Tin hopi cosnan serio cu por damage bo relacion, manera infidelidad, addiccion y maltrato. Pero tambe tin varios cosnan chikito cu parehanan no ta tene cuenta cunan, pero cu a lo largo por afecta e relacion y ocasiona problemanan grandi cu por caba cu un relacion por completo. Studia esakinan y mira con bo por evita di comete e erornan aki, pa un relacion sano.

• No tene cuenta cu otro:

Sibosacubo pareha ta wardando riba bo no ta tuma hopi esfuerzo dibo pa informe cu bo lo bai yega laat pa x motibo. Cu esaki bo ta demostra cu bo ta tene cuenta cu e sentimientonan di bo pareha, kende por bira preocupa of asta rabia den caso cu bo yega demasiado laat sin avisa. Evita duda y discusionnan innecesario.

• Comunica via text:

Texting por ta un manera practico y eficiente pa manda otro mensahenan cortico. Sin embargo si bo medio di comunicacion principal ta texting, y esaki ta inclui tambe conversacionnan demasiado largo y serio cu bo pareha, esaki por nifica cu comunicacion personal y directo ta wordo hala un banda, kizas pa evita confrontacion. Den e caso aki mester sondea e motibo dicon esaki ta pasando y trece un cambio den esaki.

• Haci cherche of papia malo di bo pareha dilanti otronan:

Tin hende sa haci’e den forma di ‘joke’, pero haci burla di bo pareha, zundre of rebahe, poniendo e mustra malo den presencia di otronan, ta un actitud cu ta refleha hopi mal educacion, y no di bo pareha, sino dibo. Ademas di hurt bo pareha y damage bo relacion, esaki ta algo hopi incomfortabel pa otro personanan mester presencia.

Caucasian couple arguing on sofa

• Trece pasado bek cada vez cu bo no ta contento cu algo:

Si bo tin algo di pasado cu ta molestiabo, no trece esaki padilanti na momento cu bo ta rabia, cu e unico intencion pa hurt bo pareha. Trece padilanti na un forma adulto, na momento cu boso tur dos por papia na manera civiliza cu otro, cu e meta di resolve e issue y laga e resentimiento atras definitivamente.

• Uza e palabranan:

“nunca” y “semper”. Palabranan legendario y completamente irrealistico cu ta causa disgusto innecesario entre pareha.

• Negligencia:

Tur hende sa cu television, IPads, computer, cell phones y social media a evoluciona drasticamente durante e ultimo añanan, birando mas importante cu e atencion pa e pareha. No ta nada straño cu e pareha na dado momento lo cuminsa sinti su mes insignificante, cuestiona e seriedad di e relacion y tin vez asta busca su mesun forma di entretenimiento.

• No mustra aprecio:

Ora e pareha haci algo, pabo bo yiunan of pa cas, bo ta bise danki? Hopi hende no ta mira motibo pa bisa danki, pasobra: Ta su deber, toch? No, no ta SU deber. Ta un responsabilidad comparti di un pareha pa take care di otro, di e yiunan y di cas. Un ta yuda otro. Ora un amigo of amiga yudabo bo no ta bise danki? Cuminsa pa trata bo pareha mesun bon cu bo ta trata bo amigo of amiga y bo lo mira con cosnan lo cambia pa miho.

Desiree Swaen 
Certified Professional Coach