Cu su 25 aña Jeanedy Semeleer no ta un desconoci den e mundo di musica y farandula na Aruba. Kizas algun lo conoce como e ruman chikito di e cantante local Edjean Semeleer, pero berdad ta cu Jeanedy ta un artista su mes. E ta un mucha cu pasion pa arte cu ta stima bestia y cu 6 aña el a cuminsa canta caba sumes. Awor na grandi, e ta describi como un mucha muher c’un voz angelical. Aunke un escenario no ta nada straño p’e, Jeanedy ta custumbra cu esun como cantante, e aña aki, na 2019, pa prome vez el a subi escenario c’un otro proposito, pa competi pa e corona pa reina di Aruba su carnaval 65. Un experiencia cu a explota pa e bon y comentarionan no asina bon cu a surgi cu su participacion. Aunke hopi hende lo no sa, pero ta pa hopi tempo caba cu Jeanedy tabatin un soño personal, di un dia participa pa reina di carnaval. Cu cada temporada di carnaval, e soño tabata activo pero despues tabata keda poni un banda. Finalmente e aña aki, Jeanedy a dicidi cu esaki lo ta e aña. Na December 2018 caba el a forma su team cu tabata consisti mas tanto di amigonan artista cu e conoce bon. Desde e tempo aki caba e tabatin su tema cu ta algo cu e ta kere fervientemente aden, cual ta proteccion di nos lama. Con Jeanedy mes a experencia e eleccion den su totalidad, e mes ta conta…

J: E tabata un experiencia unico, sumamente great y inolvidabel. Mi ta agradecido cu mi por a comparti’e cu e otro 3 reinanan, nos a sostene otro te final. E tristo ta cu mientras nos tabata disfrutando e tempo aki hunto, e tabata tristo pa mira algun fanatico y sostenedornan bringa otro.

XM: Pa e mesun cantidad di hende cu ta sostene y admira abo y bo ruman, ta parse tambe cu tin un grupo di hende cu lo kier critica tur locual boso ta haci, pakico bo ta kere esaki ta e caso?

J: Eigenlijk, esaki ta algo normal. Tin hopi hende cu kier mirabo logra y lo apoyabo y celebra bo triunfonan. Pero mientras cu lo tin algun cu lo kier mirabo logra pero no ta dispuesto pa duna un man tambe tin cu kier mirabo fracasa pa nan bati man. Ta keda na abo pa scohe con bo ta deal cu esaki como figura publico. Ami ta kere den tene man di otro y yuda otro bay dilanti. Asina ey nos ta crece como ser humano y como nacion.

XM: Bo ta sinti cu kizas e mensahe cu bo a trece (no confetti/ no balloons) a cai den mal tera serca competencia, organisacion?

J: Absolutamente cu no, al contrario, un persona consiente y responsabel nunca por ta contra stimacion y proteccion di nos medio ambiente. Mi a ricibi te hasta bon comentario di varios hende tocante mi mensahe y cu e tabata cla y raspa.

XM: E prome critica riba medianan social tabata riba un poster cu bo a saca. Ki ta bo opinion di e critica aki y con bo a deal cu esaki?

J: E reaccion tabata cu hopi humor, y e no a afecta nos den ningun manera. Mi ta consiente cu como figura publico, bo lo haya tur tipo di reaccion, positivo y negativo. Pero nos ta bibando den un sociedad den cual rebaha un persona, ta keda considera como algo normal y ningun hende ta responsabilisa nan mes pa nan actonan. Y esaki definitivamente NO ta okay. Mirando e situacion social cu nos isla ta aden y mirando cuanto falta di respet, compashon, amor y cariño tin y cu asina hopi hende ta den necesidad di ayudo mental, e tipo di bullying aki, no por ta aceptabel. Nos tin cu keda educa con pa tene man di otro mas, y con pa empower otro hopi mas.

XM: Kico a pasa patras cu bo no por a sali p’adilanti pa resultado?

