INFANCIA Y MOTIVACION

Chris a bay St Franciscus college na Madiki y a lanta den e bario di Madiki Kavel. “Locual mi por corda di mi niñes ta cu mi tabata hunga hopi pafo”. Gran parti di su hubentud el a pasa asina y esaki ta un di recuerdonan mas bunita. Despues di basischool, el a bay Colegio Arubano, ongeveer e tempo ey tambe el a biba un gran parti na Sero Blanco serca su tata.“Na 2003 mi a muda bay Hulanda pa sigui cu mi estudio. Chris a escoge su estudio ongeveer durante e ultimo aña na Colegio Arubano. “Mi tabatin duda di locual cu lo a pas cumi, pero na final mi a escoge pa studia medicina”. E motivacion mas grandi tabata e hecho cu un bon amigo di dje (Clayton Jacobs q.e.p.d) a fayece di cancer. “Esey tabatin un impacto masha grandi mes riba mi persona y desde e momento ey mi a dicidi di enfoca riba medicina cu e ideologia pa yuda hende”.

ESTUDIO Y DESEO DI BOLBE SU ISLA NATAL

E hoben (34) a studia na Amsterdam y e ultimo parti di su specialisacion el a haci na Rotterdam. “Mi a gradua cum laude como dokter na 2010”. Despues di un periodo ta haci onderzoek y trahando den medicina interno, el a scohe pa specialisa den gastro-enterologia. “E partinan mas agradabel di e periodo como studiante ta e hecho cu bo ta make it happen. Bo ta crea un grupo di amistadnan rond dibo, bo ta enfoca pa haci un sport anto bo ta biaha den Europa y conoce otro paisnan y otro cultura. Mientrastanto, bo ta traha pa haal bo estudio, sera e capitulo ey y refleha riba kico ta sigui. Semper mi a puntra mi mes den bida unda mi lo kier ta aki 3 aña y cu esey den mente mi tabata concentra riba mi siguiente meta. Durante e periodo como estudiante hopi cosnan a pasa cu ta hopi memorabel, tur ta un experiencia apart. Mi ta kere nos tur cu a haya chance pa studia mester ta masha agradecido pa esaki”.

Chris tin un famia grandi cu ta masha ‘supportive’ mes di otro y e ta contento di a conta cu nan apoyo semper. Su mama y su tata semper a apoye di tur manera cu nan tabata por, pero e semper tabata un persona hopi independiente y cu su metanan su dilanti semper el a traha pa logranan. Factornan externo of otro influencia nunca a logra desvie di su proposito, semper e tabata hopi dedica. Su deseo semper tabata pa bolbe Aruba y contribui cu su pais”. “Aruba su cultura y hendenan ta core den mi adernan.

Mi ta stima mi isla y e hecho cu mi famianan ta aki tabata un di e rasonan tambe mas grandi pa bolbe anto yuda mi pais. Tambe e ta desea pa su yiu tin mesun infancia cune.

E CALIDAD DI UN DOKTER NO TA DEPENDE SOLAMENTE UNDA EL A STUDIA

UN BON DOKTER

Pa Chris, locual cu ta number uno como medico ta un bon comunicacion y empatia. “Nos como dokter ta trata cu hende den un situacion masha delicado paso e ta toka nan salud. Un hende cu ta malo ta hopi delicado y den mayoria caso nan ta bay un dokter c’un problema dificil. Tur pashent merece e trato cu abo lo kier pabo sernan keri y c’un principio asina den mi wowonan tur dokter mester traha”. E ta pensa cu locual ta haci un medico un bon medico, no ta solamente estudio, sino caracter. “Mi ta un hende c’un caracter fuerte y locual cu mi kier logra, mi lo lucha pe. E ta un hende cu no por cu desigualidad. “Ban pone asina, cu mi lo hinka mi man de candela pa mi pashentnan”.

E tema di dokternan studia den region cu no ta ricibi trato igual cu esnan studia na Europa of Merca pa Chris ta un tema hopi complica. Den su opinion e calidad di un dokter no ta depende solamente unda el a studia.

“Di un banda mi ta compronde cu tur dokter mester por traha riba mesun nivel pero e parti mas importante con bo ta keda cu bo accreditashon. Bira dokter ta algo, pero con bo ta zorg pa bo keep bo mes updated den beneficio di bo pashentnan. Mi mes tin mi ideanan con algo asina lo por wordo efectua, esey lastimamente mi no por splika den corto”. Su anhelo ta pa den futuro nan por traha conhuntamente cu e dokternan den region pa yuda subi e nivel y calidad di cuido na Aruba.

DESAFIONAN GRANDI DEN MEDICINA

E diferencia mas grandi cu el a experencia den cuido medico entre Hulanda na unda e tabata traha y Aruba awor ta structura. “Mi tin un impreshon cu falta structura den hopi proceso. Tambe mi ta wak e diferencianan den e populashon di pashent y nan enfermedadnan.

Medicina tin hopi desafio pa sobrepasa. Na nivel mundial ta pa combati e epidema di obesidad y tur e problemanan cu ta bini cu esey.

Pensa tambe por ehempel riba e remedinan super caro cu hopi paisnan no por paga y e desafio mas grandi mundial ta zorg pa e remedinan caro ey yega paisnan cu menos recurso. Na Aruba nos problema tambe ta refleha e problema mundial. Nos obesidad y lifestyle ta e problema mas grandi cu nos tin actualmente cu ta mustra di lo sigui bira un problema grandi den e futuro sercano”.

BIDA COMO PROFESIONAL Y FUTURO

Tin biaha e por ta dificil pa combina un carera exigente cu bida personal, siguramente ora bo ta den un periodo druk. “Mi ta aprecia masha e ayudo, comprencion y steun di mi pareha y ora mi tin tempo nos ta pasa quality time cu otro y nos yiu”. Chris ta contento con cosnan ta bayendo actualmente, apesar cu algun cos chikito por cambia ainda. “Mi ta bezig ta purba regel riba tur nivel e calidad di cuido pa nos pashentnan den e specialismo di gastro-enterologia y cu transcurso di tempo mi ta kere lo mi cambia mi enfoke pa ‘tackle’ e siguiente reto den mi caminda.

E ta sinti tremendo pa ta bek na Aruba laborando como medico. “Mi ta contento pa ta bek den e seno familiar y cu mi por eherce mi profesion riba mi dushi isla Aruba. Mi sa cu tin hopi cosnan cu por keda cambia pa mihor, pero mi ta pensa ‘one step at the time’. . .