Ysaura (37) ta un cara hopi conoci den farandula na Aruba. El a participa na varios certamen di Miss y despues di a casa ainda el a participa na certamen di beyesa como Señora. Asina ‘ki el a sa di inspira hopi hende muher pa nan sigui cu nan soño y tambe mantene nan figura asina mes despues di haya yiu. Hunto cu su casa, Clifton Wong, Ysaura ta run e restaurant Blossoms y nan tin 2 yiu, Clifton John di 13 aña den 1 MAVO y Leeann Wong di 11 aña, den 4de klas basis school. Apesar di a enfrenta hopi desafio durante su bida, compitiendo na nivel halto di certamen di beyesa, trahando den su propio negoshi y balanceando famia alavez, Ysaura no por a imagina cu ainda lo tin un desafio mas grandi na caminda. E desafio aki ta uno cu ta afecta un mama na e manera cu hamas e lo imagina ni desea, uno cu ta afecta e salud y bienestar di su yiu. Ysaura su yiu muher, Leeann, a nace cu displacia femoral, e banda drechi di e femur ta mas cortico cu e banda robes, na Aruba e tabata bou observacion di dokter di mucha (orthopedy).

UN PERIODO DIFICIL PA HENTER FAMIA

“For di tempo cu mi yiu a nace nos tabata na altura cu e ta biniendo cu e diferencia di su pia drechi, anto e tipo di operacion aki y tratamento nan ta hacie na Hulanda”. Esaki no tabata un decision facil pa tuma, pero doctor tabata wardando pa Leeann bira un tiki mas grandi pa e por a wanta e operacion. “Na e momento cu nan a bisa nos cu e lo mester bay Hulanda ya caba mi por a pensa cu e no lo bay ta un tempo cortico ya cu e tratamiento cu mi yiu a mester haya tabata basta largo”. Esaki no tabata un decision sino un nesecidad, ya cu despues di e operacion el a haya complicacion y su weso a kibra mas di 4 biaha. “Door di esey nos no por a biaha ya cu Leeann no por a cana pa basta tempo”. Manera cu nan a yega doctor tabatin full un plan pa Leann su operacion. Ysaura a spanta un tiki pasobra e prome cos cu el a bisa tabata cu e tipo di operacion aki ta uno hopi doloroso, pasobra nan mester a rek su pia 1 milimetro pa dia pa yega por lo menos 5 cm, anto esaki nan mes mester a hacie.

NO TIN GRAN SACRIFICIO SIN UN RECOMPENSA

UN BIDA MARCA PA OPERACION FOR DI BABY

For di chikito Leeann tabata sa cu e mester bay opera pa drecha su pia, anto e semper tabata super positivo pa cu esaki. “Un dia mi a bise “dushi si bo kier nos ta para y nos no ta haci mas operacion” el a contestami “ no mami nos a bin pa un motibo y nos ta sigui te na final”. Prome cu el a bay Hulanda pa opera, el a pasa un prome operacion na Colombia. Dokter a mande cu urgencia pa Bogota ya cu akinan na Aruba nan a ripara cu Leeann tabatin un problema den su tripa y mester a opera ASAP, manera el a nace, e la opera y for di eynan nos bishita pa dokternan a cuminsa.

E operacion a bay hopi bon, pero den cuminsamento doctornan na Colombia a bise cu e risico tabata 50/50. “Bo por a imagina con ami como mama a sinti e momento ey, pero despues cu e operacion tabata un exito mi a ripara cu mi yiu a bin “como toda una guerrera”. Ora el a bira mas grandi, manera dokter a bisa, nan a cuminsa cu su operacion na su pia cu den cuminsamento a bay super bon. Esaki ta un operacion y tratamento hopi largo ya cu nan no por rek un pia mas cu 5cm, mientras cu Leeann tabata tin 7 1⁄2 cm di diferencia, anto su ultimo operacion lo bira cu su 15 aña. En total e hobencita a haci 9 operacion.

E KIER YEGA NA UN META CU TA PA SU PIA BIRA MESUN LARGO CU E OTRO

COMPLICACION

E complicacion a cuminsa despues cu doctor a kita e tutor (schroef) y Leann su hueso tabata mucho fragil ya cu nos a rek e 5cm y tabata weso nobo. “Ora nan a kita e aparato su weso a kibra door di e buraconan cu a keda di e schroefnan y di eynan nos nightmare a cuminsa”. Tin asina hopi operacion na caminda y Ysaura sa cu e proceso ta bay ta largo y duro. “Locual mi por bisabo ta cu ta mi yiu a prepara ami pa su operacionan, hasta su ultimo operacion el a bisami “ok mami here we go again” e ta un mucha hopi fuerte y positivo y e kier yega na un meta cu ta pa su pia bira mes un largo cu e otro”.

UN FAMIA BIBANDO SEPARA FOR DI OTRO

Un di e aspectonan mas duro cu Ysaura mester a enfrenta durante e odisea aki tabata pa bay laga su casa y su yiu homber na Aruba mientras e mester a enfoca riba e salud di su yiu muher. Cualkier persona cu haya su mes obliga di biba leu di su famia por bisabo cu esaki ta un di e cosnan mas duro pa haci den bo bida.

“E no tabata facil, pero nos ta conciente cu ta pa e bienestar di nos yiu”. Su yiu homber Clifton John, mester a keda ya cu e ta mas grandi y e no por a falta scol, pero pa vakantie el a bay topa cu su mama y su ruman muher p’asina e tambe por dune su sosten.

“Mi yiu homber tabata sa cu pa e salud di su ruman mi mester a keda Hulanda pa asina tanto tempo pero el a keda cu su tata cu a dune amor y comprension. Esaki ta un “family effort” y tur hende mester aporta na e exito di e operacion. Ysaura ta splica cu el a siña hopi cos durante e periodo aki y tambe di su mes. “Esun mas importante ta cu mi mesun yiu a siñami y mustrami con fuerte nos por ta ora amor ta tuma over y ora bo tin un meta bo dilanti, never give up”! Den bida nos ta “take for granted” hopi cos, nos ta lubida cu nos por ta fuerte den cualkier situacion y cu tur cos tin solucion, nos mester ta mas agradecido cu Dios y bise tur dia danki cu nos tin salud y bida.

E proceso aki a cambia Ysaura su bida y su yiu a cambia su bida, pa bira un mihor persona dia pa dia y disfruta cada minuut cu Dios ta duna nos como regalo.

Futuro y Conseho 
Ysaura y Leeann lo bai bek Hulanda pa sigui cu e tratamento, esaki lo ta pa un tempo cortico por lo pronto pa sigui prepara pa 
e operacionnan cu falta. Actualmente e ta na Aruba y ta purbando di hiba un bida normal y disfruta di su famia y e union cu 
nan ta comparti. “Sin duda mi por bisa cu laga mi famia atras tabata e cos di mas dificil y e sacrificio di mas grandi cu mi 
a yega di haci den mi bida, pero no tin gran sacrificio sin un recompensa y nos recompensa ta e salud di nos yiu 
chikito”. 

Un conseho cu e por duna ta, pa realisa cu den adversidad, obstaculonan ta ponebo bira mas fuerte dia pa dia, 
si bo ta durf enfrenta esakinan. Tene confiansa den Dios cu fe y perseverancia lo bo yega na e meta cu bo ta desea, 
have courage and be kind.