J: Mi a bira hopi malo. Consecuencia di cansancio, poco descanso, stress y dianan largo. Si mi kier gradici Ingris Molina, Eric Clement y e tres voluntarionan fantastico di Cruz Cora cu tabata cu mi durante henter e rato ey.

XM: Kico ta bo opinion encuanto body shaming na Aruba?

J: Mi ta kere cu nos tur tin di purba di hiba un bida saludabel, esey no kiermen cu por ehempel tur hende muher mester tin e “figura di un reina” . Ta importante tambe pa nos celebra diversidad, autenticidad y cu bunitesa ta bin den diferente forma.

XM: Dicon bo ta kere cu e cantidad di participante na Reina di Carnaval ta keda baha drasticamente asina na Aruba?

J: Door cu e costonan pa participa ta keda subi cada aña. Berdad, creatividad ta hopi importante, pero pa participa den eventonan asina tin su gasto nan. Lo ta great pa nos mira mas districto, bario y club participando un vez mas den eleccion di reina, vooral den categoria grandi.

XM: E dia despues di eleccion bo a haya algo straño cataloga como ‘bruheria’ pafor di bo cas. Kico bo a pensa di esaki?

J: Ainda mi no sa kico e ta. Mi a haya e cos ey den postbus di mi cas keriendo cu tabata algo di mi mama. E tabata un saco cu comcomber putri y 2 bloki, un cora y un blauw, riba e cora tabatin inicial HS scirbi y algo mas cu mi no por a lesa bon. Kico e meta tabata mi no sa, pero si tabata pa spantami, e no a logra. Alcontrario, mi ta hay’e algo kens y e ta tristo pa mira con leu hende ta bay. Mi a participa na eleccion di reina pa engrandese nos cultura y nada mas.

XM: Pakico bo ta pensa cu hendenan, vooral hende muher, tin tendencia di critica y no sostene otro hende muher na Aruba?

J: E ta un problema mundial, y mi ta kere esaki ta algo cu nunca lo echt cambia. Si mi lo carga speransa y fe cu un dia lo bin mas union y sosten entre nos hende muhernan. Ami semper ta sostene mi rumannan, y mi ta kere otro tambe lo por haci mescos. Esnan cu tin e poder y influencia pa stimula e actitud y conciencia corecto, mester duna di nan parti si pa purba cambia e custumber aki.

XM: Kico mas ta e plannan cu bo tin pa futuro sercano y lehano como artista?

J: Mi proximo plannan ta grandi y tin varios. Keda pendiente…

XM: Bo lo desea di participa den mas eleccion di reina/ beyesa den futuro?

J: No, haha. Esaki tabata un soño di mi desde mi infancia y cu ya mi a mira bira un realidad.

XM: Kico e participacion aki a siñabo, e positivo y negativo?

J: Mi a siña cu mi determinacion pa logra locual mi kier logra ta uno grandi. Mi a siña ta hopi mas independiente, pero tambe mi a siña cu mi so no por haci tur cos. Mi a siña tambe, conose ken ta mi hendenan di berdad. Mi ta sumamente agradecido na mi team chikito pero potente cu a duna tur di nan banda pa yudami haci mi soño bira realidad.

XM: Kico ta e mihor conseho cu lo bo duna un mucha muher cu lo kier participa den un eleccion di reina den futuro?

J: Disfruta di e proceso, temporada y eleccion. Compronde cu bo participacion ta pa engrandece nos carnaval, y cualkier premio cu bin acerca ta un extra reconocemento y premiacion pa tur bo esfuerso nan.

XM: Con e certamen aki a cambiabo?

J: El a hacimi mas conciente di e poder di mi talento, creatividad y abilidadnan
Un muher determina c’un meta, ni horcan no por par’e.

MI LO CARGA SPERANSA Y FE CU UN DIA LO BIN MAS UNION Y SOSTEN ENTRE NOS HENDE MUHERNAN