Marcie (38) a nace na Aruba y a biba aki te cu su 5 aña y despues a emigra cu su mama y tata pa Hulanda. Eynan el a haci su educacion basico te cu 5de klas y e famia a bolbe Aruba. Aki el a haci 6de y despues Mavo. Su hubentud tabata dushi y normal cu su mama y tata y un ruman parti tata. “Mi mayornan semper tabata t’ey pami y mi no tabatin falta di nada, nan a siñami kico ta bon y malo. Como teenager Marcie tabata hopi verlegen. Pero el a nace cu e talento pa baila y despues di a drenta e grupo di baile Xanadu Dancers cu a dune e oportunidad pa show su talento, su verlegenheid tiki tiki a kita. “E tempo di duna show aki aya tur siman tabata gewoon un mundo cu mi tabata stima ora mi tabata teenager paso mi tabata sintimi hopi comodo ariba un podium. E periode di MAVO si no tabata uno facil p’e paso el a pasa den cosnan dificil entre otro e perdida di su tata ora e tabatin 14 aña.“Mi a logra caba mi mavo cu steun y push di mi mama y a kies pa bay bek Hulanda”, e ta conta. Marcie a bay Hulanda den 2001 y a cuminsa studia SPW 3 na Leiden y despues a cambia di scol pa bay Den Haag y a caba su studie. “Mi a experiencia hopi cos cu a siñami bira mas fuerte den bida y cu por ponemi para riba mi dos pianan y lucha pa mi mes”. Bolbe Aruba despues di e experiencia di biba riba su mes na Hulanda no tabata facil, pero Marcia a siña custumbra y drecha cosnan di su mes pa e por ta e mihor version di su mes. Sin sa, tur e factornan cu el a pasa den su bida tabata preparando Marcie pa e rol mas grandi den su bida…bira mama di su yiu Kitai.

KITAI

Kitai no tabata un baby planea pero si hopi desea pasobra esnan cu conoce Marcie sa cu e ta poni riba e mundo aki pa ta un mama. “Mi a warda te mi di 2 zwangerschaps test pa mi ta sigur pa mi conta mi mama. E tabata un shock y alegria den uno”. Marcie su famia ta grandi y hopi uni, poco poco nan a conta e resto di famianan y djey e alegria a cuminsa crece. “For di mi embaraso caba mi tabata un mama soltero paso cu tur sinceridad, e tata no tabata t’ey casi y masha tiki tempo prome cu Kitai nace, he was gone”. Esaki ningun dia a kite di sigui padilanti pasobra Marcie ta splica cu su mama a siñe pa para riba su dos pianan y esey ta loke el a haci te dia di awe. El a escohe un bida mas saludabel posibel pa su baby por nace den bon salud di curpa y den su alrededor. “No ta tur cos a cana facil pero mi a haya hopi sosten di famia, amigonan y vooral di grupo Rejoice cu a bira tambe un famia pa Kitai y mi mes”. Apesar cu nunca bo por prepara completamente pa un baby, segun Marcie, e instincto di un mama ta yuda hopi ademas cu e tabatin e ‘back up’ tambe di su estudio trahando cu mucha di 0 pa 13 aña.

KITAI – UN MUCHA CU TALENTO

Kitai su opa tabata musico y Marcie ta sinti cu e tin un tiki di dje den Kitai. “Tambe mi ta den un Gospel Group cu yama Rejoice y naturalmente Kitai den barica tabat’ey ora di train y un baby ta scucha hopi desde e momento ey caba”. Despues cu Kitai a nace, e tabata bay training cu Marcie y na cas of riba caya ora e tabata intrankil pa algo, Marcie tabata canta kinderliedjes p’e. E cantamento tabata calme y tabata pone brabbel hopi manera cu e kier a bisa algo. Ora el a cuminsa papia y siña cosnan e tabata ripiti masha hopi mes y ripiti e kinderliedjes cu nan tabata canta p’e como tambe e canticanan di Rejoice. “Un dia un di e miembronan di Rejoice a bisami den un joke,“mande pa canta dande no?” Ami di nooooooo y despues di e joke, e cos a bira serio y t’e cu Kitai a gana e competencia di dande 2 biaha”. Despues a bin e idea pa lag’e bay canta festival. Prome Marcie a pensa cu mihor no, pero despues cu nan a convence pa mira e talento di su yiu el a dicidi pa just bai p’e, lage gosa y wak kico ta pasa. “Awe Kitai tin total 3 titulo. 1 di campion y 2 di 2do lugar cu nos tur ta super contento cune”. Kitai djis gusta canta y e ta un mucha asina social cu tur hende cu e topa ora di train of competi contra dje, p’e tur ta su amigonan.
Tanten e gusta y Dios sigui brinde cu e talento ey Marcie ta bisa cu e lo sigi te caminda por.

