SYNOPSIS DI ENFERMEDAD

Ta precisamente 5 aña pasa cu Ziziane cu 26 aña a haye confronta cu algo cu e no tabatin poni den su plannan. E tabata sinti su mes cansa y loke el a atribui na kizas simpel falta di hero a resulta den algo hopi mas serio. “Mi diagnostico a keda haci na Aruba mes hopi trempan; mi tabatin Hodgkin Lymphoma y mi a haya terapia di ABVD y despues Radio Terapia na Cali Colombia. Tabata un tratamento di 6 luna, e Chemo Therapy tabata di Augustus te cu November y 1 luna di Februari pa Maart na Colombia pa e Radio Terapia”, Ziziante ta conta. “Mas e añanan ta pasa, menos mi ta purba corda di e periodo of menos e ta afectami” Aunke e ta un periodo tras di lomba pa Ziziane, e ta bisa cu sigur e tin e duda of incertidumbre di locual cu a pasa y si e por pasa atrobe. E parti cu ta resalta p’e di e periodo aki ta e cantidad di personanan cu el a conoce como tambe e tabata un periodo unda cu su famia y amistadnan tabata hopi serca y uni cu otro.“Esey ta algo cu mi ta aprecia masha hopi mes, e atencion y cariño cu nan a dunami”.

MI DI E MALESA AKI NO LO “TAKE OVER” MI BIDA

UN TRATAMENTO FUERTE PERO TAMBE UN DI 2 CHENS PA BIBA

“Tur cos a cana liher y vlot. Semper mi huisarts a keda den contacto cumi y yudami durante e prome simannan. Hasta ora mi a bay Colombia pa un di dos opinion, e tabata pendiente dimi. Na cuminsamento, e tabata un tiki dificil door cu mi specialista no tabata contento cu mi a bay Colombia pa busca un di dos opinion, pero despues di a papia esaki over nos a ‘get along’ hopi bon cu otro te dia di awe”. Durante su tratamento, e consehonan cu Ziziane a haya di tur caminda tabata multiple, pero na final e tabata haci locual e tabata sinti comodo cune sumes. “Mi no a tuma nada specifico, mi tabata purba bebe awa di Moringa tur dia y tur biaha despues di cada seshion di mi tratamento, mi tabata bebe rooibiet cu wortel pa yuda mi HB gehalte cual a yuda cu nunca mi tabatin mester di remedi extra pa subi mi rode bloed cellen. Mi famia y mi mama semper a zorg pa mi a come bon y p’ami por tin forsa durante e simannan ey.

Mi a pone un actitud positivo y un pensamento cu mi lo vence e malesa aki, por ehempel mi di cu mi no lo feita mi cabes pelon y asina a pasa tambe, cu despues di a termina tur mi tratamentonan ainda mi tabata yen di cabey. “Semper mi ta bisa cu Papa Dios a preparami pa e situacion aki cu mi a encontra cune, pasobra ningun dia mi a sinti pa ‘give up’ of mi a sinti cu mi tabata malo, sino mas bien mi a sinti fuerte, c’un actitud positivo y cla pa enfrenta e bataya aki. Claro e prome dia bo ta haya un tristesa pero mi a pone un meta cu esaki ta djis un otro fase den mi bida cu mi lo surpasa y no lo laga esaki de ni mi bida of decisionnan. Durante henter e temporada mi tabata positivo y tabata purba laga esey refleha den mi bida diario y mi actitud. Mi a sigui cu mi bida normal paso mi di e malesa aki no lo ‘take over’ mi bida. Mi tabatin un actitud positivo; mi tabata bisti mi sapato halto y pone makeup ora mi mester a bay Oncologie y tuma tratamento. Tin hasta un anecdota unda un dia mi a bay cu flats bisti y e nurse di cu el a kere cu mi no a bin tuma tratamento pasobra e no a tende e “tok tok tok” di mi hilchinan. Hopi hende kizas no tabata sa y te ainda nunca mi a papia cu nan erover, pasobra e momento ey mi a dicidi cu e lo ta un etapa priva cu mi lo kier a pasa cu mi famia y amistadenan di mas serca. Hopi hende, hasta hendenan serca no a gusta kizas cu nan no tabata sa. Mi no tabata kier e sentimiento di sinti cu mi ta malo, cu mi no lo supera esaki. Mi a realisa c’un ‘private life is a happy life’. Tambe si mi a realisa cu no mester warda pa un momento special of specifico pa haci algo, semper mi kier a pasa Pasco na New York y e December ey mi a dicidi mi ta bay cumi ruman pasa Pasco na New York y despues di e Radio Therapy mi a bay Costa Rica tambe serca mi otro ruman. Dus mi a haci mi viajenan y a sigui un bida basta normal. Na Maart 2019 lo mi haci 5 aña cu mi a tuma mi ultimo tratamento.

BIDA DESPUES DI CANCER

“Mi no kier hende mirami como un victima si no mas bien un persona normal cu a pasa den un situacion di bida cu el a supera y cu mi a keda e mesun persona cu mi tabata pero mas conciente di cosnan rond di mi y di bida. Cu esey mi kiermen cu hopi biaha nos ta rabia, reclama of preocupa pa consnan cu no ta necesario, y hopi hende no lo compronde esey, paso ta te ora bo pasa den un situacion asina bo ta siña balora e tempo rond dibo y den mi caso e suerte cu mi tabatin di por a pasa e periodo y situacion aki asina facil y bon cu e apo- yo di mi famia tambe. Mi bida a sigui normal.

Hopi biaha ora di e malesa hopi hende ta baha peso, ami a subi 8 kilo cu te dia di awe mi no por baha, tin biaha ta dificil mi corda algo of yega na un palabra liher pero esey ta efectonan secundario menos cu mi a keda cune. Voor de rest mi ta sport y haci tur mi actividadnan diario, mi ta purba tene un bida saludabel modera, semper den mi mente cu tur cos mester ta balansa. Esey ta algo cu semper mi a keda corda ta cu varios Dokter tanto na Colombia y Aruba a bisami ta cu sigui cu bo bida normal pero semper c’un balance.“mi ta controla cada 3 of 4 luna y ora mi por mi ta bay Colombia y haci un extra control tambe”.

Miedo pa e cancer bolbe? “Claro e ta algo cu bo no ta ni pensa y no lo kier tampoco. Pero mi ta conciente cu e ta algo cu por pasa, aunke cu e Hodgkin su porcentahe pa keda cura completo ta 93-95% y cu e chens pa haya otro malesa di e tipo aki ta mas grandi cu e Hodgkin mes”.

CONSEHO

“Kico bo ta bisa otro personanan cu ta wordo diagnostica cu cancer?
“Keda positivo y purba saca lo mihor di e situacion aki y cu esaki ta djis un fase mas den bo bida cu bo mester supera, keda fuerte y no ‘give up’.

Life Motto

“Mi no tin un life motto, nunca mi a pensa of mira mi mes como un victima y mi no tabata kier pa ningun persona mirami asina tampoco. Tin biaha esey por zona hopi egoista mirando cu no ta tur ora un persona cu e malesa aki ta sobrevivi, pero den e mesun rosea mi ta kere bo tin cu laga e peso ey atras y locual cu a pasa den e periodo ey mescos cualkier situacion malo cu bo por pasa, mester lage los pa bo sigui dilanti y gosa di bo bida”.