Cynthia Belinda Vilchez Harms a nace 29 aña pasa na Maracaibo, Venezuela, di tata Venezolano y mama Arubiano. Su niñes ta yena cu recuerdonan bunita na unda e tabata rondona pa hendenan alegre, musica y espontaniedad. “Cualkier situacion tabata un motibo pa haci un joke of pa un celebracion, no tabatin solamente calor di temperatura, sino tambe hopi calor humano”. Cynthia ta corda periodonan largo di vakantie na Aruba, cu e tabata pasa entre lama y cu famia. “Papiamento semper a hala mi atencion masha hopi mes y un biaha despues di un vakantie particularmente largo mi a bai Maracaibo bek papiando Papiamento cu tur hende”. Durante un vakantie cu e no a bin Aruba, Cynthia a tuma un curso di Summer School di Fine Arts na Andover USA y for di e tempo ey a spierta den dje un gran curiosidad pa joyas y arte. E pasion tabata ainda locual por wordo considera como un hobby. E tabata traha piezanan artesanal chikito y un biaha el a haya un espacio pa expone esakinan den un joyeria na Maracaibo. “Mi mama semper tabata bisti mi piezanan pa apoyami”.

Cynthia a studia na e Intituto Europeo di Diseño (IED) na Milan. “Originalmente mi a bai Pamplona den Pais Vasco pero eynan mi no sintimi comodo y pesey mi a opta pa purba Milan”. E periodo na Milan tabata educativo no solamente como educacion academico sino tambe culturalmente. El a bai pa un carera den Fashion Marketing cu el a mira como un bon compromiso entre su banda artistico y tambe su banda gerencial.
Despues di a termina su estudio, Cynthia a traha pa marcanan conoci y prestigioso manera Vionnet y Jil Sander. Durante un vakantie na Aruba den December, el a sinti e necesidad di traha un hanger den forma di un casita pa su mes. Na momento cu el a regresa Milan, hopi amigonan y familiares a pidie pa traha un mescos pa nan y cu nan lo desea di cumpre. “Asina mi a dicidi di cuminsa riba e caminda aki como diseñadora di joyas y e mi propio marca “Aliita” a nace”. P’e, e tabata hopi importante pa cana un stap cada biaha, biba dia pa dia sin para pero tampoco cu demasiado pura; “mi ta kere si bo ta haci locual bo kier haci cu humildad y si bo tin pasion, tur otro cos ta yega di nan mes”. Di e famia di su casa cu ta hopi vincula den e mundo di alta moda na Italia el a siña hopi, principalmente nan dedicacion, presicion y nan vocacion laboral.

Por lo pronto e mercadonan mas importante ta Alemania, Italia y Japon y e piezanan mas popular y cu mas acogida comercial ta e cadena di “casita”, “martini” y “la nadadora”, actualmente e nadadora den badpak preto. “Ora e clientenan ta gusta e piesanan, pero specialmente ora cu nan ta relaciona e pieza na un historia personal of un momento special, e ta dunami un ilusion hopi grandi den mi trabou”. Crea y lanta un marca nobo na e nivel cu Cynthia ta haciendo cu Aliita no ta facil y e ta exigi hopi di dje como persona y como profesional. Mercadonan manera Japon ta hopi exigente y prefeccionista y ta rekeri hopi atencion personal di e persona cu ta inspira e piezanan. Cynthia ta traha incansablemente, pero e ta kere cu bo mester traha pa biba y no biba pa traha. Como un mama di dos mucha homber chikito, Cynthia ta conta cu haya e balanse corecto entre e labor di mama e y trabou como profesional. E lucha ta continuo.

Apesar di ta pertenece na diferente pais, Venezuela como e lugar na unda el a crece, Aruba su lugar di vakantie na unda mitar di su famia ta biba y Italia, na unda el a studia, conoce su casa y na unda el a forma su propio famia, Cynthia ta admiti cu Aruba ta su fuente di inspiracion mas grandi. “Na Aruba mi ta haya hopi inspiracion, durante e periodonan cu mi ta pasa ‘kinan cu vakantie y mi por relaha, e mayor parti di mi piezanan ta inspira y relaciona cu e bunita lama rond di e isla”.

Pa tur hoben cu ta pensa di cuminsa cu un propio marca of cu ta soña cu traha un number pa nan mes den e mundo di moda y diseño, e ta pensa cu e ta fundamental pa tin un identidad propio, unico y reconocibel. “Un otro aspecto importante ta pa corda semper cu e caminda ta largo y pasenshi ta necesario”. Semper e ta yuda pa bo tin rond dibo personanan cu ta kere den bo y ta sostenebo. “Mi casa ta un pilar di lus na tur momento y mi famia ta brindami apoyo incondicional, mi ta hopi agradecido pa nan aporte na mi carera y pa siñami balornan fundamental”.

Un nota pa su pais natal Venezuela: 
Mi ta agradecido cu e revista Xclusivo no ta lubida nunca riba Venezuela. Mi tin hopi duele cu tur locual ta pasando, 
pa mira un pais cu tabata asina prospero y pionero pa America Latina, te hasta den diseño, keda completamente detrui 
y sin futuro. Mi curason ta kibra di mira algun Venezolano duna prioridad na ambicion sin importa cu nan ta hunga cu e 
bida di nan rumannan. Mi ta sinti cu tur Venezolano ta biba c’un luto permanente pero e speranza di un cambio no ta 
desaparece nunca!