Un sala di Renaissance Convention Center yen di hende muher y algun cabayero a experencia un Conferencia excepcional y exitoso dedica na e ser femenio riba Dia Internacional di Hende Muher. Mundialmente ta celebra 8 di maart pa duna reconocemento na hende muher pa e lucha y logronan obteni den tur aspecto, entre otro den economia, cultura, politica y innovacion.  

E hende muher Arubiano tambe dia pa dia ta progresando den tur aspecto, algun den stapnan grandi y otronan den stapnan menos grandi. Gobierno di Aruba ta reconoce e progreso di hende muher na Aruba den e ultimo añanan y cu honor a organisa un dia pa brinda gratitud y duna elogio na tur hende muher riba nos isla.

E aña aki, a uza e tema internacional pa sigui den mesun idea y uni na e causa tambe pa encurasha nos hendenan muher pa propone y logra metanan pa trece balance y igualdad. ‘Balansa pa Miho’ a haya un bon cobertura door di e oradornan kendenan tur a laga e mensahe atras pa cada hende muher encurasha otro pa kibra bareranan cu ta stroba nan logra metanan grandi. Señora Sandra Croes tabata e MC pa dirigi e evento.

Oradornan di e dia tawata: Señora Maria Dijkhof, Director Departamento di Asuntonan Economico kende a papia riba e rol emprendedor di hende muher y a enfoca riba entrepreneurship social.

Señora Amalin Flanegin, Division Manager Supervision & Enforcement na Banco Central di Aruba, a acapara atencion di e sala cu su topico ‘E rol di hende muher den integridad’ y a amplia rib’e importancia cu esaki tin pa nos comunidad.

Señora Varelie Croes, Chief Innovation Officer di Gobierno di Aruba, a elabora ampliamente rib’e ‘Rol innovador di hende muher’.

Señora Xiomara Ruiz-Maduro, Minister pa Gabinete Wever-Croes, cu su discurso a encurasha e publico presente pa no tene miedo di tuma pasonan grandi pa logra metanan.

Prome Minister Señora Evelyn Wever-Croes a destaca cu su discurso treciendo e momento culminante di su discurso bisando cu den universo tin lugar pa nos tur briya cu nos propio luz y pa nos no tapa luz di otro pa nos mes briya pero nos mester cende nos luz hunto pa ilumina nos caminda.

Como un sorpresa pa mayoria presente, Señora Maria Conchita Alonso, actris renombra di Venezuela kende ta hopi admira na Aruba, a trece un pensamento final poniendo enfasis cu sin estudio ta bira dificil pa trata y a encurasha tur hende muher pa sigui dilanti pa realisa nan soño.

Tabata tin dos discucion di panel cu temanan di actualidad cu a capta atencion di e publico kende a wordo dirigi door di Señora Amy Richardson. Esnan cu a participa den e panel tabata Marisol Croes, docente, coach, autor, Directora di Profesionalisacion na IPA, Shariska Winterdal, Deportista / atleta di coremento distancia largo / Ciclista / triathlon. Nataly Simmons, Executive Director Aruba Bank; Luenne Pieters; Director Departamento di Impuesto; Susy Maduro, Corporate Communications Manager Setar; y Shailiny Tromp Lee, Parlamentario. E puntonan cu cada un a trece dilanti a inspira e publico presente pa ta muhernan den nos comunidad cu ta reconoce necesidadnan di esnan cu no por defende nan mes y pa tin e curashi pa yuda otro logranan nan metanan pa asina nos crea un mundo mas balansa y progresa den igualdad.

Gobierno di Aruba ta gradici tur esnan cu a haci e dia aki asina bunita y special. Na e sponsornan especialmente Aruba Bank, Setar, Romar Trading, Wing Tun. Na e publico cu a tuma nan dia di trabou pa participa na e conferencia y a yena e sala completamente, un danki di curason. Otro aña sigur Gobierno lo percura pa un conferencia mas grandi atrobe unda mas hende por participa.