1. XCL: Conta nos un poco di bo niñez y hubentud, con esakinan tabata ta y kico ta e recuerdonan mas agradabel cu bo tin di e periodo aki?
    ADRIENNE: Mi niñez y hubentud mi a pasa gran parti di dje ta practica deporte. Mi tabata practica e deporte di landamento competitivo y bo por bisa cu mi infancia tabata practicamente ful enfoca ariba esaki y tambe riba mi estudio. Naturalmente mi tabatin un bida social y tabata pasa tempo cu mi amigonan pero gran parti tabata enfoca ariba deporte. Y mirando bek aworaki mi ta asina agradecido di esaki. E recuerdonan mas agradabel cu mi por tin di e periodo aki, ora mi wak bek awor, tabata tur e biahe nan cu mi tabatin e honor y placer pa por a representa Aruba den exterior, formando parti pa varios aña di e seleccion nacional di Aruba. Y e viahe mas memorabel sin duda tabata mi biahe pa e Weganan Olimpico di anja 2008 na Beijing, China.
  2. XCL: Kico bo a studia y pakico bo a escohe e estudio aki?
    ADRIENNE: Mi a studia ley na Universidad di Aruba y a termina esaki cu puntuahe nan halto. Desde momento cu mi a caba VWO y lo a sigui mi estudio na Hulanda mi kier a studia ley pero mas bien ‘tax-law’. Na ultimo momento toch mi a dicidi di bai studia Business na Erasmus Universiteit, Rotterdam pero esaki toch a resulta di no ta algo p’ami. Despues di mi prome aña cu mi a haal mi propedeuse mi a bolbe Aruba y a cuminsa studia ley na Universidad di Aruba y esaki sin duda tabata un di e mihor decision nan cu mi por a tuma den bida.

  3. XCL: Conta nos un poco di bo bida como deportista y con esaki a yudabo na ta e persona cu bo ta awe?
    ADRIENNE: Mi a practica deporte desde cu mi tabata tin 6 aña di edad pues deporte semper a forma parti di mi bida y ta algo cu mi gusta. Deporte sin duda a aporta na e disciplina, determinacion, positivismo y motivacion cu mi persona tin pa logra cualkier meta cu mi pone mi dilanti. E la yudami den mi carera profesional, mi bida personal y tambe recien den e deporte di fitness cu mi a bin ta verdiep mi mes mas aden.

  4. XCL: Bo ta un persona cu semper a haci hopi deporte, pakico bo a cambia y bai den fitness?
    ADRIENNE: Mi ta train cu peso y den gym particularmente semper tabata forma parti di mi rutina diario den e deporte di landamento. Momento cu mi a haya mi obliga di stop di landa pa motibo di un blessure y tambe pa motibo di mi estudio, mi a dicidi di sigui train den gym p’asina mi por a keda activo. Aki ta unda mi a cuminsa train cu mi coach actual, esta Rene Wild. Pues e tabata mas bien un manera pa mi por keda activo paso mi ta un persona cu no por para keto.

  5. XCL: Cuanto tempo bo tin den gym caba?
    ADRIENNE: Mi tin por lo menos 4 aña caba ta train den gym cu mi coach Rene Wild y mi tabata train 4 biaha pa siman.
  6. XCL: Con bo rutina ta?
    ADRIENNE: Mi rutina naturalmente a cambia un poco na momento cu mi a cuminsa prepara pa e competencia di Fitness y esaki a aumenta cu training 2 biaha pa dia, casi tur dia. Mi tabatin un plan di nutricion tambe y esaki tambe tabata den man di mi coach Rene Wild. E plan di nutricion hunto cu e tipo di training tabata cambia/varia naarmate cu e cambionan tabata presenta na mi curpa.
  7. XCL: Pakico bo a dicidi di participa den un competencia di Fitness?
    ADRIENNE: Honestamente e no tabata un idea di mi mes inicialmente. Mi coach Rene tin algun aña ta puntrami pa participa na e competencia aki pero semper mi tabata bise cu e no ta algo pami. E aña aki, despues di algun luna turbulento, emocional y cu hopi stress, e momento cu Rene a bolbe asercami pa participa, pa un motibo of otro mi no a duda 2 biaha pa bisele SI. E unico condicion cu nos tur dos a pone cu mi lo subi e escenario solamente si ami y e ta sinti cu mi ta 110% cla p’e! Y esey tabata e caso tambe. Mi a wake mas bien como un challenge nobo pami y tambe un manera di distrai mi mente y concentra bek riba mi mes.

  8. XCL: Kico ta e aspectonan mas duro di e participacion?
    ADRIENNE: P’ami personalmente tabata e combinacion di mi training y plan di nutricion cu mi trabou y mi bida personal. E plan di nutricion riba su mes tampoco ta facil pero e no ta imposibel. It all boils down to the question: ‘how bad do you want it’.

