E AMOR PA CARNAVAL

Potretnan cu ta sigur entre su mas aprecia poseshonnan ta rebiba awe e prome pasonan di Queeny Bergen den Carnaval bailando riba un carosa cu apenas dos pa tres aña. “Mi mayornan semper a participa den carnaval y for di chiquito tabata hinca mi rumannan cumi den dje”, asina Queeny ta cuminsa comparti cu nos, e recuerdonan multilple y di mas intimo y special p’e cu carnaval di Aruba. “Mi ta corda mi mama (qepd) tabata traha show pa reinanan y tabata lagami baila hunto cu mi amiganan den esakinan of tabata lagami compañe y wak con e tabata train e reinanan grandi y hubenil manera Katy Arends, Darienne Arends, Deyanira Frank, Melony Paesch, Mayrene Helmeyer y hopi otro reinanan mas. Cu aña e tabata hasta lagami traha choreografianan hunto cune of riba mi mes”. Como famia por bisa cu Queeny a experencia carnaval den tur aspecto unda hasta un di su rumannan homber a bira Pancho Infantil di Aruba su Carnaval na aña 2006. “Otro factor tambe ta cu semper mi tabata wak Tia lienchi di serca cu Grupo Champagne cu cua grupo mi tabata participa pa hopi aña y serca ken mi por a experencia e adrenalina y pasion grandi cu e tin pa su grupo”. Finalmente, cu su pareha Krish Mahtani cu a cuminsa cu su mesun grupo y cu e peticion di ayudo pidi na dje, Queeny a dicidi pa accepta e reto y duna un man. “Pa bisa berdad, mi no tabata sa e momento ey ainda, kico tabata sperami” e ta bisa na harimento.

E MUHER TRAS DI EMPIRE

“Despues cu Darren van Ommeren a asercami, mi a sinta hunto cu mi pareha y asina nos tres a combersa. Idea tabata pa tin un hende poco mas jong y innovativo na cabes di e grupo di Empire; un cara nobo. Asina nan a logra convencemi, mi a pensa Why Not! Mi mester agrega cu mi no por a haci esaki sin e team cu mi tin band’i mi. Mi semper ta kere hopi den teamwork den tur proyecto cu mi a haci. Y mester bisa cu e team di Empire ta uno solido y nan tur a acceptami man habri for di cuminsamento y te cu awe, nos ta trahando hunto y hasta birando un team un poco mas grandi cu prome”.

DESAFIO & RETONAN

Tempo…,tempo ta e reto di mas grandi pasobra maske bo cuminsa un aña prome, semper e tempo ta bay lagabo y no ta algo cu bo por pidi bek. Semper mester mas tempo pa planea, decora, bestel cosnan, pa cose paña y asina bo ta sigui bay. Tambe no ta semper tur cos ta bay manera cu bo ta desea. Mester siña bin cu solushonnan y tin hopi pasenshi pasobra ta cu hopi hende bo mester por comunica y nos tur sa cu no tur ora esaki ta algo facil. Tin cosnan tambe cu por pasa specialmente durante paradanan cu ta for di bo control y eynan ta unda mi ta kere e team di Empire semper a sa di t’ey pa yuda otro y yega na solushonnan hunto. Keremi, e cos mas dificil ta pa durante paradanan mantene e espacio entre seccionnan, massa y banda paso na momento cu parada cuminsa, tur hende kier baila y saca potret y esey ta haci cu e parada no ta cana manera mester ta. Y cu esaki, e tarea duro pa seguridad, bar team y road managers sin lubida polis ta cuminsa.

FOR THE LOVE OF CARNIVAL

FINANCIERO

Ta gana placa?
Mi tambe a kere cu bo ta gana placa cu grupo di carnaval pero den mi experiencia mi por bisa jammer genoeg cu no, pasobra ta hopi trabou, ora y energia bo ta hinca compara cu e placa. Mi a realisa den e dos añanan aki cu e ta puro “For the Love of Carnival!” Pasobra kico cu bo gana, esey ta si bo logra gana, ta bay bek den e paradanan den e team, cede, debe etc

Kico e ta costa?
Financieramente mi por bisa cu e ta costa rond 100 mil florin pa por pone Banda, Sonido, Equipo, Bar, Costume, Trailers etc. Carnaval no ta nada barata. Pa locual ta e balor no financiero ta cu berdad bo ta aportando na nos cultura y turismo. Puntra bo mes, si nos no haci’e, ta ken lo haci’e?. Si compara antes cu awor no tin mes hopi grupo ni mes hopi reinanan mas. Dus tur cu t’ey ainda of cu a bin awor ta contribuyendo imensamente pasobra e trabou su tras no ta nada facil y ta e gruponan ta pone cu tin paradanan pa esnan para na banda, incluyendo nos turistanan, por wak y gosa di dje.

