CONTRARIO NA OPINION PUBLICO, GOBIERNO TA MIRA E IMPORTANCIA DI DUNA MAS ATENCION Y FACILIDAD NA MUCHANAN DEN SPECTRUM DI AUTISMO

UN HOBEN C’UN INTERES Y UN META

For di un edad hopi hoben Carolina a descubri cu e tin un interes grandi den e desaroyo di mucha, specialmente gruponan vulnerabel. Pa hopi aña el a traha como boluntario den diferente organisacionnan cu ta brinda sosten na muchanan, e.o. Casa Cuna na Aruba y BETA Center, Fern Creek Elementary School, Kids Beating Cancer y Florida Hospital for Children na Merca. “Tur esaki a ponemi cambia mi enfoke di studio pa Health Administration c’un concentracion den Child Development”. Ora cu el a bin biba bek Aruba, e tabata consciente cu e lo kier comparti su conocemento no solamente den e area profesional pero tambe social. “Di un forma hopi spontaneo mi a cuminsa un conversacion interesante y fructifero cu e Fundacion Autismo Aruba, locual a resulta na mi decision pa drenta e fundacion aki como miembro”.

Carolina actualmente ta ocupa su mes cu research pa locual ta e tema di Autismo. “E investigacion cu mi persona hunto cu dos studiante di e ramo di Salubridad Publico di mi Alma Mater esta Coastal Carolina University bou di mi guia a cuminsa cune ta un serie di encuesta representativo cu lo defini e actitud di nos comunidad pa locual ta autismo”. E investigacion lo ta uno cu lo tin varios fase y lo keda bira mas specifico. E prome fase ta pa haya un conocemento general di e actitud y conocemento di y na Aruba pa locual ta autismo; pa esaki a haci uso di un formato usa internacionalmente p’asina por “bench mark” pa wak unda Aruba como pais ta score. Den e siguiente fasenan, e gruponan lo ta mas chikito y specialisa, p. e. scolnan, companianan, dunadornan di cuido, etc. E investigacion aki ta di importante p’asina por realmente midi e conocemento general y den cada sector pa por brinda e educacion y sosten necesario den un manera efectivo y eficiente.

“E idea ta pa alabes cuminsa cu algun “pilot projects” pa por midi si en berdad esakinan lo ta efectivo y eficiente pa gruponan mas grandi. Entre otro nos lo cuminsa cu tayernan educativo na varios lugar y midi e conocemento prome y despues di e tayernan aki, un pre- y post-test. Tambe nos lo cuminsa cu algun proyecto na scolnan primario cu no solamente lo ta beneficioso pa studiantenan autista, sino tambe pa cualkier otro mucha cu por ta pasando door di momentonan menos agradabel”.

DATA TA IMPORTANTE DEN TUR RAMO, PERO MAS IMPORTANTE TA LOCUAL TA HACI CUNE

E IMPORTANCIA DI DATA Y LOCUAL TA HACI CUNE

“Data ta importante den tur ramo, pero mas importante cu data ta locual ta haci cune. Data ta brindabo un imagen di locual bo a midi di un forma sea cuantitativo of cualitativo. Ora cu analisa e data aki por saca afo corelacionnan cu porta no tabata cla anteriormente y tambe e por yuda saca afo retonan y tambe solucionnan, cu solamente por keda identifica door di midi esaki continuamente. Den e ultimo aña, a realisa hopi estudio mundialmente riba e topico di Autismo. Hopi di e data aki ta/a yuda nos compronde hopi aspecto di autismo. Pero e complexidad di e trastorno, mas e complexidad di diferente cultura ta pone cu hopi facil data por bira “irrelevante” pa un pais. Pa e motibo aki ta importante pa Aruba por conta cu su mesun set di data cu ta relevante na nos comunidad y cultura. Como pais ta importante pa por tin data cu ta defini e areanan mas vulnerabel y tambe por keda midi e progreso cu tempo. Esaki ta yuda un pais inverti su recursonan limita di un manera mas eficiente y efectivo”.

“Mi tin cu bisa cu di experiencia, te cu awo, pa haya data na Aruba ta cu si bo tin e tempo y recursonan, nos hendenan ta mas cu dispuesto pa forma parti di e.o. encuestanan, cual ta haci e proceso di colecta data uno mas facil y placentero. Un reto ta keda e aspecto di comparti data cu otro, pues confidencialidad di e persona mester semper keda central. Ora di comparti data cu ta contene informacion personal esaki mester keda adapta, y no ta un secreto cu tempo ta limita pa tur hende, y pues e por haci cu pa obtene data di otro instancia ta rekeri tempo y hopi esfuerso. Den termino corto nos kier por trece dilanti cifranan relevante na nos situacion local p’asina por defini e retonan mas grandi na Aruba y delinea e posibel solucionnan. Tambe nan ta desea di sigui brinda conocemento na e comunidad. Den termino largo mester pensa riba cambionan na un nivel nacional, esta cambionan na manehonan den e sector di educacion y social pa asina por en berdad brinda personanan Autista un futuro productivo y positivo.