  9. XCL: E rutina di gym combina c’un trabou asina exigente por ta basta duro. Con bo ta combina e dosnan aki?
    ADRIENNE: Mi mester bisa cu mi doño di trabou tabatin hopi comprension pa cu esaki y a support mi 100% cu mi participacion. Fuera di esey na mi trabou mayoria di nos ta biba un bida hopi activo, sea ta train den gym of crossfit y come saludabel y esaki tambe ta juda paso cada un di nan tabata motivami. Sigur e no tabata facil pa combina y tin dia cu mi curpa y/of mi mente djis no tabata por a duna mi 100% di cansa cu mi tabata pero net esey ta e momento nan caminda bo ta pusha bo mes pa sigui paso bo tin un meta bo dilanti.

  10. XCL: Pakico bo ta kere cu tin hendenan ta give up cu nan fitness y no ta zet door?
    ADRIENNE: Pa ta sincero, mayoria di biaha ta pa falta di disciplina. Naturalmente sa tin factornan externo cu nos no por evita y cu ta pone cu hendenan ta give up of ta haya nan mes obliga ta stop. Pero fitness no ta rekeri solamente disciplina sino tambe motivacion propio, vooral riba e dianan cu bo tin menos gana. E ta rekeri tambe determinacion caminda bo tin cu recorda bo mes riba e motibo principal pakico bo ta haciend’e. Sea ta pa mantene bo mes in shape, pa baha peso of pa competi. Pa bisa cu bo no tin tempo pa haci ta e excusa di mas grandi cu tin. Where there is a will, there is a way!
  11. XCL: Kico ta bo motivacion pa sigui p’adilanti cune?

    ADRIENNE: Mi mes y mi metanan cu mi a pone mi dilanti. E momento cu bo pusha bo mes mentalmente y fisicamente te na un punto, un limite cu bo ta wak tur locual bo ta capas di dje, ta unda bo ta cuminsa wak e cambionan y e beneficionan mentalmente y fisicamente. Esey p’ami tabata e premio di mas grandi y esey tambe ta e motivacion pa mi sigui padilanti y sigui cosecha mas exito.

  12. XCL: Kico ta e siguiente pasonan pabo den competencia?
    ADRIENNE: Pa e aña ‘ki mi no lo competi mas y esaki ta algo cu ami y mi coach a dicidi recientemente pero mi siguiente competencia lo ta na cuminsamento di aña 2018 y mi lo anuncia esaki asina cu tur cos ta ful regla.

  13. XCL: Te na unda lo bo desea di yega den e deporte di fitness?
    ADRIENNE: Manera mayoria di nos cu ta competi den e mundo di Fitness/Bodybuilding, e deseo ta pa yega na obtene nos Pro Card y asina competi na competencia nan mas grandi cu e top nan di mundo y pa algun dia logra subi e escenario di Mr. Olympia, cual ta e Super Bowl/Olympiada di e mundo di Bodybuilding.

  14. XCL: Kico ta bo mensahe pa tur esnan cu ta mira bo awor y ta pensa cu nunca nan lo por yega na un curpa asina?

    ADRIENNE: Hamas lo mi mes a pensa cu mi por a yega na un curpa asina. Pero no lubida cu no ta existi un ‘ideal body’ ni un ‘ideal bodytype’. Tur persona ta diferente y tur curpa ta diferente pero esey no ta nifica cu bo no por yega na un curpa lean and fit. Si esaki ta locual bo ta desea, pone bo mente 100% riba logra esaki y percura cu bo duna tambe 100% di bo mes pa yega na e meta aki. Misa cu e no ta facil y misa cu e ta rekeri tempo y dedicacion but nothing is impossible, it’s your mind that needs convincing.

  15. XCL: Ken tur bo lo desea di gradici pa a yudabo yega unda bo ta?
    ADRIENNE: E lista sigur ta largo paso mi no a logra yega te aki sin e apoyo y sosten di varios persona pero sigur tin algun persona clave cu mi no por keda sin gradici. Na promer lugar papa Dios pa dunami e forsa pa a logra tur meta cu mi a pone mi dilanti. Na mi coach Rene Wild cu a motivami, inspirami, guiami y a kere den mi desde un principio y cu sin duda ta e motor tras di mi prome exito den e mundo di fitness. Mi mayornan cu desde mi infancia a apoyami y sostenemi den deporte, estudio y den cualkier decision cu mi por a tuma den bida. Cualkier meta cu mi a pone mi dilanti nan a sa di para mi tras, all the way! Mi amiga Tracey Nicolaas cu tabata motivami y a yuda mi dia aden y dia afo durante mi preparacion nan pa e competencia di fitness/bodybuilding. Mi coach di landamento Ismael Santiesteban cu tambe semper a guiami y pushami pa sobresali den tur aspecto di bida. Y naturalmente sin laga afo mi famia, coleganan di trabou y tambe tur mi amigo/amiganan cu semper a support me all the way y cu di un manera of otro a yudami yega caminda cu mi ta. It’s all about team work and I really do have the best team!

     

FITNESS TA REKERI DISCIPLINA & MOTIVACION

 

NOMBER: Adrienne I.N. Fräser
EDAD: 26 Aña
ESTUDIO: Masters degree Arubaans Recht (LL.M.)
PROFESION: Abogado y Entrepeneur (Business Partner)