E SISTEMA DI MONTESSORI TA YUDA CADA MUCHA ALCANSA SU POTENCIAL ACADEMICO Y POTENCIAL SOCIAL

INTRODUCCION

Carol a crece na Ierland y ta bin di un famia di 5 yiu den e “countyside”. E ta e di 4 yiu y den nan cas tabatin musica, cushinamento, bestianan di cas, y hopi actividad tur dia. “Mi mayornan ta bin di un epoca na unda estudio no tabata un prioridad, mi tata mester a stop su scol cu 12 aña pa e por a yuda provee pa su 7 rumannan y mi mama, siendo un hende muher, no a haya oportunidad pa studia despues di 17 aña y despues cu el a casa, e tabata obliga di give up su trabou”. Su mayornan tabata desea un otro futuro pa nan yiunan y nan nietonan y p’esey den nan hogar educacion, musica, cuido di animal, y stima otro tabata hopi importante. Su tata a fayece ora cu e tabatin 12 aña y su omo a bira su mentor. El a consehe pa studia ley, p’asina e por a compronde su derecho y responsabilidadnan den mundo. Como su mentor e tabata purba guie pa e por tin un bida moral, felis y liber. “Asina despues di a gradua di scol secundario mi a studia ley na Galway y despues mi a bai haci un master na Maastricht, Hulanda, sigui pa un PhD den ley, tambe na Maastricht”. Pa e tempo aki e tabatin 2 yiu. Na momento cu el a descubri e sistema educativo di Montessori, el a realisa cu esaki lo tabata un carera nobo p’e y e approach di educacion cu e lo desea pa su yiunan. Carol a biaha for di Aruba pa e Montessori training center na Minnesota p’asina obtene su diploma di maestro elementario di Montessori den 4 aña. Carol ta particularmente orguyoso di e momento cu el a defende su PhD den ley na Maastricht, no pa su mes, sino pa e hecho cu e por a comparti e momento aki cu su mama, kende a traha henter su bida pa ofrece su yiunan un mihor futuro. “Esaki tabata e “culminacion” di mi mama su carera, un testimonio na su dedicacion pa su yiunan. E tabatin e mesun sentimiento di orguyo ora cu el a gradua como docente di Montessori, solamente cu su mama no tabata t’ey mas pa compartie cune, paso el a fayece 1 aña prome.

Carol y Yolandie ta encarga na guia e muchanan di dialuna pa diabierna. Carol ta maneha e parti na Ingles y Yolandie esun na Hulandes.

PAKICO BIRA UN DOCENTE

E hecho cu e ta bin di un famia cu 5 yiu a siñe hopi cos cu e ta aplica awendia den su trabou.“Apesar cu mi mayornan tabata desea pa tur nan yiunan caba un estudio academico, algun di nos tabata mas talentoso den den musica, como entrepreneurs y otronan como mayor. Nan tur a lanta den mesun cas, cu mesun amor y mesun oportunidadnan,pero cada un tin nan rol di hunga den bida y cada rol ta importante. Esaki ta algo cu mi a siña y a yudami hopi, naturalesa ta poderoso, y con nos ta wordo lanta y guia ta yuda of stroba nos naturalesa di desaroya. E conocemento aki ta algo cu a yude hopi den su preparacion como docente. Despues di a descubri e sistema di Montessori, Carol a tuma varios paso, incluyendo studia e filosofia di dje, observa e programa existente na Aruba, na Hulanda y na Ierland y traha y studia como docente pa esaki. Na 2017 el a lansa e Montessori schoolhouse aki na Aruba y ta den su segundo aña academico. Manera tur proyecto nobo, e schoolhouse tambe tabatin su desafionan. E no tabata un proceso facil pa yega na unda e ta awor. Na aña 2014 caba Carol a purba set up e school. “Mi a funda e fundacion, mi a cumpra tur material, habri un cuenta na banco y tabata tin tur e “groundwork” pa cuminsa, pero e no a resulta, debi na problemanan cu ubicacion”. E momento ey tabata dificil pero Carol a dicidi di termina su estudio y bai traha na Universidad di Aruba pa yuda set up e programma di student exchange cu Erasmus. Asina cu e programma ey tabata cla y canando exitosamente, Carol a dicidi di sigui cu su plan pa set up e scol y e biaha aki den 6 luna tur cos a “fall into place”, location, studiante, staff… “E ta dificil pa bisa con duro e tabata pa habri e scol, el a costa hopi sacrificio personal, tempo, fe y confiansa, placa y dedicacion, e lo ta un understatement pa bisa cu e tabata dificil”.

