ARUBA SEMPER TIN UN LUGAR SPECIAL DEN MI CURASON

Diabierna 14 di October 2018, Cas di Cultura a celebra den grandi nan Concierto di Gala C100 cual tabata organisa na ocasion di e celebracion conhunto di 60 aña di Cas di Cultura y 40 aña di Departamento di Cultura. E tabata sigur un anochi magico unda un cantidad di talentonan local y internacional a presenta bunita variacionnan di musica y presentacionnan.

Un di e invitadonan special e anochi aki tabata Imara Thomas, cantante Soprano internacional desde Amsterdam kende a presenta pa prome biaha na Aruba. “Mi a sinti mi mes hopi stima y apoya riba e tarima di Cas di Cultura”, Imara Thomas ta expresa. Imara a nace y lanta na Hulanda c’un trayectorio largo su tras di musica y canto den diferente programanan di television y conciertonan rond Europa. Imara a lanta den un famia cu hopi talento musical cu semper a inspir’e, entre otro su mama Yvonne Thomas, naci na San Nicolas, Aruba cu descendencia di Saint Martin y Republica Dominicana. Bo por a semper haya Imara cantando tempo di su infancia. Su welonan y rumannan di su mama a tuma lesnan di piano clasico na Aruba, y su mama mes sra. Yvonne Thomas tabata conoci pa su stem grandi di Soul. Ruman homber di Yvonne Thomas, Ray-Anthony Thomas, tabata un cantante y escritor hopi conoci. Eynan tur hende por a mira caba cu Imara lo ta siguiendo e pasonan di su mama.

Un bida musical desde jong

Imara tin un trayectorio musical bastante largo y impresionante; Na edad di 10 aña el a haci su prome debut riba television den e programa ‘De Goedemiddag Show’ cu Jos Brink, despues na edad di 12 aña e tabata riba tarima di Amsterdam Promenade Orchestra na Doelen Concertgebouw pa e concierto anual di pasco, un di su prome presentacionnan exitoso. For di eynan, regularmente e tabata keda yama pa canta na eventonan di mucha y programanan di television. El a cuminsa scirbi cancionnan y graba na edad di 19 aña. For di su estudio y experiencia c’un di su mentornan Andre Rieu, diferente presentacionnan di Opera y recientemente c’un tremendo presentacion na The Voice of Holland, Imara ta sigui demostra cu su pasion pa musica ta uno berdadero y duradero.

Famia y musica

“Mi tanta tabata e prome persona cu mi tabata canta cune desde cumisamento di tur cos”, Imara ta conta. Imara tabata canta na misa regularmente cu su tanta na edad jong di 10 aña. Imara su tanta tabata presente tambe e anochi na Cas di Cultura hunto cu amigonan y mas familiar. Algo interesante pa remarca ta cu Imara a sinti un poco nervioso algun ora prome cu e presentacion na Cas di Cultura, caminda el a sinti e tabata casi perdiendo su stem. “Pero na momento di sound check mas despues den dia, manera mi tanta a cana drenta durante mi sound check mi stem a bin bek!”, Imara ta comenta na harimento. Asina hopi stimacion e tin pa su tanta. Imara a dedica e cancion di ‘Abo So’ cu el a canta durante e evento na Cas di Cultura specialmente na su tanta Gloria Connor-Thomas, y el a tambe dedica e cancion na Padu Lampe.

Imara: “Casi nunca como cantante bo ta yega na dedica un cancion na un compositor, pasobra mayoria no ta na bida mas. E tabata algo hopi emocional p’ami, e tabata un oportunidad pa mi presenta esaki como un regalo pa mi tanta, un presentacion cu a hiba mi bek den mi origen y cultura, hopi bunita.” Imara a bira asina emocional e anochi aki cu el a baha for di tarima pa bay baila cu su tanta, cual ta algo cu nunca e ta bay lubida. E ultimo biaha cu nan a baila hunto asina tabata na Zomercarnaval ora cu Imara a gana titulo di Carnaval Queen na 2005.

MI TA HAYA E IDIOMA DI PAPIAMENTO ASINA BUNITA, MI KIER HACI HOPI MAS CUNE DEN MUSICA

Diversidad musical y desaroyo di musica clasico na Papiamento 

Imara tin plan pa publica algun cancion cu musiconan di Aruba den futuro cercano. E tin algun proyectonan na caminda pa traha cu hoben y muchanan, como tambe un Opera na Papiamento, Ingles y Spaño. “Tin proyectonan hopi bunita na caminda pa Aruba”, Imara ta comenta. Fuera di haci su mesun conciertonan, Imara ta traha fulltime den e teatro di Opera na Alemania. Imara ta buscando compositonan y musiconan pa trece un bida nobo den musica clasico (crossover) na Papiamento, of combinacion di Papiamento y Spaño/Ingles Imara tin un conexion grandi cu e isla, su famia y den general cu e cultura Arubiano cual ta algo cu e ta bisa ta semper den su curason. “Mi ta haya e idioma di Papiamento asina bunita, mi kier haci hopi mas cune den musica”, Imara ta gradici Vicky Arens y director musical Jhonny Croes pa haci tur cos posibel pa e por a presenta su repertoir enorme cu e tin di Opera, Bolero, Pop y mas durante su bishita na Aruba.

“Mi ta desea hopi mas aña pa Cas di Cultura y mi ta gradici Departamento di Cultura pa por comparti mi storia.”