Juan Pablo Dominguez ta un hoben di 28 aña di edad, naci na Ciudad di Guanajuato, Mexico, Specialty Chef di Restaurant Al Pairo, un di e restaurant nan di “SOLAZ, A LUXURY COLLECTION RESORT” di Marriott na Los Cabos Baja California Sur (Mexico). Juan Pablo lo ta presente pa comparti su experiencia y su influencia Mexicano cu e comunidad di Aruba durante e Mexican Culinary Event organiza pa Marriott Aruba y cu lo tuma lugar dianan 31 di Mei y dia 1 di Juni di 2019 na The Lobby.

1 Kico specificamente tabata e motivacion pa drenta den e mundo culinario?
Wak mi omo cushina, e esfuerso y e storianan patras di cada plato cu e tabata cushina. Mi ta cord’e ora e tabata bay na e mesa pa papia cu e clientenan y scucha e clientenan bisa cu tur cos tabata excelente. Awo, loke mi ta stima y ta motivami ta bay tur e mercadonan di cada ciudad cu mi bishita, purba nan cuminda local, scucha e chefnan local y e storianan of tradicionnan di cada plato.

2. Bisa nos tocante ‘cuminda mestizo’ y tocante 13 cielos, di ken tabata e idea di e restaurant y tur e misticismo tras di e concepto aki?
Mestizo kiermen ‘mix’, ta e mix entre e hende nan local cu tabata biba den e caso aki na Mexico y e Spañonan durante e conquista. E Jesuita nan, e marine Spaño nan of e esclavo nan cu nan a trece; nan tradicionan, e cuminda cu nan a trece huntu cu esun cu nos tabatin caba, e tecnica nan pa cushina… Door di mix tur esaki, awo nos tin un di e mihor influencianan culinario na mundo, un cu hopi color, tradicion nan, specerij y aroma nan.
E restaurant tabata un idea di mi omo y dimi. Nos dos ta stima nos tradicionnan, nos raiz nan! Nos tabata pensa riba diferente nomber y nos a yega na e idea di “13 Cielos”, cual ta sali di mitologia Azteca.
E ta trata tocante con nos mundo a wordo crea, pues e tempo ey e Azteca nan tabata kere cu nos ta biba na un universo cu tin “13 cielo” y cu cada un di nan tin nan propio dios, pero ta na e di “13 cielo” ta unda cu e ‘Creador di tur cos’ ta biba.
Pesey, nos kier pa nos clientenan sinti cu nos ta hiba nan na e di “13 Cielo” cu nos receta nan tradicional y cu e receta nan innova pa nos mes.

3. Conta nos algun experiencia tocante con e receta nan aki a ser traha, e ingredientenan, e tecnica nan di cushina.
E inspiracion di e recetanan a bin door di biaha den algun di e stado nan di mas tradicional di Mexico manera Oaxaca, Puebla, Yucatan. Mi a bishita nan mercadonan local, tambe door di papia cu e chefnan tradicional di mi ciudad (Guanajuato). Lesando tocante nos tradicionnan, nos a tuma un tiki di tur ciudad y a mix e cu algun tecnicanan cu tin ‘trendy recipes’, aunke cu e respet cu tradicionan merece.

4. Ora boso bisa cu boso no ta cushina pa alimenta hende, kico ta loke boso ta desea di logra cu boso plato nan?
Nos kier alimenta e alma, nos kier impresiona… Cuminda boso ta haya tur caminda, pero hende awendia ta busca experiencianan nobo, ‘alimenta’ nan curiosidad.
Esaki ta nos trabou, pa alimenta nan paladar, yuda nan haya un experiencia culinario nobo fuera di lo comun.

5. Tin algun material cu no por falta den bo cushina?
Wow, bon pregunta! Mi ta considera mi mes un ‘old-school Millenial’, hahaha! Mi stima innovacion pero mi ta respeta e tecnica nan ancestral, dus, mi tin un ‘comal’. Esaki ta un planchi plat unda cu nos ta cushina of keinta e tortilla nan. Mi tin un ‘Tortillera’ cu ta esun cu ta placha e tortilla nan. Un ‘Molcajete’ cu ta manera un pilon, pero mi tambe ta encata uza e sous vide machine, e Josper grill-oven y e thermomix.

