CHRIS- E MUCHA

Mi a lanta cu mi mama y tata y cinco ruman den cas. Mi mama ta di Santa Cruz y mi tata ta bin di e isla di Sint Maarten. Mi tin dos ruman muher mayor y di e cuatro ruman hombernan cu ta sigui ami ta e mayor. Mi tata tabata un soldad profesional na Savaneta Kamp. Despues el a bira ambtenaar te na su pensioen. E tabata hopi streng y di chikito caba e tabata pone nos polish su sapato y botonnan di koper di su uniform. Mi mama tabata un ama di cas. E semper a cuida cas y a wak pa nos mientras cu mi tata tabata na trabou. Ora mi tabatin mas o menos 13 aña, nos a bay biba na Playa. Un di e recuerdonan di mas bunita di mi niñes tin di haber cu bishita na mi wela cu tabata biba na Papilon. E mucha hombernan di eybanda a siñami traha stichi y jaag riba yuwana y totolica. Nos tabata prepara esakinan den cushina di mi wela y despues saboreanan nan bou di e mata di kwihi grandi cu tabatin pabou den mi wela su cura. Awendia tanto totolica como yuwana ta bestianan proteha y no mag di jaag riba nan mas. Aunke mi a saboreanan tempo mi tabata mucha, mi ta considera e proteccion aki como algo hopi bon. Mi mama semper tabatin un bon relacion cu su seis ruman muhernan. Lastimamente nan tur a bay laga nos caba. E tantanan aki di mi a hunga un papel importante den mi niñes pasobra mi a pasa hopi tempo cerca nan. Nan tur tabata hopi cariñoso cumi y mi tin solamente grato recuerdo di nan. Un di nan tabata biba na Playa cerca di mi oficina actual den J.G. Emanstraat. Tur dia mi ta pasa dilanti su cas.

CHRIS – E ABOGADO

Pa cuminsa mi ta un ‘drop out’ di Colegio Arubano. Tempo mi tabata den 4e klas H.B.S. mi a kita foi scol pa bay traha como salesman den e tienda di Aruba Trading den Caya Grandi na Playa. Mi a traha na Aruba Trading pa casi 10 aña. E temporada ey mi deseo a nace pa studia ley. Pa logra esey mi a cuminsa tuma les den derecho cerca abogado mr. Paul Sjiem Fat, tata di e conocido abogado mr. Johan Sjiem Fat. Tambe mi a yega di haya les cerca mr. Tjon Ajong, tata di ex-notario mr. Faride Tjon Ajong, cu antes tabata scal. Door cu durante e periodo ey ley a cambia y a introduci e Advocatenlandsverordening na Aruba, mi no por a sigui mi estudio mas cerca mr. Sjiem Fat. Mi kier a sigui studia ley na e universidad di Corsow, pero doño di Aruba Trading no tabata dispuesto pa dunami e dianan liber cu mi tabatin mester pa por a sigui e estudio. Recien casa y cu dos yiu chikito, mi no tabata por a keda sin trabao y mi mester a laga e oportunidad aki pasami voorbij. Na 1975 nos a bay biba na Hulanda y na 1980 mi a cuminsa studia ley na universidad di Nijmegen, unda nos tabata biba. Mi a haal mi kandidaatsbul na 1982. Despues di e diploma aki ainda tabata falta tres aña pa bira meester in de rechten.

Mi no a sigui studia di biaha pero a bolbe bay traha pa cria mi famia. Hopi aña despues, na 1990, mi a haya un studieopdracht di gobierno di Aruba pa dos aña pa por a caba mi studie. E tempo ey mi confrère di awendia, mr. Hendrik Croes tabata ministro di husticia y Sr. Nel Oduber tabata prome ministro. Te awe ainda mi tin gradicimento den mi curason pa nan yudansa. Na januari 1992, mi a termina mi estudio di ley. Nos a bin Aruba bek y mi a traha poco tempo na Directie Wetgeving. Den Augustus 1994 mi a huramenta como abogado y dia 8 di Juni 1998 mi a habri mi propio oficina. Abogacia ta mi pasion. Dia mi a bira abogado mi a scohe consientemente pa bay dedica e resto di mi bida na sirbi esnan cu por asercami pa yudansa den e area legal cual mi a studia p’e. Te awe e dedicacion aki ta loke ta dunami e energia pa sigui eherce e profesion bunita di abogado. Si tin algo cu mi a aplica semper den mi trabou, esey ta para pa e berdad. Manera nan sa bisa, berdad tin hopi cara y mi ta considera parti di mi trabou ta pa explora tur posibel cara di un berdad. Tin ora no ta facil pa determina kico a pasa realmente pasobra no ta tur ora cos ta loke nan ta parce. Mi por diferencia di opinion cu otro abogado of cu scal en cuanto kico ta e berdad den un caso, pero nunca mi lo usa un mentira concientemente den mi trabou.

