Durante luna di April Hilton Aruba Caribbean Resort & Casino a tene nan evento anual di aprecio na nan clientenan unda cu mas di 300 clientenan a reuni pa celebra innovacion y Hilton Hospitality. E evento tambe a representa e inaguracion di e ballroom cu recientemente a ser renoba y renombra como Morris Lapidus Grand Ballroom, nomber di e legendario architect cu a diseña e spectacular Aruba Caribbean Hotel, cu a habri na 1959.

E invitado nan di e anochi aki tabata representa negoshinan , institucion nan educativo, organizacion no-lucrativo, como tambe miembronan di medionan di comunicacion y prensa local. E ekipo di Hilton Aruba tabata duna tur hende un caluroso bonbini, y inmediatemente e invitadonan a wordo sorpresa cu un photobooth unico unda e invitado por a sinti manera un celebridad, ya cu nan potret tabata ser saka den estilo di e cover di un Hilton magazine. E ballroom a ser transforma den un elegante ‘Hilton Affair’, presentando un concepto di decoracion glamuroso cu toke nan clasico y moderno. E invitadonan a keda sorpresa ora di wak un limousine para den e ballroom, cu un fotografo cla pa saca nan potret.

Aruba Trading tambe tabata presente cu un stacion di Moet & Chandon sirbiendo e miho champagne henter anochi, y cu un structura grandi di e marca Moet cu alabes a ser uza como un photo backdrop.

Cinco meeting-rooms tambe a ser presenta cu diferente setup manera “Meet with Purpose”, “Stay Fit” cu ta enfoca ariba bienestar, un “Aloe Scrub” interactive coffee break, como tambe un high-tech dinner setup cu centerpiece projecta ariba e mesanan.

E Hotel manager, Jacques Monteil a gradici e apoyo y lealtad di e invitadonan presente y a comparti e bon noticia cu Hilton a wordo nombra como e #1 ariba Fortune 100 “Best Places to Work For”, mientras ku Aruba a bira e #1 e destinacion vacacional den Caribe. Segun Monteil, ora cu forsanan a uni, cosnan grandi a pasa cu Hilton Aruba; cu recientemente a wordo nombra e Hotel di Aña pa full e region di Americas na Hilton su Americas Leadership Conference.

Entre e otro noticianan di e anochi tabatin e apertura di Oscar’s Market, cu tin e espresso favorito di Italia, Lavazza, y a honra e pionero di turismo di Aruba Oscar Henriquez. Tambe a tuma un par di minuut pa gradici su equipo completo y a duna un adelanto di e proximo celebración di Hilton cu ta e di 100 aniversario di e cadena Hilton.

Pa 9’or en punto e cortina nan patras di e booth di DJ Sky a baha y asina a revela e sorpresa di e anochi, e banda number un di Aruba, Buleria, a deleita e invitadonan cu e mihor repertorio musical. Durante full e anochi, e ekipo culinario a complace e paladar di tur esnan presente cu diferente hors d’oeuvres exkisito, un variedad grandi di land & sea stations, postrenan delicioso y free-flowing cocktails henter anochi.

“Nos goal tabata pa gradici nos clientenan pa nan lealtad y apoyo continuo, y pa celebra nos logronan hunto cu nan”, a expresa Sra. Chela de Lannoy, Director di Catering y Evento. “Un danki special na Elite Productions y The Perfect Team pa a haci nos vision realidad. E evento tabata un exito rotundo, y tambe a demonstra Hilton Aruba su hospitalidad como tambe nos capacidad extraordinario di haci evento”.