1. XCL: Na unda bo alanta y di ki tipo di famia bo ta bin?ET: Mi a lanta prome na Playa, unda nos tabata biba na cas di mi difunto welo y wela. Despues nos a bay biba na Noord, y eynan mi a keda te cu awor. Mi ta bin di un famia Arubiano uni, cumi mama y tata y un 2 ruman grandi.
  2. XM: Kico ta e recuerdonan mas great cu bo tin di bo infancia y hubentud?  ET: Un di e cos nan mas cu mi ta corda di mi infancia ta mi welo, Freddy Saladin y mi wela, Emma Saladin, kendenan awor no t’ey mas. Nan tabata “malcria nos” hopi. Despues cu nos a bai biba na Noord, nos tabata keda na mi bisabuela, unda cu mi tabata hunga futbol pafo cu mi ruman y achter prima.
  3. XM: Unda bo a bai scol y ki tipo di studiante bo tabata? ET: Mi a bay Reina Beatrix School cu ta un basis school y ora ma caba basis mi a bay Juliana School Mavo, mescos cu mi ruman. Mi tabata let op basta den klas y haña bon punto cu ta hopi importante, paso si un dia algo pasa mi y mi no por sigui cu mi sport cu mi ta stima cual ta futbol, mi mester tin un diploma den mi man pa mi por haya un bon trabou.
  4. XM: For di ki tempo bo a cuminsa hunga futbol? ET: Wel prome cu futbol mi ruman y ami tabata bai karate. Pero despues di un torneo, nos a bisa nos mayornan cu nos no kier a bai karate mas. Mi carera den futbol mi a cuminsa cu mi 8 aña.
  5. XM: Cual tabata e teamnan cu bo a hunga pe na Aruba y kico tabata bo posicionnan? ET: For di ora ma cuminsa te cu awor mi a hunga pa Bubali, nunca mi a cambia di team y nunca mi lo kier a cambia, mi a crece na Bubali y ta eynan mi lo kier keda hunga. Mi a cuminsa prome den defensa y mas despues mi a bira un medio campo.
  6. XM: Pakico bo ta gusta e wega aki asina hopi?  ET: For di ora cu mi a cuminsa hunga ma gusta hunga futbol y ta paso mi por expresa mi mes riba veld cumi amigonan y pasa pret.
  7. XM: Con bo ta haya cu futbol por improve na Aruba? ET: Wel lo ta mas miho si tur club tin veld di yerba, pero ya porta e no ta posibel financieramente, pero esey lo ta hopi miho, tambe lo ta hopi miho si e coachnan na Aruba lo tin diploma di entrenado.
  8. XM: Cual ta bo teamnan favorito internacional y tambe bo hungadornan favorito? ET: Mi club favorito ta Barcelona , p’ami e ra e miho club di mundo. Y ora ta tempo pa mundia cu weganan internacional mi tin mas c’un team favorito cual ta: Brazil, Argentina y Spaña. Mi hungadornan favorito ta Lionel Messi y e tambe ta mi idolo, Andres Iniesta y Neymar.
  9. XM: Kico ta bo rutina pa mante-ne bo mes riba nivel di training y tambe pa keda desaroya bo skills? ET: Well mi no tin un rutina special, mi ta sigui mi trainingnan normal y tin biaha train riba mi mes.
  10. XM: Con bo a wordo aserca pa hunga den exterior?  ET: Mi a bay hunga un torneo cu seleccion di Aruba U-15 na Merca y eynan ami y tres hungador mas a wordo gescout. E otro tres hungadornan ta Moises Castro, Kyle Budhu Lall y Xander Wouters. Despues di esey nos a wordo aserca door di Martin Koopman, cu ta e Technical Director na AVB, kende tabatin e contactonan necesario pa bai core stage na Hulanda. Nos cuater a haña oportunidad pa core stage, Moises Castro y ami a bay FC Twente, den luna di februari, den winter. Durante nos evaluatiegesprek a keda bisa na nos cu si nos no mester a bai Aruba bek, nan lo a tuma nos di biaha. Despues di un siman cu nos a bin bek Aruba, FC Twente a bisa cu nan tabata kier nos pa 3 luna, pero nan team den Eredivisie a degrada y e ora nan no por a tuma nos mas. Den luna di augustus nos a ricibi e grato noticia cu FC Twente a aceptami, pa motibonan financiero nan por a tuma 1 di nos dos y mi ta hopi agradeci pa esey y mi lo demonstranan kico tur mi tin aden y cu nan no a hasi fout pa dunami e oportunidad pa ta parti di nan team di U-17.
  11. XM: Cu cual team y cual parti di Hulanda bo ta bai hunga? ET: Mi ta hunga pa FC twente y cu ta den e stad Enschede den e provincie di Overijsel. E weganan ta tuma parti den diferente stad di Hulanda.
  12. XM: Kico ta bo soño y kico bo lo kier logra cu bo deporte?  ET: Mi soño ta pami por bira un futbolista profesional y yega Barcelona. Mi lo kier logra yega na e team nacional di Hulanda tambe.
  13. XM: Con bo ta spera cu e storia di bo carera como atleta lo inspira otronan cu lo kier yega leu den e deporte na Aruba? ET: Mi ta spera cu mi storia lo ta un bon inspiracion pa tur e muchanan eyfo cu lo kier sobresali den nan deporte y algun dia lo yega nan meta.
  14. XM: Con bo a prepara mentalmente pa e move pa Hulanda?   ET: Den luna di Juli aserca door di “Latin-Caribe Sports Foundation” pa bai haci un otro tryout na Hulanda, mirando cu no a tende nada mas di FC Twente. Mi a bai pa un luna Hulanda y mientras cu mi tabata aya a ricibi e noticia di FC Twente. Nan tabata kier pa mi a keda di biaha, pero mi no tabata cla pa esey. Mi a bai Aruba bek pa un siman y pa asina dispidi di mi famia y amigonan. E no ta facil pa bai laga tur cos atras, bo famia, amigonan, bo pais pa bai biba na un otro pais cu otro cultura, pero ora bo tin un meta bo dilanti y si bo kier logre, mester ta para fuerte den bo sapatonan y tuma desicionnan dificil pa despues no regret.
  15. XM: Kico, ademas di skill y talento, ta haci un hende cu ta hunga futbol un bon futbolista?  ET: DISCIPLINA, mi ta haya cu pa bo yega leu den un sport bo mester tin disciplina, respeta bo coach, tende kico nan ta bisabo, nan no ta bisabo nada pornada, nan t’ey pa siñabo pa bo bay mas dilanti p’asina bo por progresa den e deporte cu bo ta practica. Mi ta haña tambe cu bo mester ta humilde, aunke porta e no ta haci bo e miho hungador, e ta haci bo un miho persona y mi ta haña cu pa bo ta un bon hungador, bo mester ta un miho humano prome.