6. Bo tin algun ingrediente favorito?
Mi tin varios, pero actualmente mi ta mas den e Chilhuacle Chili. E ta un chili autoctono cu ta crece unicamente na cierto parti di Oaxaca, e tin un dushi sabor y normalmente e ta ser uza pa traha e ‘Mole Sauce’.

7. Ora bo sali come, kico ta algo cu bo ta evita pa order? y cua ta bo plato faborito?
Mi ta evita “boring food”! Mane sandwiches of plato nan comun, cu mi por haya experiencia nan nobo, plato nan inusual y unico.

8. Kico bo ta gusta mas di e mundo culinario?
E diversidad di e tecnica nan, e producto nan, e idea nan y por su- puesto, e pasion.

9. Kico ta loke bo ta gusta menos di e mundo culinario?
Mi no gusta ora hende no ta respeta e profesion di e Chef, ora hende no ta confia e chef y ta kere cu nan sa mihor cu nos den e ramo di cuminda.
Nos ta pasa mas cu 12 ora pa dia tras di candela, nos sa con pa traha y a haya un formacion pa siña haci nos trabou.
Mescos cu’n dokter, nos ta experto den cuminda. Trust your Chef!

10. Tin algun ingrediente cu bo ta nenga di uza?
Turtuga, dolfijn, tur sorto di bestia cu por ta den peliger di extincion.

11. Di tur e paisnan cu bo a yega di bishita, cua bo ta kere cu tin e mihor cuminda?
Semper mi ta pensa riba mi pais prome, mi ta stima cuminda Mexicano y mi ta kere cu na prome lugar ta Mexico, despues Spaña y India.

12. Cu cua plato bo lo sorprende un persona?
Cu un Mole Sauce, esey semper ta funciona. E tin hopi historia su tras.

13. Con bo ta tuma e reviews?
Semper mi ta preocupa pa mi clientenan, mi ta tuma nan reviews na un manera cu mi sa cu nos no ta perfecto y cu semper tin caminda unda nos por mehora. Mi ta tuma e reto di traha duro y mehora mi rendimiento.

14. Aruba tin hopi mata y flor cu ta ser uza den algun cuminda y bebidanan local, lo bo ta interesa pa crea algo cu e ingrediente nan aki?
Sin duda! Esaki lo ta mi prome biaha na Aruba y mi lo kier bishita e mercadonan y e restaurant nan local, asina mi por tuma parti di boso cultura y sigui cu mi ‘Mestizaje’.

15. Conta nos di bo plan nan pa futuro. meta nan na corto y largo plazo.
Pa awo mi ta traha na ‘Solaz A luxury Collection’, na un restaurant cu yama Al Pairo. E concepto ta un tributo na e marinirsnan cu a yega La Baja California y cu a crea un ‘mestizaje’ den e area aki. Mi kier sigui descubri Mexico, cada lugar ta yen di tradicion y asina mes, cu mi ta un Mexicano, mi no conoce algun di nos tradicionan.

Mi meta ta pa sigui educa mi mes, mehora y duna un tributo na tur e tradicionan aki, mi lo kier ta entre e 50 miho Chefnan y mustra kico Mexico tin pa ofrece na nivel di cultura y di culinaria. Esey lo ta mi meta na largo plazo.

Un mensahe pa e comunidad di Aruba:
Aruba, mi ta cla pa wordo ‘conquista’ pa bo tradicionnan, mi ta cla pa namora y crea platonan nobo cu tur boso productonan 
local,  flornan, fruta y veggies. Mi no por warda pa descubri Aruba den e biahe culinario aki! No perde e oportunidad di 
biba un experiencia puro, di purba algun di mi recetanan; esaki ta mi bida y mi raiznan!