CHRIS – E TATA DI 3 YIU

Mi tabata presente ora mi prome yiu a nace den kraamkamer di Hospital San Pedro na Playa. Su color tabata biña biña y mi a keda totalmente asombra di esaki. Jong y sin ningun experiencia di bida ainda, mi a pensa cu tur mucha lo tabata nace color biña, manera hende chikito foi di planeta Mars. Despues mi a bin haya sa cu ta pa falta di oxigeno mi yiu su color tabata biña ora el a nace. Despues su color a bira normal bek. A tuma algun tempo pa mi a custumbra di ta tata. Tabata te ora cu mi prome yiu a cuminsa reconoce mi y a cuminsa yamami ‘papa’ cu mi curason a yena cu amor y orguyo di ta su tata. Awendia mi yiu aki tin casi 50 aña di edad pero e sentimentonan ey ta mes fuerte ainda. Pa mi ta manera cu e añanan a bula.

Tamara: “Mi tata ta un persona hopi positivo cu semper algo positivo pa bisa y e ta un tata cu nunca a lagami na caya”  

Cada un di nos tres yiunan tin un diferente caracter. Nos yiu mayor Tamara ta esun di mas ‘sweet’. Pero esey por ta pasobra e ta nos unico yiu muher. Tamara ta esun cu a busca un mucha muher di Imeldahof basta aña pasa, pa e por a bin pasa su dianan liber cerca dje. Awor e mucha muher aki ta grandi pero semper nan a keda c’un bon contact cu otro te dia dj’awe. Foi chikito caba, Tamara semper a disfruta di bida. Te ainda e ta asina, den tempo bon y menos bon.

Bonki: “E cos unico di mi tata p’ami ta cu el a duna su yiunan algo hopi bunita, cual ta un compas emocional y moral, 
locual ta importante pa cualkier persona por yega con leu cu e kier.

Nos yiu cu ta bin despues yama Christopher of Chris junior, pero su nomber di cariño ta Bonki. Semper bo por tene un bon combersacion cu Bonki riba cualquier tema. E sa hopi riba bastante tereno. Tempo Bonki tabata mas chikito e tabata drumi cu wekker riba su bariga pa e no yega laat. Te awe ainda bo por con a riba Bonki pa ta na ora si tin algo.

Omar Steve: “Un cualidad cu mi gusta di mi tata henter mi bida ta cu nunca mi a tende grita, pero esaki no kiermen cu e 
no ta demanda respet ora e bisa algo. E ta algo cu mi ta purba di siña mi yiunan tambe”. 

Omar-Steve ta nos yiu mas chikito cu mientrastanto tin mas cu cuarenta aña caba. E semper ta yen di idea comercial. E ta sigui desaroyo den maneho di economia door di gobierno y e no ta basila pa expresa su vision riba esaki publicamente. Di chikito caba e semper tabata hopi ‘mondig’. Tempo e tabatin nuebe aña el a manda un carta pa Burgemeester di Nijmegen pa pidi gobierno pa construi un cancha di skate board pa muchanan den nos bario. Y el a haya contesta tambe riba su carta. Omar-Steve semper a acepta un straf cu el a merece, pero ora e ta haya cu e straf no ta husto, ni Dios foi cielo por a pone cumpli cu e straf ey.

Mi señora y ami a conoce otro hopi jong. Nos a casa y haya yiu jong. Tempo cu nos yiunan a nace, nos mes tabata mucha ainda bo por bisa. Nos tabata bay pasa dia cu nos yiunan na laman, bay cana cu nan den mondi, bay hunga cu nan den speeltuin y haci tur sorto di cos cu nan. Nos yiunan a bendiciona nos cu siete nieto. Seis mucha homber y un mucha muher. Door cu nos yiunan semper a biba na Aruba, nos semper tabatin y ainda tin un relacion hopi estrecho cu nos nietonan. Tempo cu nan tabata mas chikito, tur dia mi señora tabata prepara desayuno pa nan y despues hibanan scol. Dus nos tabata mira nos nietonan tur dia. Awor cu nan ta mas grandi, nos tin dos nieto cu ta studiando na Hulanda. E aña aki di tres ta bai sigui nan paso. T’e ainda tur mainta mi señora ta hiba nieto scol. Den December 2018 Omar-Steve a bira tata di nos di shete nieto. Esey awor aki ta e baby di famia.

