GHOSTING NO TA ALGO NOBO. AMI MES A YEGA DI EXPERIENCIA ESAKI CU UN PAREHA CU MI TABATIN DEN PASADO. DEN E TEMPO EY, ESAKI NO TABATA ALGO HOPI COMUN Y PAMI E TABATA ALGO INCOMPRENDIBEL CU A AFECTAMI PA BASTA TEMPO. ESAKI A PONEMI INTERESA PA SA MAS TOCANTE E TOPICO AKI, CU MI KIER COMPARTI CU BOSO.

Pa esnan cu nunca a experiencia esaki, ‘Ghosting’ den contexto di relacionnan romantico, ta nifica kibra tur contacto y desaparece for di bida di bo pareha of e persona cu bo ta date, sin duna ningun splicacion.

Esnan cu ta haci nan mes culpabel na Ghosting ta focus primeramente ariba nan mesun incomodidad emocional y nan no ta pensa ariba e otro persona y su sentimientonan y e efectonan cu Ghosting por tin pa su estabilidad emocional. E gravedad di e dolor cu Ghosting ta causa, ta depende hopi di e seriedad di e relacion, y locual a wordo priminti of e ilusionnan cu a wordo alimenta na ambos banda.

CONSECUENCIANAN DI GHOSTING PA E VICTIMA:

  • Confusion inicial: Purba compronde dicon kizas e no tawata tin chance di contesta: Kizas e ta malo, ta hopi druk cu trabou etc
  • No sa con pa reacciona: Tin motibo pa worry of mi ta exagera? Bolbe mande un text? Bel e of miho warda pa e mes tuma contacto?
  • Cuestiona su mes: Dicon mi no por a ripara cu algo no tawata bayendo bon, of: Kiko mi a bisa of hasi fout?
  • Sentimiento di tristeza y desesperacion
  • Sentimiento di rabia, desapunte, perdida
  • Sentimiento di a wordo irrespeta, di ta deshechable
  • Sentimiento di a wordo uza of tuma como joke
  • Sentimiento di no a wordo aprecia/balora
  • Sentimiento di a wordo ganja of traiciona
  • Resentimiento di largo duracion

Ghosting ta similar na e duna un persona ‘the silent treatment’ un tactica cu sa wordo mira door di profesionalnan den field di cuido mental como un forma di crueldad emocional. E ta haci cu e victima ta keda den un situacion na unda e no ta haña e oportunidad pa haci e preguntanan of ricibi informacion cu por yude procesa e perdida di e relacion of e persona. Ghosting ta stroba e victima tambe di vocifera su desacuerdo of disgusto y di expresa su emocionnan. En corto, e victima ta wordo priva di su necesidad emocional pa haña ‘closure’. E preguntanan cu ta keda surgi den su cabes ta keda sin contesta y ta keda bin back, strobando e persona pa ‘move on’.

Den e era digital, Ghosting ta birando algo mas y mas comun. Ta hopi mas facil pa ‘unfriend’, ‘block’ of keda sin contesta un text di e persona, cu enfrenta e persona su reaccion na momento cu bo bise cu bo kier termina e relacion of kibra contacto cune. E hecho di conose un persona ‘online’ ta haci cu no tin contacto personal, locual ta duna e ilusion erroneo cu lo tin menos consecuencia si bo desaparece for di e persona su bida, cual ta wordo mira mas bien como un bida ‘virtual’ y no real.

Importante pa corda, ta cu ora un hende Ghost bo, esaki ta bisa mas di su persona cu dibo. Esaki kiermen cu e persona aki no tin e curashi ni madurez pa establece un relacion serio cubo. Ta importante pa acepta y procesa bo emocionnan, pero zorg pa esaki no afecta e balor cu abo tin di bo mes como persona ni e potencial cu bo tin pa duna y ricibi amor. No priva bo mes di un mihor futuro door di sera bo mes pa un otro oportuidad.

 

Desiree Swaen 
Certified Professional Coach