COMO MUHER NOS APORTE DEN TURISMO TA MULTIPLE

 

Desde 4 aña pasa caba Carolina su dianan ta yena cu e dushi solo di Aruba. Leu e dianan di yobida of temperatura friew den cual el a lanta cune na Chile, su pais natal, a keda. Si tin un cos cu e tabata sa desde hoben caba, tabata cu su futuro lo ta pafor di Chile conociendo y trahando cu hendenan di diferente parti di mundo. E tabata sa tambe cu un profesion den turismo tabata loke lo por a brinde e oportunidad maraviyoso aki cu tur siguransa.“Mi tabata na Aruba caba algun aña prome cu mi a cuminsa traha ‘kinan. Tabata riba un di e dianan ey grijs den winter cu mi a cuminsa pensa cu ya tabata momento pa mi bolbe bek Caribe. Asina mi a cuminsa busca oportunidadnan unda Aruba ta esun cu a sali prome via e sistema increibel di Marriott mes”, Carolina ta conta.

ARUBA – UN ISLA DIFERENTE

Carolina a traha na varios otro paisnan cu e compania di Marriott pero e ta bisa cu Aruba ta special y a siñ’e hopi. “Tur islanan den Caribe kier mesun cos – trece turista- pero e proceso pa haci esaki no ta igual cerca tur ni tampoco e experiencia cu cada un ta ofrece. Mi a traha na lugarnan manera Islanan Cayman y Puerto Rico y si mi mester compara nan cu Aruba, tur tin un identidad y forma di haci cosnan diferente. Aki na Aruba, casi e isla completo ta drey rond di turismo pa cual motibo e cultura di servicio ta uno diferente. Tambe e ta un isla cu ta bon organisa pa e parti di apoyo di ATA y AHATA loke ta haci’e como destinacion, hopi fuerte. Tin varios factor cu ta haci Aruba e mihor opcion; e hendenan, e beachnan, su ubicacion pafor di e ‘hurricane belt’ y su clima fantastico. Aruba ta un isla c’un demanda turistico hopi halto unda bo mester por constantemente innova pa ta semper e mihor. Mi ta encanta desafia mi team y mi mes p’asina hunto nos por ta e mihornan y purba cosnan nobo semper.

POSICION DI MUHERNAN DEN E INDUSTRIA DI TURISMO A CRECE MASHA HOPI MES

MUHER DEN TURISMO

Carolina ta sinti cu e posicionnan di muhernan den e industria di turismo a crece masha hopi mes unda Marriott mes ta un compania perfecto pa traha cune como hende muher. “Aruba tambe tin un equipo lider di muhernan den turismo, cual ta creciendo cada dia mas”, e ta bisa. “Como muher nos aporte den turismo ta multiple pero pa menciona algun cu ta resalta sigur ta nos abilidad di multitask, determinacion, planificacion, creatividad y e amor pa locual nos ta haci”. Sumes, banda di tur su responsabilidad diario cu su team, compania y Aruba cu su funcion ta trece cune, Carolina ta tambe mama di Isabella di 7 aña. “E sacrificio mas grandi ta e viahenan cu ta rekeri pa mi trabou y sigur na Aruba mes mi tin dianan hopi druk pero manera hopi otro muhernan, bo ta maneha y combina esakinan e mihor forma posibel. Mi ta percura pa yena e bida di mi yiu cu calidad di tempo y haci cosnan cu ta yen’e cu experiencia y memorianan felis cu hopi cariño y amor constante.

ARUBA TA UN DESTINACION FUERTE

CRECE-INNOVA PERO CU PASION

E pensamento cu Carolina ta kere firmemente aden ta: Comparti conocimiento y logra pa su team crece y ta innovador dunando lo maximo di nan mes, semper pasion. Mas cu claro, pasando bon den nan trabou.“Mi ta gusta entrene mi team y comprende cua ta nan metanan profesional, p’asina mi por identifica e areanan den cual mi por yudanan. Mi ta kere cu pa desaroya otro, bo mester por comparti conocemento y delega tareanan pa cada ken siña mas di oportunidadnan presenta.

P’ami e ta un orguyo di por ta parti di un empresa asina fuerte y positivo manera Marriott. E balornan di Marriott ta haci cu bo mes kier ta mihor cada dia y sigui crece como profesional. E forma di capacita nos cu e cantidad di informacionnan disponibelmiembro ta increibel”.

Conseho:
“No tene miedo di ta diferente Durf di bin cu ideanan nobo y sea dispuesto pa innova y ta para cla pa ta esun prome.
Tin biaha e hecho di ta diferente por causa un impacto y resultadonan hopi positivo.”