Su cuminsamento tabata den un temporada di pre-container no menos cu 70 aña pasa. Aruba su poblacion tabata apenas un poco mas cu 51 mil habitante. Den un loods y oficina modesto den Werfstraat cu ni 20 trahador, e compania Jan Bodegom a cuminsa opera.

Tabata 1948 y awe 70 aña despues, e compania cu riba 120 empleado y bou di e nomber Compra a celebra e logro aki den grandi. Escenario tabata e ballroom di Hilton Aruba Caribbean Resort dia 22 di September 2018 cu presencia di e.o. cliente-, relacionnan comercial proveedornan y otro stakeholders instrumental den su desaroyo.

Enfasis di e anochi tabata pa gradici tur esnan cu di un forma of otro, a contribui na haci Compra un di e lidernan den e industria di distribucion local. Desde su lidernan determina cu vision y strategia pa premira cambionan den e industria di comercio y distribucion te na e fundadornan,  ex-coleganan y e team actual di Compra.

“Nos kier gradici tur nos partners, relacionnan comercial y clientenan pa nan confiansa, pasobra t’esey ta e aspecto mas importante”, tabata palabranan di su director general Hubert Dirks.

Invitadonan internacional representando marcanan manera Kraft Heinz, Procter & Gamble, Purina, Walton & Post, Tyson, Zwanenberg, Friesland Campina, Costa Tropic, Copacol, Del Valle tambe a viaha pa celebra e 70 añanan aki cu e Compra.

E anochi a cuminsa c’un bunita y emocional presentacion audiovisual cu a repasa e historia di Compra desde su inicio na 1948 como Jan Bodegom. A resalta e desaroyonan mas importante riba nos isla cu a influencia e forma di haci negoshi como tambe e crecemento solido cu Compra ta maestra.

A duna un bista riba e marcanan adkiri durante añanan unda esun mas resaltante ta sigur Frisian Flag, cual marca a cuminsa cu e compania desde inicio y t’ey te awe. Ademas na esaki, como un bon compania cu responsabilidad social semper na pecho, a señala e diferente formanan cu Compra constantemente ta duna bek na nos comunidad.

Tabata un anochi di celebracion pasobra 70 aña di un compania local riba un crecemento solido y constante c’un curason pa su comunidad y trahadornan ta mas cu motibonan valioso pa celebra. Pabien na Compra, su team y Aruba completo