SU ALEGRIA TA PA HENDE BIN WAK E Y GRITA Y BATI MAN P’E

DISCIPLINA

Locual pa Marcie ta importante, mas cu gana, ta pa Kitai su uitspraak ta corecto y duidelijk y pa e sa e ritmo bon. E tin un structura fiho con e ta traha cune pa e sa esakinan pa ora e bay na e trainer esaki por traha mas facil cune. Kitai ta bay les di musica y eynan tambe e ta siña cosnan cu por yud’e den su bida di cantante. Kitai ta hopi disciplina y e mes ta pidi pa e tende su cantica ora e sa cu e tin cu bay competi. Kitai su enfoke no ta pa gana, sino riba e “ regalo” cu tin ora e canta bon. “Su “regalo” mayoria biaha ta bay come pizza y hunga cu su amigonan. Ora di competencia of djis tin cu perform e ta keda puntra 100 biaha ki ora e tin cu subi”. Miedo pa podium Kitai sigur no tin.

“Den mi experiencia como bailarina, cantante y mama di un cantante mi tin cu bisa jammer genoeg, cu mi a experiencia algun mayornan cu ta forsa nan yiu. Tur mayor kier pa nan yiu logra algo den e bida aki. Pero ta hopi importante pa sigui bo yiu su curason y no forse. Tur mucha ta bon den algo y no ta tur ora e algo ey ta kom tot uiting na chikito y mester lage test diferente cos. Tampoco paso e gusta baila of gusta canta of gusta hunga baseball kiermen e ta bon den dje. Bo por mande les pa e por mehora den dje. E prome biaha participando na dande, Kitai a puntrami: Mami tur hende ta bin bati man p’ami? E no tabata compronde di premio, su alegria ta pa hende bin wak e y grita y bati man p’e. E ta masha kaweta y su wowonan ta tur caminda, gana of perde e ta cana cu su smile”. Ora Marcie puntr’e si e kier canta, e ta puntra pa competi of gewoon? Paso den su cabes e sa cu si e tin cu competi, lo bin training cu ta hoor erbij y cu lo tin menos hungamento.

“Ami nunca a kere cu e lo gusta canto, mi a kere e lo kier siguimi den baile y bay dansschool. Si un dia e lanta y Dios a mande un otro direccion pa e test un otro talento, why not? Basta e ta algo sano p’e y lo mi sostene e den dje”.

UN BERDADERO “MOMAGER”

“Hopi cos mi ta haci mi mes paso mi ta un poco perfeccionista y mi kier t’ey tur caminda cune”. Pero Marcie ta keda un single mom cu no por parti su mes den 2 dus e tin su famia y famia di Rejoice cu ta val in ora cu e no tin otro opcion. Como single mom, pa Marcie ta importante pa semper traha cu e budget cu e tin, apesar cu semper tin hende cu ta cla para pa yuda caminda cu mester y ta aporta na nan locura di Kitai su bida di artisa.

Un ehempel ta su pañanan cu el a participa cune, tur tin un toke di obra di man cune of recycla, paso e ta di opinion cu si ta algo di cultura of ya cu ta algo di talento, dicon no uza un persona cu tin e talento pa traha algo na man? Pa composita y aregla, no ta tur ora ta barata pero e ta sinti cu Dios ta stime paso tin luna cos ta krap pero tur ora el a logra y nunca lagando debe atras. Kitai su tanchi Suki ta regale su canticanan. “Den mundo di musica tin bon y mal hende, pero ami tin e suerte cu Dios a mandami hopi bon musico, areglista cu a yuda semper na un manera cu mi por costia”.

Den corto tempo den mundo di canto cu Kitai, Marcie a experencia hopi cos caba. Pero Marcie ta un persona cu ora e wak maldad e ta keda leu di dje y ta siña su yiu pa haci mesun cos, kizas te hasta purba encurasha e persona pa haci bon.

Futuro 

Marcie su deseo ta pa Kitai haci su best na scol y crece y bira mas sabi. Pa e respeta y wordo respeta y pa e biba un bida 
saludabel y pa tur su necesidadnan keda cumpli. Y pa semper e gradici Papa Dios pa tur cos. “Mi ta haci mi best pa 
cumpli cu tur cos den su bida cu mi por, actividad na scol, su lesnan di canto y mi kier pa e keda mucha pa awo y 
keda biba den e mundo di e edad cu e tin. Kitai ta mi bendicion,
mi Alegria di tur dia. 

TITULONAN TE CU AWOR

  • Ganador absoluto di dande Categoria (4-6 aña) den 2017 y 2018.
  • Ganador di festival “ Un canto pa nos Himno y Bandera” 2018 (4-6 aña)
  • 2do lugar di festival “ un canto pa nos Himno Himno y Bandera
  • 2do lugar den Christmas festival dec 2018. (4-6 aña)