KEN TA JOASIE

Ta pa hopi tempo caba nos bista y sigur bista di hopi hende ta riba un damita Joase-Ann van der Biest, conoci serca hopi como ‘Joasie’. Aunke prome bista ta mustra un mucha muher ‘up & top cu moda semper bisti, Joasie ta hopi mas cu simpel paña y make-up. Joasie ta realmente un persona hopi versatil y c’un curason mas grandi cu su mes. Despues di a caba su estudio na Hulanda y gradua como Trahador Social, el a bolbe su isla bek pa contribui unda awendia e ta traha den departamento di PR di Minister Otmar Oduber. Tabata durante un combersacion cu su amigo Michael Lampe ( Datapanik), a surgi un comentario cu tin hopi muchanan den necesidad na San Nicolaas, Joasie ta corda. “Michael a bisami; Tin muchanan hopi pober, pia abou, paña kibra y algun di nan cu te hasta nan cabei ta comi door di djaka. Ami ta un persona cu bo no por bisami e cosnan ey”, Joasie ta conta. Di biaha nan a cuminsa pensa riba diferente idea con pa yuda y manera semper unda tin cosnan di bon obra , Dios ta yuda. Asina e idea pa lanta un fundacion a nace.

UN CURASON GENEROSO

Joasie a cuminsa conoce otro hende cu e mesun mentalidad. Haciendo investigacion el a topa cu e informacion cu ta desde aña 1981 tin un investigacion andando tocante e prostitucion hubenil. Despues un amigo a bise cu tin muchanan ta prostitui banda di restaurant na Savaneta y asina poco poco el a bira mas conciente di e necesidad pa haci algo pa duna hubentud algo positivo pa haci. Durante un viahe na Hulanda, el a haya sa di un concepto yama Creative Theorie, cu ta usa arte como medio di terapia na muchanan, 5 disciplina: beeldend, dansen, drama, muziek y actividad fisico. “Di biaha mi a inspira pa traha metanan di mi plan basa riba e concepto aki. Bek na Aruba bek, mi a spaar tur loke mi tabata gana como presentadora di D Shop pa mi por a paga mi statutonan na notario y asina habri mi fundacion yama Creciendo”. E damita inquieto a busca sponsors cu lo por a yuda cu material y/of placa pa cubri e artistanan cu lo tin cu bay duna les na e muchanan. El a presenta e proyecto na Bureau Orthopedagogisch Centrum Aruba y haya reacionnan positivo. E prome proyecto di Creciendo tabata un exito, nan a haya 37 hoben, di cual ainda nan ta conta cu 18 activamente. “Realidad ta cu bo mester at least 3 luna pa ‘heal’ un mucha usando arte como un medio pa yuda e mucha emocionalmente pa e conoce su talento, para riba su mes pia y bay riba e bon caminda.

UN ACTO DI BONDAD Y CUALKIER OTRO COS CHIKITO CU BO HACI PA OTRO PERSONA SIGUR LO POR CAMBIA NAN BIDA

Nan por usa arte pa crece den bida. Nos ta con a cu nan lo keda leu for di droga y peligronan di caya”, Joasie ta splica. Tin varios hoben cu a logra encamina den diferente actividad positivo y hasta forma parti di e voluntarionan cu ta yuda cu e fundacion. “Mi ta desea di wak cu e fundacion por draai riba su mes, awo nos ta na St. Teresita na San Nicolaas, pero ideal lo ta cu nos por tin esaki den tur bario.

CRECIENDO….SIN STOP

Recientemente Joasie a bolbe pone su dede riba un otro bunita proyecto unda el a logra reuni mas cu 400 tas completamente yena cu materialnan di scol, pa muchanan kende nan mayornan no por paga pa esakinan. Un detaye chikito kizas pa un, pero grandi pa e muchanan aki cu lo no unicamente sinti nan mes aprecia pero mas cu tur, haya un motivacion pa duna nan maximo den nan aña escolar, cu tur beneficio pa nan mes. “Na Creciendo nos ta sinti cu e muchanan ta ricibi atencion negativo semper, pero nunca no ta pensa kico ta e motibonan cu e muchanan ta bira asina. E ora na lugar di lanta nan auto-estima, nos ta kibranan. Cu su curason social, Joasie e aña ‘ki mas cu nunca a duna contenido na e palabra ‘generosidad’ cu su causanan social cu e sa di a logra concretisa.