Mescos cu den hopi otro famia, e fase mas ‘challenging’ tabata e periodo di nan puberteit. E periodo cu bo yiunan ta bira teenager y ta cuminsa rebeldia prome cu nan bira adulto. Pa hopi di e mayornan cu nos conoce esaki ta e parti mas dificil den e educacion di bo yiunan. Despues di nan puberteit cos ta normalisa atrobe. Durante puberteit di nos yiunan no tur cos tabata ‘rozengeur en maneschijn’ na nos cas. Mi por bisa cu tur tres nos yiunan ta hopi balente di nan mes. Esaki ta un di e caracteristicanan cu mas mi ta aprecia den nan. E ta trece un pas den mi mente pa sa cu dia mi no t’ey mas, nan por sigui riba nan mes. Ni un dia nos mester a animanan pa nan bay traha of pa nan cuida nan yiunan debidamente. Mi ta convenci c’un bon ehempel como tata y mama ta contribui pa yiunan bira hendenan fuerte pero cu curason grandi cu semper ta para cla pa yuda otro hende unda mester. Tur tres di nos yiunan semper ta gusta hari y haci pret. Esey nan tin di nan mama pasobra ami mes tin un caracter mas serio.

CHRIS – KI TIPO DI TATA

Ta mi yiunan lo mester contesta esaki. Mi ta spera cu nan lo papia bon di mi, hahaha. Mi a purba di ta un tata cu semper mi yiunan por a conta riba dje. No necesariamente cu placa, pero cu mi sosten moral den tur loke nan ta haci of purba haci. Esaki no a cambia nunca, aunke e necesidad di nan banda pa acudi cerca nan tata pa cualkier cos logicamente den curso di añanan a bira menos ora cu nan edad a subi y nan a cuminsa para riba nan mes pia. Mi ta kere cu ta importante pa un tata encurasha su yiunan pa nan studia of siña un ofishi pa nan por mantene nan famia un dia. Tambe mi ta considera importante pa un tata stimula y yuda su yiunan pa nan por yega na nan mesun cas unda nan por biba aden cu nan famia. Un tata cu ta stima su yiunan di berdad ta cumpli cu su responsabilidad di zorg pa nan haya loke nan mester, sea cu e tata aki ainda ta cu nan mama of no.

KICO TA HACI UN BON TATA?

Un tata cu t’ey na un bon manera pa su yiunan ta trece paz den su famia. E ehempel c’un tata ta duna su yiunan segun mi ta hopi importante. Un mucha no semper ta capta loke bo ta bise pero e bon ehempel cu bo dune semper lo afecta con e ta para den su bida. Kizas no mesora, pero sigur den un of otro fase di su bida bo yiu lo purba corda kico su tata lo haci den cierto situacion cu e por haya su mes aden. Y e dia ey bo ehempel como tata lo haci un diferencia importante.

TATA VS ABUELO

Mi no ta sinti hopi diferencia. Mi ta stima mi nietonan manera mi ta stima mi yiunan. Tin ora hasta mas. Mi sa yama mi nieto of nieta na nomber di su tata of su mama pa ekibocacion. Naturalmente e educacion di nos nietonan ta den man di nan mayornan, pero sinembargo ta inevitabel cu mi señora y ami ta ‘bemoei’ nos mes cu esey tambe. No semper nos ta di acuerdo cu cierto parti di e educacion di nos nietonan, pero nos sa cu nan ta den bon man, pues finalmente nos ta acepta e diferencia di opinion. Cu nos nietonan, mi señora y ami ta disfruta un biaha mas di tur e alegria y amor cu mucha ta trece den cas durante nan crecemento.

