1 XCLUSIVO: Den ki bario bo a lanta na Aruba conta nos un poco di niñez?
G.LACLE: Ami a lanta na klip, Beatrixstraat. Mi niñez tabata hopi leuk,te cumi 9aña di edad ami y mi mama a biba serca mi abuela y abuelo, Sr. Chai Laclé. Mas amor mi no por a pidi of ricibi. Despues nos a muda pa Noord, un tempo pa Ponton caminda mi sera mi mihor amistadnan cu ainda ta existi.

2 XCLUSIVO: Ki scol bo a bay na Aruba?
G.LACLE: Ami a bai Rosario college y despues Colegio Arubano.

3 XCLUSIVO: Ki ta bo trayectoria den deporte na Aruba?
G.LACLE: Mi a cuminsa cu Kyokushin Karate na e edad di 3 aña. Desde mi 15 aña mi tabata practica Aikido cu a resulta den dos viahe pa aña pa Merca unda pa training camps serca maestronan Hapones.

4 XCLUSIVO: Cu ki edad bo a bay Hulanda y con e experiencia aki tabata p’abo?
G.LACLE: Mi a bai studia cu 20 aña. E tabata un experienca fantastico manera un aventura y un mision. Mi tio, Dr.Gregory Laclé tambe tabata biba na Hulanda y cu su guia mi a logra mescla mihor den e cultura Hulandes.

5 XCLUSIVO: Pakico bo escohe pa e estudio como Fysiotherapueta?
G.LACLE: Mi kier a bira chef incialmente pero mi no a gusta cu mi no por a interactua cu e clientenan. Despues di a sufri un lesion na mi lomba cu 17 aña practicando hip throws c’un persona di 100 kilo, mi a haya mi ta bay serca un Fysiotherapeut pa asistencia. Asina mi a dicidi cu mi tambe kier yuda otro hendenan y na mes momento, siña con e curpa humano ta funciona. Mi tabata sa tambe cu e conocimento aki lo por yudami den mi training di arte marcial.

6 XCLUSIVO: Con bo rutina den bo trabou como Fysiotherapueta ta na Hulanda?
G.LACLE: Mi a traha 14 aña na un hospital den hartrevalidatie, pijnteam(chronische pijnpatienten), Intensive care unit y otro klinische afdelingen pa yuda revalida pacientnan despues di diferente operacion manera heart surgery, total hip replacement, gastric bypasses pa menciona algun. Despues mi a traha un aña na un clinica cu ta specialisa den tratamento di problemanan di lomba y con pa deal cu e problemanan aki cu uso di gedragstherapie. Esaki ta un onderdeel di psychologie. Awendia mi ta tahando den particuliere praktijk unda mi ta trata rond di 15 hende pa dia cu tur tipo di probema fisico, di lomba pa rudia, enkel etc.

7 XCLUSIVO: Bo ta mira bo mes bek na Aruba den e funcion aki?
G.LACLE: Mi meta ta pa bin Aruba y usa mi experencia profesional pa por set up un centro cu por trata problemanan di lomba hunto cu otro dolornan cronico. Alaves yuda personan cu probleman di curason p’asina nan por tin un mihor condishon y calidad di bida.

8 XCLUSIVO: Na ki tipo di grupo bo ta duna les di Jiu-Jitsu pafor di bo trabou como Fysiotherapueta?
G.LACLE: Mi lesnan di Brazilian Jiu-Jitsu ta keda duna na adultonan, tanto como lesnan priva, -one on one-, como curso di defense personal pa damanan yama G-FENSE. Cu esaki nan ta siña con pa deal cu e atakenan mas frequente riba un hende muher. Hopi di mi studiantenan ta profesionalnan. Pa e grupo aki mi a crea un sistema pa train e tecnicanan cu menos risico pa haya lesion of wowo blauw yama Pro-Jitsu.