ORGANISACION CLAVE

Un organisacion por traha solamente si bo tin un bon team y bon comunicacion pasobra un persona so no por ‘make it happen’ of mihor bisa, no na e manera cu ta desea. Den Empire nos tin por ehempel Rocio Burgos cu ta mi ‘right hand’ den tur aspecto. Nos tin e Team di Cede cu ta hinca oranan y hopi esfuerso y energia den Empire dia aden dia afor esta Monica, JR, Shahayra y Herrick. Shahayra alavez ta controla nos costonan financiero p’asina wak kico mas nos por haci y ki ora tin pa para keto. Nos tin nos ‘road managers’ Darren, Carty y Sheralda cu ta nos ‘key players’ durante parada, nos tin nos propio social media Queen Clarissa cu semper ta ‘broadcast’ tur nos “important info” cu e aña cu ta bin lo representa Empire como nos Sra. Carnaval. Y mas cu claro tur e voluntarionan cu ta yuda traha den bar p’asina por aporta y yuda nos participantenan pa nan por disfruta di nan paradanan.

CARNAVAL Y SU POLEMICANAN

Mi ta kere polemica semper lo tin, paso e ta un temporada cu tur hende kier duna nan opinion na e manera cu nan ta kere cu ta corecto y ta lubida cu tur informacion y opinion cu e ta berdad of no, e ta sali pafor via social media, radio, screenshots, voicenotes etc. Mi ta di opinion cu si algo no ta na bo agrado of no a cana manera ta desea ta o.k. pa bin cu ideanan y solushon, criticanan constructivo tanten cu tin respet pa otro nan trabou, tempo y sentimento. Mi manera pa “steer clear” ta pa nos grupo concentra pa nos haci nos best, pa nos ‘have fun along the way’ y pa nos tin bon comunicacion cu otro, semper cu respet.

TEMPO TA E RETO DI MAS GRANDI. MASKE BO CUMINSA UN AÑA PROME, SEMPER E TEMPO TA BAY LAGABO

SUGERENCIA PA FUTURO

1. Mi ta kere mester mas hende jong pa join e gruponan, pa yuda trece ideanan nobo y innovativo pa yuda kita e peso of mihor bisa comparti e peso cu Carnavalistanan cu no tin e mesun energia of fantasia mas.

2.Companianan mester cuminsa inverti den carnaval manera tabata pasa antes. Pasobra hopi hende kier participa hopi kier yuda engrandece nos carnaval pero financieramente no ta haci mescos.

3. Mester concentra mas riba e experiencia pa e turistanan pa nan tin mas facilidad pa participa y tambe bay mira e paradanan. Mi ta kere cu e tres puntonan aki poco poco nos lo por yuda engrandese nos Carnaval.

TEMA PA CARNAVAL 65 – 2019

E aña ki nos ta bay cu e thema di “65 Years of Greatness” elogiando e gruponan grandi di antes por ehempel un Tivoli, Caribe, Coastal, Dream Team y tambe elogiando e gruponan di awor. P’esey nos Massa lo representa Neon Celebration paso apesar di 65 Aña di Aruba su Carnaval, Empire Carnival Group lo ta celebrando su prome lustro. P’esey nos a scohe pa e aña ‘ki bay poco mas grandi y tin dos banda; nos house band Buleria y tambe Musical Time cu ta un legend band sigur pa Aruba.

E MAS DUSHI DI CARNAVAL
E tres paradanan grandi cu ta laga bo cu lomba dobla, pia hincha hahaha, no tin nada mas dushi di ta aden manera e cantica ta bisa. Keremi e ‘feeling’ ey ta gana tur cos y tambe ora bo wak na nal e grupo completo yen di ambiente y tur hende pasando bon, e ta lagabo sinti satisfecho cu cierto sacrificionan y decisionnan tabata ‘vale la pena’

COMPANIANAN MESTER CUMINSA INVERTI DEN CARNAVAL MANERA TABATA PASA ANTES

MENSAHE
Pa esnan cu ta duda si participa of no, Do It! You won’t regret it. Pa esnan cu ta admira e paradanan na banda,
disfruta di e paradanan sin problema sin haci dimas y no lubida di aplaudi e participante y reinanan ora nan
pasa paso no tin nada mas dushi di baila den bo kostuum cu bo a traha asina duro p’e y sinti e aprecio pa esaki.
Un publico grandi yena cu ambiente cu ta goza cu bo ta e feeling di mas dushi. Semper corda cu ta nos tur hunto ta
yuda engrandece Aruba su Carnaval.