EMBAHADORNAN DI UN MERCADO HOBEN CU HOPI POTENCIAL

Tanto Maurice – como Karim Neme no mester introduccion mas na Aruba. Conoci como e ‘twins-’ of ‘morochonan Neme, nan a percura di marca nan nomber cu cada evento exitoso y ‘out of the box’ cu semper nan ta bin cune na Aruba. Tur esaki desde un edad hopi hoben caba. E evento mas recien, Island Takeover, desde su anuncio September ultimo, a bin cu reaccionnan sumamente positivo unda e morochonan a uni cu Krish Mahtani di ELITE pa trece algo unico. Idea ta pa hunto bin c’un evento cu lo cubri 4 dia di ambientenan diferente y varia den 4 estilo cu artistanan grandi pa Aruba.

Con e team aki a logra keda crea? Simpel, colaboracion ta e forma cu nan ta mira esaki. “Island takeover ta e mihor di 2 mundo uni cu 1 mision; logra e mihor resultado. Krish cu nos ta bay hopi tempo atras, sigur mas cu 30 aña y e momento simplemente a yega awor pa nos a usa e infrastructura y network cu nos cada un tin, pa bin cu e concepto unico aki pa Aruba. Esaki ta unicamente e cuminsamento, tin hopi mas tras di e takeover aki”, Karim ta splica.

UN HISTORIAL APROBA

Bayendo bek den tempo, E prome evento local tabata na 1997, ora cu e morochonan, hopi mas hoben, a trece na Aruba e famoso DJ internacional, Tiesto. Pa e di dos vez cu Tiesto a bin Aruba, Maurice y Karim a dicidi di mercadea e evento aki pafor di nos isla y aki ta na unda nan a realisa e poder di eventonan local riba un nivel internacional. Avionnan priva a stagna e operacion di aeropuerto local cu fanaticonan di varios paisnan cu a bin pa disfruta di e concierto y di Aruba na mes momento. E lus a cende cu si, e ta posibel. “Aunke nos tur dos tabata semper pasiona cu musica y e negoshi di entretenimiento desde hoben caba, mayoria di esaki ta sali di nos mayornan. Nos tata a siña nos tur cos di bida y nos mama a bisa nos cu ya cu nos ta gusta sali asina tanto, dicon no haci un negoshi di dje? E bel a zona y ata nos aki, binti aña despues’, Maurice y Karim ta splica.

Na 2013, e duo a cuminsa cu EF-Electric Festival. Nan a cuminsa viaha rond mundo colectando concepto y ideanan pasobra tabata e momento pa crece e fenomeno di ‘dance music’ na Aruba. EF a cuminsa cu nan bon amigo DJ Chuckie y asina succesivamente cu cada evento, nan a logra crea e festival electronico mas grandi den Caribe. “E exito tabata obvio y esey t’e motibo cu el a continua tambe”. Cu añanan Maurice y Karim a sa di construi un tremendo reputacion y network solido den e industria di musica cu a haci cu e ta basta facil pa aserca nombernan grandi den e industria di musica y haya oido tambe. “Crea un marca global cu mas di 150 mil followers no ta algo cu ta pasa di dia pa anochi, e tin su bon y mal momentonan pero importante ta cu nos semper a keda inverti den nos marca. Mirando bek sigur e prome eventonan tabata esunnan mas emocionante pero cu e colaboracion nobo aki, nos ta mantene e ‘tempo’ y cu nos mira riba un futuro hopi prometedor.

TUR LOKE NOS TA HACI, NOS TA HACIE PA ARUBA

 

TARGET GROUP

Crea un evento normal caba tin su retonan di semper garantisa pero crea un evento c’un fin beneficioso pa e organisador-, partnernan y e lugar, den e caso aki Aruba, ta tuma hopi trabou, tempo y planificacion. “E ta hopi cla cu nos a logra atrae un grupo di turistanan mas hoben pa Aruba cu nos marca di EF cu ta conclui den un grupo di siguidornan leal den e comunidad internacional. Awor, colaborando cu ELITE PRODUCTIONS &ENTERTAINMENT ARUBA ta permiti ambos pa beneficia di otro treciendo miyones di dollar na potencial di compra di e turistanan ‘millenial generation’ aki, cu lo bin durante e evento di Island Takeover pa Aruba. Nos ta orguyoso di bisa tambe cu cada evento nos ta contribui bek na organisacionnan caritativo di nos isla. Mester semper duna bek”. Island Takeover lo ta di prome di November te cu dia 4 y lo cubri un weekend di concierto y eventonan cu no djis nomber di artistanan grandi, sino artistanan cu ta den nan top awor mundialmente. Un di esakinan sigur ta J. Balvin kende ta number 1 globalmente cu por ehempel posicion lider como e artista mas scucha riba Spotify, iTunes, You Tube, Shazzam y mas. Tambe e ta e artista mas pidi pa colabora cu otro artistanan mundialmente y pa Aruba, e hecho di a reconoce e talento di nos artista local Jeon, y traha cune riba varios produccion, ta haci’e mas special ainda. Otro nombernan grandi manera Bad Bunny, nos mesun Jeon, djnan Guy Gerber, Matthias Tanzmann, Serge Devant, Guti, Diego Teran, Jean Perez, Abril Love, Hanie Vainc, Rafa Moros y Dj-nan local. Por sigui desaroyo di e evento y pa compra di tickets riba www.islandtakeover.com.

CREA UN MARCA GLOBAL CU MAS DI 150 MIL FOLLOWERS NO TA PASA DI DIA PA ANOCHI

SEMPER CU ARUBA DEN MENTE

“Na e momentonan aki di nos bida, nos tur dos ta dedica na mehora e producto Aruba cu e hermentnan cu nos tin disponibel. Nos amigonan internacional ta yama nos embahador di Aruba pero nos ta simplemente usa nos network pa trece hendenan mas hoben pa nos isla. Pakico? Pasobra nos ta kere cu Aruba por probecha di e mercado aki, ta nan ta nos futuro.

Banda di entretenimiento, kico mas boso ta haci?

“Nos ta drey rond di varios otro experiencianan. Actualmente nos ta expandiendo c’un restaurant gourmet nobo cu lo yama LOLA TACO cual lo habri pronto. Esaki lo ta banda di CRAFT, nos coffee bar cu a habri dos aña pasa. Nos ta drumi laat y lanta trempan y como cu di baina nos ta drumi, nos ventures ta amplia di e ‘classic Horeca’ pa ‘commercial real estate developments’. Nos ta stima loke nos ta haci y no ta mira esaki como un sacrificio. Tur loke nos ta haci, nos ta hacie pa nos comunidad. Mescos cu nos abuelo a haci construyendo e prome hotel turistico pa Aruba na 1943, nos tin plannan grandi y serio pa continua cu e vision aki semper pa mehora Aruba cu conceptonan nobo y unico den e mesun sector aki. Nos ta fortuna cu tin suficiente hende cu tin gusto similar y ta gusta loke nos ta haci”.

ESAKI TA UNICAMENTE E CUMINSAMENTO, LO TIN HOPI MAS TRAS DI E TAKEOVER AKI