MONTESSORI TA IDEAL PA MUCHANAN CU TA BIN DI FAMIANAN CU TA APRECIA CU CADA MUCHA TA UNICO

E MISION

E mision di e Montessori Elementary Schoolhouse Foundation ta pa provee muchanan di edad elementario cu un ambiente di estudio respectuoso na unda cada mucha su proceso di siñamento natural ta wordo encuracha y sosteni. Esaki ta basa riba e sistema di Montessori pa yuda cada mucha alcansa su potencial academico y potencial social. “E sistema aki ta ideal pa muchanan cu ta bin di famianan cu ta aprecia cu cada mucha ta unico y kier pa nan yiunan wordo sosteni y guia den nan desaroyo academico, social y emocional pa alcansa nan potencial completo”.

E DIFERENCIA

E sistema di scol Montessori ta ofrece hopi mas cu solamente academics, e ta ofrece un ambiente bi/lingual, practical life skills (e muchanan ta take care di snack y di lunch pa henter e communidad tur dia) y tambe un ‘approach hands-on’ na siñamento cu conceptonan abstract riba materianan concreto siguiendo e filosofia di Montessori. Tempo y espacio ta wordo duna pa siña e fundeshi di ta un miembro di un communidad democratico, responsabel y respetuoso, na unda tur hende tin un voz, na unda empatia y compasion y yuda otro ta guianan principal y unda siñamento academico ta wordo inculca.“Nos comunidad escolar ta un ambiente na unda muchanan entre 6 y 12 aña ta studia banda di otro, ta yuda otro, siña di otro y basicamente ta forma un comunidad pafor di e ambiente escolar pa sostene otro riba tur nivel y ta crece hunto”.

E sistema ta respeta cu cada mucha tin cu cana nan desaroyo academico, social y emocional na nan mesun forma y den nan mesun tempo. “Cada un di esakinan tin un balor hopi profundo den e mucha su desaroyo y cada un tin cu wordo desaroya pa crece y bira un hoben estable y capable. Pa bo ta un profesional of academico exitoso, pero no tin abilidad social of emocional ta reduci e valor di di bo conocemento academico”.

Den un klas Montessori, e nivel cu e mucha ta aden no ta determina nan balor personal, nan no ta wordo husga dependiendo di nan abilidad of velocidad pa domina un cierto materia.“Nan progreso ta wordo balora y no solamente e resultado final. E muchanan ta sinti nan mes orguyoso di nan abilidad y nan deseo di siña, contrario na sinti orguyo di un cifra cu no necesariamente ta representa cu el a compronde e materia”. E exito di e scol ta depende di e exito di cada mucha individualmente. Cada mucha ta wordo ricibi cu e abilidadnan cu e tin na cada comienso di aña escolar y nan ta wordo siña lesnan nobo y encurasha pa desaroya y practica e habilidadnan y nan progreso ta wordo observa y registra durante e aña academico. E rol di e guia ta pa sostene e mucha pa incrementa su abilidadnan, alcansando asina e nucleo academico, mientrastanto alcansando tambe nan potencial riba nivel personal. Ora e scol mira cu cada mucha por demostra un incrementacion gradual, den e diferente areanan aki, e ora e sistema ta un exito.

“Den terminonan practico nos ta presenta un report dos biaha pa aña na e mayornan cual ta reporta progreso y e dominio di materianan comun y desaroyo general di e mucha, relaciona cu e punto di referencia di cada grado escolar”.