ET: Mi kier a gradici prome nos Señor Dios, mi mayornan Aimée y Elvis Tromp, paso danki na nan mi a cuminsa hunga futbol, nan a hibami na mi prome training y tur e otro nan despues pa mi por a crece den e sport aki. Mi ruman grandi Dylan Tromp. Semper nan a support mi den tur mi weganan. Bubali Sport Club y tur e coach nan cu ma haya durante tur e aña nan cu ma hunga pa nan, kende nan a kere den mi y a dunami e oportunidad di por demostra semper, tambe den otro categoria mas halto cu mi mes categoria, unda cu den e ultimo aña mi tabata hunga den 4 categoria, cual tabata U-15, U-17, U-21 y hoofdklas, unda cu mi a debuta ya cu mi 15 aña. Na mi teammates, cu kende mi tin solamente bon recuerdo. Señor Buchi Panama cu kende mi a hunga for di mi 11 aña den su seleccion di U-13 y e coachnan, principalmente Richard Vermeulen. Arubaanse Voetbal Bond, cu a dunami e oportunidad di por a hunga pa mi pais den e seleccion di U-15. David Abdul y ASA. Reinhard Breinburg, pa a prepara nos pa e prome stage na Hulanda. Martin Koopman cu danki na dje mi ta tambe den e team di FC Twente. Ik zal je eewig dankbaar zijn. Steve Escalona y Raymond Baten di “Latin-Caribe Sports Foundation”, cu tambe ta begeleid mi awo den tur loke mi tin mester na Hulanda. Y tur otro familiaresnan y amigonan cu semper a bin apoyami durante wega.

MENSAHE:

Semper keda traha duro pa loke kier logra, paso bo nunca sa un dia bo lo por haña un chens mane ami a haña y bo lo mester aprobecha di e oportunidad ey. Keda studia, keda train y sigui semper den e bon caminda, cu disciplina, respet y fe den Dios, tur cos ta posibel.