Den un sala yena di Crystal Theater diamars anochi dia 26 di September 2018, e documentario experimental, produci pa Switch Foundation, “Promesa Falso” a keda estrena.
Espectativa tabata sigur grandi pa mira e documentario aki cu ta riba e tema di “human trafficking” (traficacion di hende).
E fundador di Switch Foundation y Producer di “Promesa Falso” Paula Nahr tabata hopi emociona cu e premiere di e proyecto aki cual a nace na 2015. Tabata e docente Cindy Wernet, miembro di Kiwanis Young Professionals Aruba, kende a contact’e y propon’e pa traha riba un produccion educativo riba e tema di “human trafficking”. Switch Foundation ta conoci pa nan produccionnan informatico riba temanan manera adiccion, embarazo hubenil, violencia domestico, bullying, entre otro.
Pa e documentario aki, Nahr a acerca Jeanette Richardson di Counter Trafficking Task Force Aruba pa haci su investigacion y asina logra compila un documentario di 45 minuut.

“Human Trafficking” ta sosode na tur parti di mundo, pero den e documentario experimental aki ta pone concentra riba prevencion. Pa e documentario aki a haya e testimonio di un sobreviviente di traficacion sexual cual ta Shamere Mckenzie. Shamere ta un mucha muher educa, di caracter fuerte, inteligente pero cu a cay victima di traficacion sexual. Mester habri wowo pa nos hobennan ta protegi pasobra esaki ta un fenomeno cu ta creciendo cada bez mas. “Lover boys” tin tur caminda rond mundo, cu ta persuadibo pa cay den nan wega di “amor” y si bo no ta conciente di esey bo lo por cay pa nan promesanan falso.

Durante e premiere esnan presente a wordo sorpresa cu presencia di e famoso actriz Spaño, Luisa Gavasa, kende a gana hopi premio, inclui e “Premios Goya 2016”.
Luisa Gavasa a traha cu e reconocido cineasta Pedro Almodovar y elogia recientemente pa su pelicula “Campeones”. El a laga sa cu e trabao di Switch Foundation ta uno di calidad internacional y sigur e lo duna sosten pa yuda share e mensahe poderoso aki internacionalmente.

“Promesa Falso” lo ta na Telearuba diaranzon 10 di October pa 9:10 pm y despues lo ta disponibel riba nan YouTube Channel: Switch Foundation.