E TA IMPORTANTE PA TRAHA DEN TURISMO, PASO TE AINDA TURISMO TA E PILAR ECONOMICO DI ARUBA

HUMBLE BEGINNINGS

Su memorianan mas bunita ta di un famia enorme, hunto y uni, 11 ruman, lanta den e dushi districto di San Nicolas. Tur caminda nan tabata cana na pia, semper hunto, tena Baby Beach. Mi mama mi ta corde den cushina, trahando cuminda, bolo of pan of labando paña. Su mama ta un “rock of a lady” y su ehempel pa sigui bai dilanti den bida. Como mama e mes, Filomena semper a traha den restaurant, oranan hopi duro y esaki ta bai na costo di oranan cu e por a pasa cu su yiunan. Na 1970 el a cuminsa traha den F&B na momento cu el a conoce su difunto casa, na 1973 nan a habri nan prome restaurant/ disco na Alemania y na 1984 nan a habri nan prome restaurant na Aruba. Mi a sacrifica hopi pero mi a zorg pa mi yiunan lanta cu respet, disciplina y semper importante tabata pa por lo menos un biaha pa dia nos come hunto na mesa. Cada yiu el a pone studia, pero nunca a forsa nan den niun direccion, el a laga nan sigui e direccion cu nan mester bai y nan pasion y pesey awe cada un di nan ta exitoso.

UN NEGOSHI EXITOSO

Filomena su casa tabata e experto den restaurant y yudando e den tur cos e mes a siña tur aspecto di e restaurant business. Tur cos mester a wordo haci na man e tempo ey, awor tur cos ta cu computer pero aunke e trabou tabata mas duro, e hendenan tabata mas facil pa traha cunan. Filomena a pasa momentonan dificil ora cu su casa a fayece, su yiunan tabata hoben y cu otro idea con pa traha, pero como e semper a yuda su casa cu tur cos e tabata sa kico pa haci.
Un dia mi a atende un reunion di mi yiu Daniele, unda el a bisa e trahadornan cu en berdad el a studia Horeca & Business, pero su mayor scol ta su mama y su tata y cu no tin placa pa paga e estudio ey. Esaki tabata e momento cu Filomena a dicidi di step back y laga su yiunan take over, pero semper banda di nan, ora nan mester di dje e tey.
Awendia Gianni’s Group ta dirigi 7 restaurant, 4 gelateria y 1 beach bar. Despues cu Daniele a tuma over, nan a tuma e decision hunto pa consolida tur cos bou un solo number.

400 EMPLEADO MEHORANDO TUR DIA

E mision personal di Filomena ta pa mehora y keda mehora. Esaki ta keda valido paso semper nos mester keda studia nos funcion y nos negoshi, no solamente dokternan ta keda studia sino tambe commerciantenan avispo!
E ta importante pa laga e generacion nobo tuma over na un cierto momento, nos tur tin nos momentonan di gloria, Filomena ta splica, y ta importante pa sa ki ora ta e momento pa step back pa laga e siguiente generacion tuma nan lugar, semper bou di un bon wowo. Locual ta haci un persona exitoso ta cu e mester gusta locual e ta haci, e mester ta positivo y nunca give up y e mester sigui explora den su trabou pa mehora.
Gianni’s ta conta awor cu 400 empleado y e desafionan mas grandi ta pa haya empleado cualifica pa e trabou. E ta importante pa traha den turismo, paso te ainda turismo ta E pilar economico di Aruba.

INVERSION DEN ARUBA Y DEN LAZO FAMILIAR

Filomena y su famia lo sigui inverti den Aruba siguramente. Aruba ta nos roots y nos pais y nos lo ta expandiendo den otro direccion pafor di F&B.
E ta pensa y mira cu Aruba su turismo a cambia durante ultimo añanan, e cantidad di turista a subi, pero e calidad a baha desde cu e Venezolanonan no tey mas, cual ta haci cu e industria a cambia y e desafionan pa e industria tambe.
Filomena ta kere cu ta importante pa relaha y disfruta di bida, e ta gusta bai gym y pasa tempo cu su famia. Un biaha pa aña mi ta bai vakantie cu mi 4 yiunan pa nos bond mas cu otro. E reglanan mas sagrado pe den su negoshi ta confiansa y Dios!

CONSEHO PA E MAMANAN:

”Kere semper den bo yiunan”.
“Manda nan studia y laga nan scohe locual nan ta desea di studia”.
“Apoya bo yiunan den tur sentido”.