E MOTOR DINAMICO TRAS DI E DJ’S, ARTISTANAN Y EVENTONAN MAS ESPECTACULAR RIBA NOS ISLA.

KEN E TA?

For di hoben su pasion tabata musica, evento y entretenimiento. Cu 13 aña el a cuminsa como DJ cual te dia di awe ta su hobby y apesar cu na principio nan no tabata compronde mucho bon, su mayornan a apoye y te dia di awe e ta conta cu nan sosten cu ta hopi importante p’e. Produccion, evento, farandula, radio, maneho di artistanan y entretenimiento en general, tur esaki ta cai bou di locual e ta haci awor. “Tur dia mi ta lanta cu energia inmenso y ideanan nobo, asina grandi mi pasion ta pa locual mi ta haci di jong caba cu nunca mi a stop of desvia di esey”. Total e tin 20 aña den e mundo aki y Elite Entertainment tin 11 aña di existencia. Elite a cuminsa for di su principio cu e intencion di ta un player den e big league y c’un tremendo team su tras el a forma su mes den un entertainment powerhouse. Apesar cu tabatin otro negoshinan manera Elite, ora cu Krish a cuminsa y despues di dje a bin mas, grandi y chikito. Krish ta pensa cu Elite a logra establece su mes como cu e tabata innovativo semper. “Mi ta kere cu competencia semper ta bon y semper mi a kere den union, jammer cu tin biaha no ta tur hende ta pensa mescos, Elite semper ta dispuesto pa traha hunto ora mester”.

MESCOS CU J BALVIN A GUSTA E VIBRA DI JEON, E DEMAS ARTISTANAN LO NAMORA DI NOS ISLA SIGUR

 

ELITE, SKY IS THE LIMIT

No tin limite di locual Elite lo haci pa complace e cliente, the sky is the limit, e compania ta go the extra mile pa cada cliente, a yega di drenta requestnan basta loco of extremo, pero semper e team a trata na cumpli cu deseo di e cliente. “E sacrificionan di e tipo di business aki ta grandi, semper bo ta trahando, te hasta ora bo no ta na trabou, bo telefoon ta yen di yamada, mensahe of email cu mester haya bo atencion apesar di e structura y e tremendo team tras di e negoshi. Nos a cuminsa cu tres empleado y awendia nos ta na 40, asina grandi e ekipo y e negoshi a bira, semper pensando ideanan diferente y maneranan pa ofrece servicio di calidad na clientenan local y internacional”, Krish ta bisa. Apesar cu hopi ta pensa cu Krish por a cumpli su soño paso e ta bin di un famia cu lo por a sostene no matter what, e ta wak esaki diferente.“Mi ta agradecido na mi mayornan pa a brindami un bon educacion y a apoyami durante mi carera, pero mi ta kere semper firmemente den traha pa bo soñonan, soda pa nan y never give up. Mi deseo ta pa un dia ami por mantene mi mayornan mescos cu nan a mantene ami ora cu mi tabatin mester”.

E LO TA UN WEEKEND CU DIFERENTE ACTIVIDAD Y MUSICA DI DIFERENTE GENERO

ISLAND TAKEOVER

For di e momento cu el a miranan graba e video clip di Machika na Colombia, Krish hunto cu Jeon a pensa cu lo ta great pa trece un evento Aruba di calidad halto na unda pueblo por disfruta di J Balvin hunto cu Jeon. Despues di añanan colaborando cu tur tipo di festival y tambe concierto e necesidad di organisa su mesun festival, pero colaborando awor cu Maurice y Karim Neme di Electric Festival, incorporando genre y trends di pop culture cu ta popular rond mundo actualmente. “ Nos conose otro mi ta kere full nos bida, for di tempo nos a nace y cuminsa na International School of Aruba. Apesar di nos amistad, nos tin añanan trahando hunto y consehando otro riba evento y entertainment en general. -Amazing things happen when two worlds collide-. Pa locual ta e evento di Island Takeover cu nos lo ta hacienda hunto; e lo ta un weekend na unda e publico lo por disfruta di diferente actividad y musica di diferente genero manera Urban, Pop, Electronic y Latin durante tur e dianan cu tin riba e schedule. E reto mas grandi cu e evento aki ta trece cune ta cu mester organise y pone riba pia den un tempo basta cortico, pero c’un bon team y planning nada ta imposibel”. Den corto tempo Krish, como manager di Jeon, a logra sera conoci y tambe yega den contacto cu key players den e mundo di musica y entretenimiento, cual ta importante pa e desaroyo di un artista.“Di mesun manera cu J Balvin a habri porta pa Jeon, asina mas porta a sigui habri su tras”, e ta bisa.

SEMPER NOS A KERE DEN PROMOVE NOS ARTISTANAN LOCAL

ARUBA DEN SPOTLIGHT

E artistanan internacional cu lo ta presente durante e evento aki ta sumamente popular na e momento aki cu miyones di followers riba social media, nan solo presencia ta garantisa un media exposure grandisimo pa nos isla. “Mesun cos cu J Balvin a gusta e vibra di Jeon, e artistanan aki lo namora di nos isla sigur, ademas cu den e contract nos ta pone promocion di Aruba como un punto hopi importante”.

E evento ta conta cu e sosten completo di Aruba Tourism Authority, kendenan ta mira e balor di eventonan cu artistanan di e caliber aki y ademas a realisa e balor di e promocion cu Aruba ta haya desde cu nan a mira con Jeon a pone Papiamento y nos isla riba mapa mundial. E evento lo yuda pone un spotlight riba nos isla y su cultura den forma di servicio, hospitalidad, musica y cuminda. “Ami semper a kere den promove nos artistanan local y ora un porta habri otronan lo habri su tras p’esey mi ta gusta participacion di nos artistanan local y nos DJ nan den eventonan asina pa e publico local pero tambe internacional por sera conoci cu nan. E ta importante pa mustra Aruba su potencial pa organisa eventonan di e magnitud aki apesar di ta un isla chikito.

AMAZING THINGS HAPPEN WHEN TWO WORLDS COLLIDE

FUTURO

E intencion pa e prome edicion di e Island Take Over no ta pa genera ganashi, sino mas bien pa pone e “stepping stone” pa futuro edicionnan di e evento aki.“Hopi di e artistanan grandi aki ta comunica cu otro, nan ta comparti experiencia y contacto, e idea ta pa nan pasa bon na Aruba, disfruta y perform y asina nos por tin edicionnan den futuro cu si lo genera entrada y lo keda exitoso pa locual ta trata e talento cu lo presenta”. Tumando festivalnan grandi di exterior como ehempel, nan lo trata na crea un set up moderno y diferente pero cu ta keda cu e touch local y autentico. “Nos experiencia cu hopi festival prome cu esaki tanto na Aruba como den exterior ta haci cu nos sa precies kico ta locual nos kier logra y kico ta locual nos lo kier evita. Nos ta desea di crece den experiencia, coneccion y crea un plataforma pa Aruba pa crea eventonan grandi. Nos Arubianonan ta gusta gosa y pasa bon, ambiente y celebra bida, entretenimiento ta parti di nos bida”. Bo lo pensa c’un persona cu a logra asina hopi caba no tin nada mas riba su lista di metanan, pero esaki no ta e caso cu Krish, personalmente e tin hopi cos ainda cu e kier logra y profesionalmente tambe. Stay hungry! Su conseho ta pa traha duro y nunca give up: ‘trabou ta e clave paso sin trabou duro e magia no lo pasa nunca…