9 XCLUSIVO: Conta nos di e lesnan di G-fense cu bo ta duna?
G.LACLE: G-FENSE ta concentra riba e defensa di e atakenan mas comun y frecuente riba hende muher. E studiante ta siña usa su curpa na e manera mas eficiente y efectivo y ta keda siña con pa deal cu e psycologia di un atake. Den e lesnan, e tecnicanan ta wordo drilled te cu nan ta bira un refleho natural di e persona den cierto situacionnan. Den tur les, e tecnicanan ta keda getest bou resistencia y cu atakenan realisitico p’asina haci e training mas efectivo posibel.

10 XCLUSIVO: Di unda bo pasion pa musica ta bin y ki musica ta haci p’abo?
G.LACLE: For di chikito mi a lanta cu musica. Mi mama, tata y tio tabata envolvi cu musica. Mi abuela tabata canta tur dia na cas y na misa mi a cuminsa desaroya e interes aki mas ainda. Despues di scucha Guns and Roses, mi a rock ballads toca guitara na e edad di 10 aña, tumando les y practica tur dia te yega na lanta mi mesun banda di rock. Despues na edad di 17 aña mi a switch pa Flamenco. Awendia mi ta perform tin ora cu guitara canto of tur dos.

11 XCLUSIVO: Bo ta un tata soltero, con e experiencia aki a cambiabo como persona?
G.LACLE: E experienca prome y ora di bira un tata a ponemi pensa con mi por concentra mi energia, talento y abilidadnan pa por ta e mihor persona posibel y purba di ta un voorbeeld y educador pa mi yiu. Tur dia mi ta pensa con mi por haci mi yiu felis cu cosnan creativo manera weganan cu bala, pinta of just ‘hide and seek’. Dimes lightsaber battles paso hasta hungando sigura pa mi siñe algo cu e por usa pa defende su mes despues.

12 XCLUSIVO: Con bo ta parti bo tempo pa toch dedica tempo na educacion di bo yiu mirando cu bo no ta biba full time cune?
G.LACLE: Mi ta tuma un dia liber extra pa siman pa por pasa extra tempo cu ne pa educacion y haci cosnan leuk manera bai landa of bai un speeltuin, zoo of just cana den naturalesa.

13 XCLUSIVO: Bo tin un bunita relacion cu bo mama, conta nos di esaki?
G. LACLE: Mi mama a lantami como un mama soltera cu e sosten completo di mi abuela y abuelo. Nos band ta special pasobra mi ta reconoce tur e sacrificionan cu el a haci pa lantami. Mi a siña hopi lesnan di bida di dje y mi ta purba yude lo mas posibel pa e por realisa su metanan awendia.

14 XCLUSIVO: Bo ta soltero actualmente, bo tin tempo pa amor si/no, ki tipo di persona lo por horta bo curason y ki tipo di persona bo ta keda leu di dje?
G.LACLE: Mi ta soltero actualmente y mi interes ta pa disfruta di bida cu hendenan cu bon vibes, sea amigonan of un persona special. Un persona cu lo por horta mi curason mester ta cariñoso y cu aprecio pa mi arte marcial y mi musica. Por ta un dama artistico tambe. Hende cu actitud negativo of dañino mi ta keda leu for di nan.

15 XCLUSIVO: Bo ta sigui desaroyo na Aruba di serca? Ki ta bo impresion vooral den e mundo di deporte cu bo ta gusta
G.LACLE: Mi ta sigui e atletanan sigur via social media y mi ta hopi impresiona cu e rumannan Petrochi. Mi ta mira cu e comunidad Arubiano ta ‘embrace’ movemento mas y mas, den forma di core, landa of zumba. Mi ta hopi contento cu esaki ta wordo stimula mas y mas paso movimento y un dieta balansa ta e jabi pa nos salud.

 

“Mi meta ta pa bin Aruba y usa mi experencia profesional pa por set up un centro cu por trata problemanan di lomba hunto cu otro dolornan cronico”