Dia 18 di September 2018, hunto cu presencia di Promer Minister, Minister di Cultura, Minister di Turismo y otro invitadonan Aruba su orguyo nacional Jeon a lansa “Aruba”. Aruba ta un cancion nobo cual ta un regalo di Jeon pa su isla. E meta di e cancion y e video clip cu a keda lansa ta pa pone cada Arubiano refeha riba nos raiz, corda unda nos ta bin y balora locual cu nos tin. E cancion ta wordo interpreta pa Jeon mes hunto cu Ritmo Real.

A scohe e sitio di Parke Arikok p’asina presenta e cancion y e video clip mirando cu e inspiracion pa e cancion a nace den e parke mes. Durante cu Jeon a subi riba sero di Jamanota pa promer biaha un par di siman, e inspiracion a nace. Esaki tabata na momento cu e tabata mira e paisahe unico cu nos Aruba ta ofrece. Jeon ta conta : “Mi a para riba e punta di mas halto y literalmente mi por a wak San Nicolas y mi por a wak Noord. Ami nunca a mira mi isla di un perspectiva asina”.

Den un mundo actual unda cu tin hopi stress, tension, presion y te hasta negatividad ta reina tur rond y cu consecuentemente ta afecta nos isla mescos tambe a nace un necesidad pa crea un modo di ‘reset’ por medio di musica. Cu e cancion “Aruba’ nos pueblo por refeha nan mes den forma di un ‘reset’ . Esaki lo yuda pa nos ta gradecido pa loke nos tin y corda unda nos ta biba y celebra nos cultura rico.

Loke ta remarcabel ta cu a usa e base di ritmo di wals den e cancion aki pero c’un toke moderno. Tambe a usa e instrument di Violin cual a wordo toca pa e talentoso Omar Kock. E cancion ta un composicion di Jeon, produccion musical di T Drick y director di Video Edward Silberie. E paisahenan bunita aki ta netamente loke nos por mira den e video clip tambe.