MAYORNAN TA HACI MAGIA CU E TIKI RECURSONAN CU NAN TIN

E LUCHA DI MAYORNAN CU YIUNAN DIAGNOSTICA CU AUTISMO NA ARUBA

“Locual cu mi a descurbri den e periodo cu mi a bini bek Aruba y despues di a join Fundacion Autismo Aruba ta cu mayornan ta haci magia cu e tiki recursonan cu nan tin”. Carolina ta bisa cu mayornan di muchanan Autista ta e mayornan di mas creativo cu el a conoce, paso apesar cu Aruba no ta conta cu hopi servicionan pa personanan cu autismo, mayornan ta obliga di ta creativo p’asina nan mes por brinda nan yiu, e mihor sosten posibel. “Esaki ta un descubrimento hopi bunita, paso e ta bisa hopi di e mayornan y nan determinacion”. Alabes el a enfatisa e falta di servicionan den nos comunidad cual a mustra e necesidad pa data p’asina por enfoca riba proyectonan basa riba necesidadnan specifico pa nos pais.

ROL DI GOBIERNO

Gobierno tin un papel grandi di hunga como facilitado. “Autism Spectrum Disorder, cu ta conoci como autismo ta encera cu no tur autista ta mescos cu otro. Algun mester di mas servicio y atencion cu otro. Pero hecho ta cu servicionan manera logopedie of algo cu ta hopi limita na Aruba, cu ta behavior therapy, esta terapia di comportacion no ta cubri pa AZV. Consecuentemente, e ta sali hopi caro. Mester mas logopedista pa yuda muchanan for di mas chikito posibel. “Al contrario di opinion publico, gobierno ta mira e importancia di esaki”. Gobierno a institui un Comision Nacional di Autismo, riba peticion di Fundacion Autismo Aruba. E tarea di e comision ta pa determina e servicio y kico mester haci pa mehora y amplia servicio. E Comision Nacional a caba di tene un presentacion na henter Conseho di Minister y a haya e luz berde pa continua cu su trabou. Aki mester formula sugerencia pa un maneho riba autismo cu ta conecta cu otro. Den otro palabra, tur instancia, for di Wit Gele Kruis te na scolnan, Departamento pa Asuntonan Social te Labor mester colabora y formula un solo liña pa percura cu personanan cu autismo logra nan potencial maximo. Pero, atrobe, manera pais, nos recursonan ta hopi limita, y gobierno semper lo tin cu haci decisionnan cu lo (idealmente) ta mas beneficioso pa e pais posibel, pues ta dificil pa midi e beneficio si no tin data ni cifra pa ilustra e necesidad y impacto.

NOS KIER BIN CU E PROYECTO – CON TA DISEÑA UN KLASLOKAAL- CU MUCHANAN AUTISTA ADEN

FUNDACION AUTISMO ARUBA

“Nos a tuma nota cu hopi biaha no ta mayornan ta yama. Hopi biaha nos ta ricibi yamada di welo of wela, of hasta docente cu ta ripara cu algo ta sinti straño cu e mucha”. Fundacion Autismo Aruba a lanta pa aumenta conocemento riba autismo y no ta brinda servicio directo. Pero si ta guia esnan cu yama na profesionalnan. Fundacion Autismo Aruba a logra cu autismo ya no ta algo desconoci. For di tempo cu a lanta, a organisa diferente simposio, tayer y conferencia pa mayor y docentenan. “Nos enfoke ta pa den un futuro cercano por brinda nos scolnan local cu e herment y conocemento necesario pa por brinda muchanan autista un espacio y ambiente agradabel pa nan por eherce y desaroya nan maximo potencial”. Donacionnan ta crucial, pasobra FAA ta traha sin subsidio di Gobierno. “Asina mes nos a logra diferente proyecto, for di organizacion di cursonan, conferencia te sosten directo na algun famianan”. E enfoke mas grandi pa fundacion e aña aki ta pa por midi e conocemento general di nos comunidad riba e topico di autismo y asina por traha riba plannan di educacion pa e comunidad. Tambe ta di suma importancia pa cuminsa traha di un forma mas uni cu e posibel partners den nos comunidad pa por tin un impacto mas efectivo y duradero. “Ademas, e aña aki nos kier bin cu e proyecto ‘Con ta diseña un klaslokaal.’ Organisacion di un klas cu por acomoda mucha cu autismo lo yuda tanto e docente como e alumno ta mucho mas productivo. Lo trece expertonan pa yuda scolnan den e proceso aki. Pa un fundacion, un boluntario semper ta un alivio mirando cu mayoria bes esnan envolvi den directiva tin nan trabou durante dia y ta haci trabounan pa e fundacion den nan tempo liber. Na e momentonan aki Fundacion Autismo Aruba ta sumamente contento di por conta cu dos studiante cu ta yuda pa colecta y analisa e data. Pues na e momentonan aki e fundacion lo por beneficia grandemente di otro studiantenan local y tambe internacional cu ta interesa den e investigacion aki y cu por brinda nan tempo den forma boluntario p’asina yuda sigi colecta data y analisa esaki. Aparte di esey, boluntarionan c’un background di educacion y/of social por yuda cu e partinan di educacion y tayernan educativo”.

E DIA PERFECTO DEN BIDA DI UN MUCHA CU AUTISMO

P’ami e dia perfecto den e bida di un mucha autista na Aruba ta uno unda cu por brind’e e espacio y sosten pa desaroya y eherce, siendo su mes. Corda cu e mucha ta bira adulto y mester por ta productivo y feliz. Mayornan cu tin yiunan cu tin Autismo tambe ta mas cu bon bini pa forma parti di e fundacion. Sigui cu e perseverancia, e motivacion y e creatividad p’asina brinda bo yiu (nan) cu locual e mester como persona individual. Yuda otronan compronde Autismo y e caso di bo yiu p’asina nan por ta mas considerabel y duna sosten na bo yiu consecuentemente. Bo lo ta sorprendi di un forma agradabel con un hende su actitud por cambia ora cu nan ta compronde algo.