BALOR/NORMA DI UN GENERACION PROME P’E OTRO

Tin norma di mi tata cu mi lo no aplica na mi yiunan. Ora mi tata tabata straf su yiunan, e tabata sutanan cu su faha. Mi ta corda bon cu despues di un sota asina mi atras y mi bilnan tabata yen di marca biña riba nan pa algun dia. Mi no ta di acuerdo cu e tipo di straf aki y p’esey mes nunca mi a yega di dal mi yiunan. Esey no kiermen cu nan no a haya straf di mi, al contrario, pero nunca den forma di dalmento of otro tipo di maltrato. Di otro banda, mi tata nunca tabatin miedo di nada y di ningun hende. Mi nunca a yega di mire baha cabes. Mi ta kere cu e ehempel ey ta importante den e trabou cu mi ta eherce awendia. Un abogado cu miedo no por eherce su trabao debidamente. E mester tin e curashi di sali na defensa di e derecho di su cliente. No den un manera físico, esey ta trabou di polis, pero si den un manera fuerte y cu perseverancia. E nunca por laga miedo strobe di cumpli cu su deber di yuda su cliente. Un balor cu semper mi a consi- dera importante den bida ta respet pa otro. No ta importa kico ta e situacion, mester mustra respet semper. Si mi yiu a perde respet pa otro hende, nunca e por haya rason cerca mi. Ora bo perde respet bo a perde e rason cu kizas bo por a haya. Mustra respet pa otro hende, particularmente pa adulto, a hunga un papel importante den educacion di nos yiunan.

UN TATA AWENDIA

Sin duda algun mi ta kere cu awendia ta mas dificil pa ta un tata lantando un yiu. Un motibo ta cu segun mi, e tentacion pafor di cas ta hopi mas grandi y hopi mas serio cu antes. Cu esey mi kier men particularmente cu awendia hobennan ta sera conoci mas tempran caba cu e tentacion di tur sorto di droga, di alcohol y marihuana te cu cocaina y base. Esaki hopi biaha ta hibanan riba mal caminda. Un tata no solamente tin e tarea pa informa y educa su yiunan pa evita mas tanto posibel cu su yiu bira victima di e tentacion aki, pero tambe pa yuda su yiu cu a sucumbi pa e tentacion aki pa combati e problema cu el a cai aden. Yude pa e por recobra su bida bek. Na di dos lugar mi ta kere cu e avance rapido den educacion na scol y den technologia ta trece cune cu hopi biaha e tata no ta compronde e materia cu e yiu ta haya na scol. Riba tereno di technologia, particularmente computer y celular, hopi biaha e yiu sa mas cu e tata. Esakinan segun mi tambe ta hacie mas dificil cu antes pa ta un tata cu ta lantando un yiu.

E SENTIMIENTO AWE MIRANDO

Fuera di e amor cu mi tin pa mi yiunan ora mi miranan awor, mi ta hopi orguyoso di nan tur tres. Nos yiu mayor Tamara ta juffrouw di scol. E ta dedicando su bida na educa mucha chikito pa mas cu 20 aña caba. E ta haci esaki cu hopi entusiasmo y perseverancia. Y tur esaki den un klas calor na un scol cu te ainda no a haya airconditioning. Nos dos yiu homber Bonki y Omar-Steve ta traha hunto como business partner pa mas di 19 aña caba, pero semper nan a keda ruman prome cu tur cos. Esey ta yena mi curason cu hopi alegria pasobra mi sa cu hopi biaha ora cu famianan ta traha hunto pa hopi tempo, esey por causa iritacion y problema entre nan. Mi ta orguyoso tambe cu e contribucion di Bonki y Omar-Steve na nan isla natal cu e texto grandi di I Love Aruba dilanti di bestuurskantoor na Playa. Tur dia mi ta mira turista ta saca portret dilanti di esaki. Ta yena mi cu orguyo cu nan a traha e texto grandi di I Love Aruba aki for di nan propio saco y cu te awe nan ta mantene foi di nan propio saco. Sin ningun ayudo di ningun banda. Mi por bisa cu nos ta bendiciona cu tres yiu cu tur tres ta persona balente cu semper a wak bon pa nan yiunan y semper a contribui na un mihor Aruba.

Nomber Completo: Chris Frans Karel Joseph Lejuez 
Edad: 71 aña
Estudio: Ley na Universidad di Nijmegen, Hulanda
Hobby: Traha
Motto in Life: Never, never, ....... never give up! (palabra di Winston Churchill)
What makes a great father: Segun mi?: T’ey pa bo yiunan