SYNOPSIS DI ENFERMEDAD

Pa Jerwin, e inicio di e forma con el a descubri cu e tin cancer ta cuminsa c’un accidente di brommer na 2013. “Cu mi por corda, mi a cuminsa haya dolor di lomba poco poco e dolor di lomba a bira mas y mas pisa te c’un dia mi no tabata por a dobla pa mara mi feter di sapato of hisa mi brasa banda drechi. Mi a bay dokter y nan mandami bay coi sanger y saca X-ray. Pero ami ta manera tribi mi a bay coi sanger so. Tabata dia 16 di december cu mi tabata den klas cu dokter a yamami y puntrami unda mi ta. El a bisami sali bay hospital y bay saca e X-ray y bin cu esaki serca dje dibiaha. Asina mi a haya sa cu mi tin cancer di testiculo stage 4. E tratamento cu mi a haya ta yama BEP. Mi cyclo di chemo tabata cada 21 dia. Mi tabata keda 5 dia den hospital pa haya chemo. Mi tabata sali for di klas bay tuma chemo y bin bek. Y esaki mi a ripiti 4 cyclo di dje. Despues mi a bay Hulanda pa haci un operacion grandi pa kita algun teratoom y mi lymphnotes. Di chikito caba mi ta corda mi tabata yora anochi pensando cu mi famia lo bay fayece un dia.Te dia cu mi a realisa cu mi tambe ta bay muri un dia.Y desde e dia mi a sinti mi a cuminsa biba. Miedo di tur cos a bay y durante e periodo di cancer mi a recorda esaki cu kizas mi tempo a yega, kiermen lagami enjoy tur cos cu mi tabata por y keremi mi a enjoy paso mi a bay carnaval sin punta di cabey riba mi curpa. Kiermen locual cu mi a siña ta goza e bida cortico cu nos tin aki. Dimi mes mi a siña tambe c’un mente positivo y saludabel ta sumamente importante paso na final ta mente ta manda. Y esaki mi a cuminsa haci controlando mi pensamentonan tur dia. Bo tin cu realisa tambe cu bo curpa ta dunabo señal ora algo ta fout y mester scucha esaki. Desde e periodo ey mi ta scucha mi curpa ora e ta papia cumi. Semper a accepta kico cu pasa cumi tabata pa boluntad di Dios y bo mester di djis tene fe. Si no ta pa e cancer lo mi no a bira un ‘motivational speaker’ awe, algo cu mi ta disfruta haci”.

DIOS TA DUNA SU BATAYANAN DI MAS FUERTE NA ESUN DI MAS FUERTE CU POR CARG’E

UN TRATAMENTO FUERTE PERO TAMBE UN DI 2 CHENS PA BIBA

Pa shete luna largo Jerwin a pone su actitud di mas balente y enfrenta su condicion. “Mi tratamento di chemo a dura 4 luna y despues un otro 3 luna mas pa e operacion cu mi a haci riba mi torax. E parti aki di mi bida, ami ta wak’e como un parti cu a structura mi bida basta. Ami semper tabata positivo pero durante tratamento mi a perfecciona esaki mas. Tambe el a siñami biba den e presente, siña di pasado y pensa pa e futuro. Nunca mi a pensa di ‘give up’ paso mi ta pensa cu ‘give up’ ta e cos di mas facil y cobarde pa haci. Ami a wak cancer como un reto, tin un dicho ta bisa “Dios ta duna su batayanan di mas fuerte na esun cu por carge” Mi a haya un break- down si y esaki a pasa na Hulanda ora cu nan a bisami cu mi por bay cas pa despues nan bin buscami pa sigui haci test riba mi. Pa ta honesto dia cu mi a keda diagnostica cu e dokter a bisami cu mi tin cancer mi contesta tabata “okay” .

Jerwin ta bisa cu e ta un el creyente den remedi di tera y a uza esakinan tambe durante su bataya contra cancer. “Tur locual nos mester mundo ta duna nos. Cu esey bisa mi a haci uso di hemp oil, mi tin un amigo cu a trece moringa pa mi bebe” E sosten di amigo y famia tambe ta crucial ora di e bataya aki y pa Jerwin, esaki no tabata diferente. “Na December aña pasa, 2018 mi a haci 5 aña cancer-free y cu Dios su poder mi lo ta cancer free pa semper.

Mi a bringa cancer c’un pensamento positivo y esaki hopi hende a admira. Mi tabata duna speransa na hendenan cu no ta ni pasando den un malesa. Pa e forma con mi a bringa cancer mi a conoce hopi hende y hopi hende a conoce ami”.

BIDA DESPUES DI CANCER

Cancer no a cambia ningun plan cu mi tabatin, e tabata un obstaculo den mi caminda cu mi mester a surpasa. Y te dia di awe e ta keda cordami cu el a pasa den mi bida paso mi ta 23% sordo, mi oreanan ta fluit constant (tinnitus), mi tin un banda di riñon, un corta masha grandi riba mi torax y un banda di testiculo pero asina mes mi ta haci sport y competi cu hendenan 100% healthy y reta mi mes pa ta mihor. Mi a sigui biba normal paso dia bo stop di biba tur dia lo ta e dia cu bo ta cuminsa muri. Djis mi a bira un mihor version dimi mes. Mi a cuminsa scucha mi curpa y mi a cuminsa reconoce mi ‘bad habits’ y poco poco cambianan pa ‘good habbits’. Mi no ta controla mas pasobra pa mi ta honesto, mi a fada y stop di bay 2 aña pasa.

E motibo ta cu mi mester bay coy sanger constantemente y bay te na e consultorio pa haya sa si tur cos ta bon y keda cla den 5 min. Den mi pensamento e mester ta algo cu por haci via telefon”. Miedo cu e cancer lo por bin bek? No, mi no tin miedo y mi ta bisa esaki tambe si e mester bin mes mi no ta bay tuma chemo. Paso den mi pensamento y experiencia chemo ta causa mas daño cu e ta yuda. Nunca lo bo ta prepara pa cancer pero si bo biba cu e pensamento cu e ta bay bin bek bo mes ta bay yame.Un cos misa cumi mente y fe si ta cla si un dia e mester bolbe.

CANCER A SIÑAMI BIBA DEN PRESENTE, SIÑA DI PASADO Y PENSA PA E FUTURO

CONSEHO

Mi conseho na otronan cu mester prepara pa enfrenta cancer:

1. Tin Fe den dios
2. Ta positivo na tur momento
3. Train bo mente pa ta fuerte
4. Saca tur hende negativo for di bida (pa e periodo ey)
5. Sigui biba normal y ta bo mes

LIFE MOTTO:

Biba tur dia manera ta bo ultimo dia, trata tur hende manera abo kier wordo trata, sea un bon hende cu tur hende paso e no ta costabo ni un cen, reta bo mes pa ta un mihor persona, no pa esunnan rond dibo, sino pa bomes y si bo muri bay, keda biba pa semper lagando un leyenda atras.