UN DIA NA MONTESSORI

E dia ta cuminsa entre 7:30 cu 8:00 am cu yegada di e muchanan, na unda nan ta cuminsa prepara e espacio, cuminsando cu e set up di e snack y area di cuminda. Pa 8’or e muchanan a scohe locual nan ta desea di traha riba dje durante e prome fase di e dia, sigui pa un periodo di 3 ora na unda nan ta traha den e grupo cu nan ta scohe, con largo cu nan ta scohe riba cada materia. Mientras tanto e maestronan ta invita e muchanan pa pasa serca nan pa duna instruccion individual riba cada materia, e maestro ta observa y e ta notula, nan ta yuda resolve problema y discuti temanan di importancia e alumnonan. Pa 11:15 am e muchanan cu a yuda prepara lunch ta invita e otronan pa come pafo y despues hunga pa 1 ora. Pa 12:15 e muchanan ta haci e cushina, e area di hunga y unda nan a come limpi y nan ta bai back paden pa traha pa un segundo tempo di 2 ora. Normalmente durante esaki tin un orario di lesa na Ingles of Hulandes y mientras e muchanan ta traha e maestronan ta invita e muchanan pa pasa serca nan pa practica locual nan no ta domina bon. Pa 2:30 scol ta termina y e muchanan ta haci e klas limpi prome cu nan bai cas. Un biaha pa siman nan ta haci un ora di gym les. Actualmente e scol ta ricibi muchanan di edad entre 6 pa 12 aña, klas 1 t/m 6. Tin un deseo serca hopi mayor pa sigui cu e sistema di educacion di Montessori den voortgezet onderwijs. Ehempel exitoso di scol secundario Montessori exitoso tin hopi, por ehempel na USA y na Hulanda, cu ta sigui sirbi pa e desaroyo academico, social y emocional di e muchanan ora nan bira adolescente. “Expansion na e momento aki tanto di nos programa elementario como tambe e introduccion di e programma secundario lo rekeri mas docente entrena den e sistema di Montessori.” E plannan ta pa expande e cantidad di docente prome cu considera e expansion di e scol.

Ora un studiante bandona e sistema escolar di Montessori y mester drenta un scol “tradicional” e cambio mas grandi ta cu e studiante mester alcansa e rekerimento academico di e scol. “Aunke nos no ta test e muchanan na Montessori, nos ta observa y nota nan desaroyo den cuadro di e exigencianan di educacion academico basico cu nan mester domina na cada edad”. Nos ta duna e mesun materianan cu educacion tradicional, pero na un manera diferente y na e nivel di e mucha su abilidad y capacidad pa compronde na cada fase di su desaroyo. E cambio semper lo ta duro, pero e parti mas duro ta pa bai for di un sistema cu ta balora bo forma di siña individual na un sistema di “one size ts all”. “Apesar di esaki e mester wordo bisa cu e muchanan cu a ricibi un educacion basico na un Montessori sa con pa duna cada emocion su lugar y tin e abilidad pa papia y expresa su mes na un adulto encuanto cualkier problema y nan sa cu nan ta den posicion pa trece cambio”.

PA BO TA UN BON MAESTRO BO MESTER TA COMPLETAMENTE PRESENTE CU E MUCHA Y SCUCHANAN

SER UN BON MAESTRO

E satisfaccion mas grandi ora bo ta un maestro ta pa sostene y guia e mucha den su desaroyo individual , academico, social y emocional. “Pa bo ta un bon maestro bo mester ta completamente presente cu e mucha y scucha nan. Bo mester laga bo mesun agenda un banda y laga nan experencia cosnan pa nan mes y siña di e proceso”. Despues nos mester ofrece nan locual nos kier pa nan siña. Esaki no ta algo cu bo por siña den buki ni tampoco door di experiencia den e sistema di educacion tradicional, pa bo por ta completamente presente bo mester balora e experiencia individual di e mucha, su necesidad pa wordo scucha y su necesidad pa haya guia y sosten durante su proceso di desaroyo. E escencia aki di un docente di Montessori ta bin di desaroyo personal, comprendemento y madurez y un confiansa den e mucha su deseo natural di siña cosnan nobo. E concepto den un klas di un Montessori ta un comunidad. Muchanan ta siña kico e kiermeen pa forma parti di un comunidad di personanan individual. Cada voz di cada individual den e klas ta importante, desicionnan ta tuma lugar door di votacion di forma democratico. Empatia y compasion ta wordo siña durante cada desacuerdo of dificultad entre e muchanan.“Nos ta siñanan cu pa un comunidad funciona, cada miembro di e comunidad mester ta responsabel, respetuoso y activo”. For di esaki hopi di nan ta traha e mapa pa nan futuro.

MENSAHE

Maestronan den cada sistema educacional ta eynan paso nan a sinti e necesidad di yuda muchanan durante e añanan formativo y siñanan encuanto mundo y con nos ta biba den sociedad, sea ta cu abilidadnan academico, social of emocional. “Esaki ta posibel solamente si e maestro tin suficiente abilidad natural pa tin pasenshi, comprendemento, compasion, empatia y e abilidad
pa observa y scucha”. E muchanan ta siña hopi mas di con nos ta actua compara cu kico nos ta bisa, e ta nos deber di ta role models y
pa personi ca e caracteristicanan cu nos kier pa nan siña. “Pa logra esaki e ta tuma cuido emocional, fysico, descanso, un famia cu ta sostenebo, amigonan y un comunidad. Esaki ta necesario pa e maestro por tin un sosten estabil pa siña e mucha”.