanez
Edad: 44
Estudio: Mavo
Profesion: News&Radio Anchor
Role Model: Mi tata, Ido Yanez

ZAYON
Nomber completo: Zayon Ivo Yanez
Edad:18
Estudio: High school
Profesion: Student/Radio personality
Role Model: Mi tata, Ivo Yanez